পোলেণ্ডত চলি থকা আন্তঃৰাষ্ট্ৰীয় চিলেচিয়ান বক্সিং প্ৰতিযোগিতাৰ ছেমি ফাইনেলপৰা বিতৰ্কিত পৰিস্থিতিত বিদায় মাগিব লগা হৈছে অসমৰ প্ৰতিভাৱান বক্সাৰ লাভলিনা বৰগোহাঁয়ে।
আয়োজক দেশ পোলেণ্ডৰ কেৰলিনা কছজেওস্কাৰ সৈতে শনিবাৰে হোৱা ৬৯কে’জি শাখাৰ খেলখনত লাভলিনাই সমান প্ৰতিদ্বন্দ্বিতা আগবঢ়োৱা সত্বেও ৰেফাৰিৰ ১-৪ৰ ‘বিভাজিত সিদ্ধান্ত’ (split decision)ত পৰাজিত হ’ব লগা হয়।
লগতে পঢ়ক অপ্ৰতিৰোধ্য মেৰি, পুনৰ বিশ্বজয় ৩৫ বছৰীয়া মণিপুৰী মাতৃৰ
খেলখনৰ সিদ্ধান্তৰ বিৰুদ্ধে ভাৰতীয় দলৰ ফালৰ পৰা দুৰ্ঘোৰ আপত্তি কৰা হৈছিল যদিও বক্সিঙৰ নিয়ম অনুসৰি ৰেফাৰিৰ সিদ্ধান্তই বাহাল থাকে।
অৱশ্যে প্ৰতিযোগিতাৰ পৰা বিদায় মাগিলেও ছেমি ফাইনেলত প্ৰৱেশ কৰা সূত্ৰে ব্ৰ’ঞ্জ পদক লাভ কৰে অসমৰ বক্সাৰগৰাকীয়ে।
লাভলিনাই কোৱাৰ্টাৰ ফাইনেলত চেক গণৰাজ্যৰ মাৰ্টিনা স্কমৰাজ’ভাক পৰাস্ত কৰিছিল।
প্ৰতিযোগিতাখনৰ ৬৪কে’জি শাখাত প্ৰতিদ্বন্দ্বিতা আগবঢ়োৱা অসমৰ আন এগৰাকী মহিলা বক্সাৰ ফাইলু বসুমতাৰী কোৱাৰ্টাৰ ফাইনেলত পৰাস্ত হৈছিল।
