ভাৰতীয় ছিকিউৰিটিজ এণ্ড এক্সচেঞ্জ ব’ৰ্ডৰ প্ৰাক্তন অধ্যক্ষ মাধৱী পুৰি বুচৰ বিৰুদ্ধে আদালতে তদন্তৰ নিৰ্দেশ দিছে। ছেবিৰ দায়িত্বত থকাৰ সময়তে মাধৱীয়ে শ্বেয়াৰ বজাৰত ব্যাপক অনিয়মৰ অভিযোগ উত্থাপন হৈছিল। মুম্বাইৰ এখন বিশেষ আদালতে সেই গোচৰত মাধৱী আৰু আন ৫জনৰ বিৰুদ্ধে এফআইআৰ দাখিল কৰি তদন্তৰ নিৰ্দেশ দিছে।
ছেবিৰ অধ্যক্ষ হিচাপে কাৰ্যনিৰ্বাহ কৰি থকাৰ সময়তে মাধৱী পুৰি বুচৰ বিৰুদ্ধে ব্যাপক অনিয়মৰ অভিযোগ উত্থাপন হৈছিল। সেই গোচৰৰ তদন্তৰ দাবীত এজন সাংবাদিকে আদালতত জনস্বাৰ্থৰ গোচৰ দাখিল কৰে। তেওঁৰ অভিযোগ আছিল যে মাধৱী ছেবিৰ মুৰব্বী থকা কাৰ্যকালত শ্বেয়াৰ বজাৰত ব্যাপক আৰ্থিক জালিয়াতি, অনিয়ম আৰু দুৰ্নীতি সংঘটিত হৈছিল।
শনিবাৰে গোচৰৰ শুনানিত মুম্বাইৰ এখন বিশেষ আদালতে কয় যে জালিয়াতি সংঘটিত হোৱাৰ প্ৰাথমিক প্ৰমাণ ইতিমধ্যে আমি লাভ কৰিছো। ফলত এই ঘটনাৰ নিৰপেক্ষ তদন্ত হ’ব লাগে। আদালতৰ তত্বাৱধানত এই গোচৰৰ তদন্ত হ’ব আৰু ৩০ দিনৰ ভিতৰত তদন্তৰ ষ্টেটাছ ৰিপৰ্ট দাখিল কৰিবলৈ কোৱা হৈছে। অৱশ্যে এই সিদ্ধান্তৰ বিৰুদ্ধে উচ্চ ন্যায়ালয়ত আবেদন কৰিব বুলি ছেবিয়ে বাৰ্তা দিছে।
উল্লেখ্য যে যোৱা বছৰ আমেৰিকান সংস্থা হিণ্ডেনবাৰ্গৰ এক প্ৰতিবেদনে দেশখনত যথেষ্ট আলোড়নৰ সৃষ্টি কৰিছিল। সেই প্ৰতিবেদনত ছেবিৰ মুৰব্বীগৰাকীৰ বিৰুদ্ধে বিভিন্ন অনিয়মৰ অভিযোগ উত্থাপন কৰা হৈছিল। কোৱা হৈছিল যে মাধৱী ছেবিৰ অধ্যক্ষ হোৱাৰ পিছতো তেওঁ আৰু তেওঁৰ স্বামীয়ে বিভিন্ন উদ্যোগিক কোম্পানীক পৰামৰ্শ দি ধন ঘটা বিত্তীয় পৰামৰ্শদাতা প্ৰতিষ্ঠানটোৰ সৈতে জড়িত আছিল।
কোৱা হৈছিল যে বিভিন্ন অজ্ঞাত আৰু বিদেশী বিনিয়োগ সংস্থাৰ জৰিয়তে বিভিন্ন কোম্পানীত বিনিয়োগ কৰি আদানী গোষ্ঠীৰ শ্বেয়াৰৰ মূল্য কৃত্ৰিমভাৱে বৃদ্ধি কৰা হৈছিল। সেই বিনিয়োগত বুচ দম্পতীৰ ধনো আছিল। ইয়াৰ লগত বিৰোধীৰ বিভিন্ন দাবীও সংযোজন কৰা হয়।
কোৱা হৈছে যে মাধৱীয়ে ছেবিৰ দায়িত্বত থকাৰ পিছতো ব্যক্তিগত বেংকৰ পৰা নিয়মীয়াকৈ দৰমহা লৈ আহিছে। এটা সময়ত লোকসভাৰ বিৰোধী দলপতি ৰাহুল গান্ধীয়ে নিজেই মাধৱীক অপসাৰণৰ দাবী জনাইছিল।
এই ঘটনাত পাব্লিক একাউণ্টছ কমিটীয়ে মাধৱীক মাতি পঠাইছিল। অৱশ্যে সেই বৈঠক আওকাণ কৰে ছেবি মুৰব্বীগৰাকীয়ে। এই ঘটনাত ক্ষুব্ধ হৈ সমিতিৰ অধ্যক্ষ কে চি ভেনুগোপালে বৈঠক স্থগিত ৰাখে। যদিও সেই ঘটনাৰ পিছত বিগত কেইমাহমান বিষয়টো ঠাণ্ডা পৰি থাকিল, এইবাৰ আদালতৰ নিৰ্দেশত বিপদত পৰিল ছেবিৰ প্ৰাক্তন মুৰব্বীগৰাকী।
