দীৰ্ঘদিনীয়া আন্দোলন আৰু কেইবাজনো কৰ্মচাৰীৰ মৃত্যুৰ পিছত কাছাৰ আৰু নগাঁও কাগজ কলৰ ক্ষেত্ৰত অৱশেষত শুভবুদ্ধিৰ উদয় হ’ল ৰাজ্য চৰকাৰৰ। আজি ৰাজ্যিক কেবিনেটে কাগজ কল দুটাৰ বাবে ৩৭৫ কোটি টকাৰ অনুমোদন জনায়।
কাছাৰ আৰু নগাঁও কাগজ কল দুটা ৩৭৫ কোটি টকাত লিজত লৈছে ৰাজ্যৰ উদ্যোগ বিভাগে।
আনহাতে কাগজ কল দুটাৰ ১০০ কৰ্মচাৰীক ৩ মাহৰ ভিতৰত বকেয়া ধন আদায় দিয়া হ’ব বুলিও সিদ্ধান্ত লয় কেবিনেটে।
এতিয়াৰে পৰা দুইটা কাগজ কলৰ মালিক হ’ব ৰাজ্য চৰকাৰ।
কেবিনেট বৈঠকৰ অন্তত সংসদীয় পৰিক্ৰমা দপ্তৰৰ মন্ত্ৰী পিযুষ হাজৰিকাই এক সংবাদমেল যোগে এই কথা সদৰি কৰিছে।
কেবিনেটৰ সিদ্ধান্ত অনুসৰি কাজিৰঙা ৰাষ্ট্ৰীয় উদ্যানত এতিয়া ৭ টা জৈৱ সংবেদনশীল অঞ্চল থাকিব বুলি ঘোষণা কৰা হৈছে।
সেইকেইটা হৈছে ক্ৰমে কাজিৰঙা ৰাষ্ট্ৰীয় উদ্যানৰ বাঘ সংৰক্ষণ অঞ্চল, বুঢ়াচাপৰি সংৰক্ষিত এলেকা, লাওখোৱা বন্যপ্ৰাণী সংৰক্ষিত এলেকা, গৰমপানী বন্যপ্ৰাণী সংৰক্ষিত এলেকা, নামবৰ গুৰুঙ বন্যপ্ৰাণী সংৰক্ষিত এলেকা, পূৱ কাৰ্বিআংলং বন্যপ্ৰাণী সংৰক্ষিত এলেকা, উত্তৰ কাৰ্বি আংলং বন্যপ্ৰাণী সংৰক্ষিত এলেকা।
কাজিৰঙাৰ ১১ টা স্থান ৰিজাৰ্ভ ফৰেষ্ট হিচাপে থাকিব বুলিও মন্ত্ৰী পিযুষ হাজৰিকাই সংবাদমেলত জানিবলৈ দিয়ে।
উচ্চতম ন্যায়ালয়ৰ গাইডলাইন মানি এই সিদ্ধান্ত লোৱা হৈছে বুলি মন্ত্ৰী গৰাকীয়ে মন্তব্য কৰে।
কেবিনেটৰ সিদ্ধান্ত মৰ্মে নুমলীগড় এলেকাক ইক’ চেনচিটিভ জ’নৰ আওতাৰ পৰা মুকলি কৰি দিয়া হৈছে। গতিকে অঞ্চলটোত এতিয়াৰে পৰা উন্নয়নমূলক কাম-কাজ কৰিব পাৰিব বুলি পিযুষ হাজৰিকাই উল্লেখ কৰে।
ইফালে কাজিৰঙা ৰাষ্ট্ৰীয় উদ্যানত ৯ টা এনিমেল কৰিডৰ থাকিব বুলি ঘোষণা কৰা হৈছে।