শ্ৰীলংকাৰ নৌসেনাই ভাৰতৰ মাছমৰীয়াৰ নাওত আক্রমণ কৰাৰ অভিযোগ উত্থাপন হৈছে৷ ঘটনাত এজন মাছমৰীয়াৰ মৃত্যু হোৱাৰ বিপৰীতে আন এজন নিৰুদ্দেশ হৈছে। প্ৰশ্ন হয় তেওঁক জীৱিত অৱস্থাত উদ্ধাৰ কৰিব পৰা যাব নেকি? এই ঘটনাৰ পৰিপ্ৰেক্ষিতত নতুন দিল্লীয়ে চৰম ক্ষোভ প্ৰকাশ কৰে। ইতিমধ্যে ভাৰতৰ শ্ৰীলংকাৰ উচ্চায়ুক্ত প্ৰিয়ংকা উইক্ৰেমসিংহৰ পৰা উত্তৰ বিচৰা হৈছে।
ইয়াৰ পূৰ্বেও শ্ৰীলংকাৰ নৌসেনাৰ বিৰুদ্ধে এনে অভিযোগ উত্থাপন হৈছে। যোৱা কেইবছৰমানৰ পৰা তেওঁলোকে আন্তঃৰাষ্ট্ৰীয় জলসীমাত তামিলনাডুৰ মাছমৰীয়াৰ ওপৰত অহৰহ আক্ৰমণ চলাই আহিছে। এইবাৰো একেধৰণৰ ঘটনা সংঘটিত হয়। বৃহস্পতিবাৰে কাচচিটভু দ্বীপৰ পৰা পাঁচ নটিকেল মাইল উত্তৰত শ্ৰীলংকাৰ নৌসেনাৰ এখন জাহাজে ‘ইচ্ছাকৃতভাৱে’ মাছমৰীয়াৰ নাওখনত খুন্দা মাৰিছিল বুলি অভিযোগ উঠিছে। এই ঘটনাত এজন ভাৰতীয় মাছমৰীয়াৰ মৃত্যু হয়।
কিছু মাহ পূৰ্বে ভাৰতীয় মাছমৰীয়াই শ্ৰীলংকাৰ নৌসেনাৰ বিৰুদ্ধে প্ৰতিশোধ লয়। ইয়াত শ্ৰীলংকাৰ নৌসেনাৰ এজন বিষয়াৰ মৃত্যু হয়। সেই ঘটনাৰ পাছত ভাৰতীয় মাছমৰীয়াৰ ওপৰত আক্ৰমণ বৃদ্ধি পোৱা বুলি অনুমান কৰা হৈছে। স্বাভাৱিকতে ভাৰত-শ্ৰীলংকাৰ কূটনৈতিক সম্পৰ্ক পুনৰ উত্তপ্ত হৈছে।
শেহতীয়াকৈ কাচ্চটিবু দ্বীপক লৈ দুয়োখন দেশৰ মাজৰ সম্পৰ্ক উত্তপ্ত হৈ পৰিছে। প্ৰশ্ন উত্থাপন হয় যে এই দ্বীপটো ভাৰতৰ নে শ্ৰীলংকাৰ। আচলতে এই দ্বীপটো ভাৰত আৰু শ্ৰীলংকাৰ মাজত অৱস্থিত। আৰু এই দ্বীপটো বৰ্তমান শ্ৰীলংকাৰ অধীনত আছে। কিন্তু দুয়োখন দেশৰ মানুহ প্ৰতি বছৰে নিৰ্দিষ্ট সময়ত ইয়ালৈ তীৰ্থযাত্ৰাৰ বাবে যায়। যদিও দ্বীপটোত কোনো স্থায়ী ঘৰ নাই, তথাপিও ইয়াত এটা গীৰ্জা আছে।
নৰেন্দ্ৰ মোদী চৰকাৰে লোকসভা নিৰ্বাচনৰ পূৰ্বে দ্বীপ বিষয়টোক লৈ কংগ্ৰেছক আক্ৰমণ কৰে। কোৱা হৈছিল যে কংগ্ৰেছে নিৰ্মমভাৱে এই দ্বীপটো শ্ৰীলংকাৰ হাতত গতাই দিছিল। ইতিমধ্যে দুয়োখন দেশৰ মাছমৰীয়াৰ মাজত দ্বীপটোত মাছ ধৰা আৰু বিশেষাধিকাৰক লৈ মতানৈক্যৰ সৃষ্টি হৈছিল। কিন্তু শেহতীয়াকৈ যেন অধিক চৰম হৈ পৰিছে। বৃহস্পতিবাৰৰ এই কাণ্ডটোও কাচচাটিভু দ্বীপৰ আশে-পাশে সংঘটিত হয়।
