সংসদ আৰু বিধানসভা আৰু বিধান পৰিষদৰ মহিলাৰ বাবে ৩৩ শতাংশ আসন সংৰক্ষণ আৰু সংসদীয় সমষ্টিৰ সীমা নিৰ্ধাৰণ সন্দৰ্ভত বিধেয়কখনক লৈ লোকসভাত বিতৰ্ক আৰম্ভ হৈছে। কংগ্ৰেছৰ হৈ অসমৰ সাংসদ তথা প্ৰদেশ কংগ্ৰেছৰ সভাপতি গৌৰৱ গগৈয়ে কয় যে লোকসভাৰ বৰ্তমানৰ আসনৰ সংখ্যা অপৰিৱৰ্তিত ৰাখি এক তৃতীয়াংশ আসন মহিলাৰ বাবে সংৰক্ষিত হোৱাটো তেওঁলোকে বিচাৰে।
ইপিনে, পূৰ্বে ঘোষণা কৰা অনুসৰি বৃহস্পতিবাৰে লোকসভাত বিতৰ্ক আৰম্ভ হোৱাৰ লগে লগে তামিলনাডুৰ মুখ্যমন্ত্ৰী এম কে ষ্টেলিনে সীমা নিৰ্ধাৰণ বিধেয়কৰ প্ৰতিলিপি জ্বলাই প্ৰতিবাদ সাব্যস্ত কৰে।
বিধানসভা নিৰ্বাচনৰ প্ৰচাৰৰ বাবে বৃহস্পতিবাৰে নামাক্কাল জিলালৈ গৈছিল মুখ্যমন্ত্ৰী ষ্টেলিন। প্ৰচাৰ বন্ধ কৰি বিধেয়কখনৰ প্ৰতিলিপি জ্বলোৱাৰ পিছত ষ্টেলিনে অভিযোগ কৰে যে তামিলনাডুকে ধৰি দক্ষিণৰ ৰাজ্যসমূহ সীমা নিৰ্ধাৰণ বিধেয়কৰ পৰা বঞ্চিত হৈছে। দক্ষিণৰ ৰাজ্যসমূহত আসনৰ সংখ্যা পৰ্যাপ্ত পৰিমাণে বৃদ্ধি হোৱা নাই।
তামিলনাডুৰ মুখ্যমন্ত্ৰীয়ে কয়, আমি মহিলাৰ বাবে আসন সংৰক্ষণৰ ১০০ শতাংশ পক্ষত। কিন্তু যিদৰে কেন্দ্ৰই একপক্ষীয়ভাৱে লোকসভাৰ আসনৰ সংখ্যা বৃদ্ধি কৰিছে, যিকোনো মূল্যৰ বিনিময়ত ইয়াৰ বিৰোধিতা কৰিব ডি এম কে-ই।
তাৎপৰ্যপূৰ্ণভাৱে আঞ্চলিক দলসমূহৰ ভিতৰত ষ্টেলিন একমাত্ৰ মুখ্যমন্ত্ৰী আৰু ডি এম কে-ই সমষ্টি সীমা নিৰ্ধাৰণ বিধেয়কৰ তীব্ৰ বিৰোধিতা কৰিছে। কেন্দ্ৰই বিধেয়কখন প্ৰত্যাহাৰ নকৰিলে ৰাজ্যখন অচল কৰি তোলা হ’ব বুলি সকীয়াই দিছে তামিলনাডুৰ মুখ্যমন্ত্ৰীয়ে। ষ্টেলিনে ঘোষণা কৰে যে বিধেয়কখনৰ প্ৰতিবাদত এনে আন্দোলন হ’ব যিটো কোনেও অতীতত দেখা নাই।
ৰাজ্যসমূহৰ জনসংখ্যা অনুপাতে লোকসভাৰ আসনৰ সংখ্যা বৃদ্ধি কৰাটো অবৈজ্ঞানিক সিদ্ধান্ত বুলি উল্লেখ কৰে ডি এম কেৰ মুৰব্বীগৰাকীয়ে। তেওঁৰ মতে, তামিলনাডুকে ধৰি দক্ষিণৰ ৰাজ্যসমূহে নিজৰ জনসংখ্যা নিয়ন্ত্ৰণৰ ক্ষেত্ৰত দেশৰ বাকী অংশতকৈ বহু আগবাঢ়ি আছে, আৰু সেয়েহে এই ৰাজ্যসমূহৰ জনসংখ্যা বৃদ্ধিৰ হাৰ অতি নগণ্য। ফলত জনসংখ্যাৰ ভিত্তিত আসনৰ সংখ্যা বৃদ্ধিৰ সিদ্ধান্ত লোৱা হ’লে দক্ষিণৰ ৰাজ্যসমূহ বঞ্চিত হ’ব৷
ইপিনে, লোকসভাত বিধেয়কখনৰ বিৰোধিতা কৰি গৌৰৱ গগৈয়ে প্ৰশ্ন উত্থাপন কৰে যে কি মাপকাঠীত চৰকাৰে লোকসভাৰ আসনৰ সংখ্যা ৫০ শতাংশ বৃদ্ধি কৰিবলৈ চেষ্টা কৰিছে? তেওঁ অভিযোগ কৰে যে মহিলাৰ বাবে আসন সংৰক্ষণৰ কথা কৈ কেন্দ্ৰীয় চৰকাৰে প্ৰকৃততে বিজেপিৰ ভোটবেংক সুৰক্ষিত কৰাৰ চেষ্টা কৰিছে। কংগ্ৰেছ নেতাগৰাকীয়ে অভিযোগ কৰে যে ৰাষ্ট্ৰীয় স্বয়ংসেৱক সংঘই আসনৰ সংখ্যা বৃদ্ধিৰ সিদ্ধান্ত লৈছে।
চৰকাৰৰ হৈ সংসদীয় পৰিক্ৰমা মন্ত্ৰী কিৰেন ৰিজিজুৱে দাবী কৰে যে সৰ্বদলীয় বৈঠকত আসনৰ সংখ্যা বৃদ্ধিৰ বিষয়ে চৰকাৰে ব্যাখ্যা আগবঢ়াইছে। কিন্তু কংগ্ৰেছে সেই বৈঠক বৰ্জন কৰিছে।
প্ৰসংগক্ৰমে কংগ্ৰেছৰ বাহিৰেও তৃণমূল কংগ্ৰেছ আৰু বাওঁপন্থী দলসমূহেও সৰ্বদলীয় বৈঠকত অংশ লোৱা নাছিল। কিন্তু অংশগ্ৰহণ কৰা দলসমূহে কয় যে যি ব্যাখ্যাৰ ভিত্তিত চৰকাৰে আসনৰ সংখ্যা ৫৪৩ৰ পৰা ৮৫০লৈ বৃদ্ধি কৰাৰ সিদ্ধান্ত লৈছিল, সেই ব্যাখ্যা সৰ্বদলীয় বৈঠকত দিয়া হোৱা নাছিল।
