“অহা বছৰৰ পৰা অসমত নাথাকিব এখনো কাঠৰ দলং। ৰাজ্যৰ সকলো দলঙেই পকী কৰা হ’ব লাচিত-চিলাৰায় সেঁতু নিৰ্মাণ পৰিযোজনাৰ অধীনত।”
যোৱা ৫ জুনত জনতা ভৱনত আয়োজিত এখন সংবাদমেলত এইদৰে ঘোষণা কৰিছিল গড়কাপ্তানী মন্ত্ৰী ড০ হিমন্ত বিশ্ব শৰ্মাই। তাৰ পাছত ৬ মাহৰ পাছত আজি পুনৰ গড়কাপ্তানী বিভাগৰ সভাগৃহত এখন সংবাদমেল পাতি একেখিনি কথাৰ পুনৰাবৃত্তি কৰিলে গড়কপ্তানী বিভাগৰ মন্ত্ৰী ড০ হিমন্ত বিশ্ব শৰ্মাই।
চলিত বৰ্ষৰ অন্তিম পৰ্য্যায় পালেহি তথা নতুন বৰ্ষ আৰম্ভ হ’বৰ বাবে মাজত আছে মাথোঁ কেইটামান দিন। তাৰ পাছতো নাবাৰ্ডৰ পৰা ঋণ লৈ ৰাজ্যৰ ১১৭৯খন কাঠৰ দলং পকীকৰণ কৰাৰ কথাহে ঘোষণা কৰিলে মন্ত্ৰী হিমন্ত বিশ্ব শৰ্মাই।
উল্লেখযোগ্য যে যোৱা ৫ জুনতে বিভাগীয় মন্ত্ৰীজনে ঘোষণা কৰিছিল যদিও এই পৰ্য্যন্ত এখনো কাঠৰ দলং পকী হোৱা নাই। অথচ অহা বছৰৰ ভিতৰত ১ হাজাৰখনৰো অধিক দলং পকী কৰাৰ প্ৰতিশ্ৰুতি দিছে মন্ত্ৰীজনে।
আজিৰ সংবাদ মেলত হিমন্ত বিশৰ্মাই কয়, “নাবাৰ্ড আৰু ৰাজ্য চৰকাৰৰ পুঁজি মিলাই ‘মহাবীৰ লাচিত-চিলাৰায় সেঁতু’ আঁচনি লোৱা হৈছে।”
পূৰ্বৰ ৫ জুনৰ সংবাদমেলত তেওঁ কৈছিল, “প্ৰত্যেক বছৰে ২০০-৩০০ কাঠৰ দলং পকী কৰি থকা হয় যদিও এইবছৰ লাচিত-চিলাৰায় সেঁতু নিৰ্মাণ আঁচনিৰ অধীনত এই গোটেই কাঠৰ দলং একেলগে পকী কৰাৰ ব্যৱস্থা কৰা হ’ব।”
আনহাতে, আজি মন্ত্ৰীগৰাকীয়ে ১১৭৯ কাঠৰ দলং এতিয়াও ৰাজ্যত আছে বুলি নিজে স্বীকাৰ কৰি লগতে কয় যে নাবাৰ্ডৰ ঋণেৰে প্ৰথম অৱস্থাত ২৮৯খন কাঠৰ দলং পকী কৰিব। বাকীবোৰো পৰ্য্যায়ক্ৰমে পকী কৰা হ’ব। ইয়াৰ বাবে মুঠ ১০৪৬ কোটি টকা নাবাৰ্ডৰ পৰা ঋণ লোৱা হৈছে।
আনহাতে, ৩২৪কোটি টকা ৰাজ্য চৰকাৰৰ স্ব-অগ্ৰাধিকাৰ পুঁজিৰ পৰা অনুমোদন জনাই অন্য ১০৮খন দলং পকীকৰণৰ সিদ্ধান্ত কৰা হৈছে বুলি সংবাদমেলত জানিবলৈ দিয়ে মন্ত্ৰীজনে।
আনহাতে, সেই একেখন সংবাদমেলতে গড়কাপ্তানী বিভাগৰ অন্য কিছু সংখ্যক আঁচনিৰ কথা সদৰী কৰে।
সংবাদমেলত মন্ত্ৰী শৰ্মাই কয়, “গড়কাপ্তানী বিভাগৰ উত্তৰণ আঁচনিৰ অধীনত নিৰ্দিষ্ট ৫০টা সমষ্টিৰ একোটাকৈ নিৰ্বাচিত বিশেষ পথ ১০ কোটি টকাকৈ খৰচৰেৰে নিৰ্মাণ কৰিবৰ বাবে অনুমোদন জনোৱা হৈছে। এইক্ষেত্ৰত ৪৯৯.৯৪ কোটি টকা ইতিমধ্যে অনুমোদন কৰা হৈছে।”
ইয়াৰোপৰি, ৰাজ্যৰ ৮০০খন চাহ-বাগিচাৰ অধীনৰ পথ নিৰ্মাণৰ বাবে প্ৰত্যেকখন বাগিচাৰ অধীনত ১ কোটি টকাকৈ পুঁজি ধাৰ্য্য কৰা হৈছে বুলি জানিবলৈ দি লগতে কয়, “আজিৰ দিনলৈকে ইতিমধ্যে ৬৩৬টা প্ৰজেক্টৰ বাবে ৫১৩ কোটি টকাত অনুমোদন জনোৱা হৈছে।”
আনহাতে, ৰাজ্যত ১৬২১ কিল’মিটাৰ নতুনকৈ ৰাস্তা নিৰ্মাণ কৰাৰ সিদ্ধান্ত গ্ৰহণ কৰিছে বুলি সংবাদমেলত সদৰী কৰি মন্ত্ৰীগৰাকীয়ে কয় “তাৰ বাবে ১৩২৭ কোটি টকাত ইতিমধ্যে অনুমোদন জনোৱা হৈছে।”
ইয়াৰোপৰি তেওঁ জনায় যে জহি-খহি যোৱা ৰাস্তাসমূহ মেৰামতি কৰাৰ বাবে ইতিমধ্যে ১৭০৬ কিল’মিটাৰ ৰাস্তা নিৰ্বাচন কৰা হৈছে। উক্ত ৰাস্তা মেৰামতিৰ বাবে ৰাজ্য চৰকাৰৰ পুঁজিৰ পৰা ১২৮৫ কোটি টকা অনুমোদন জনোৱা হৈছে বুলি তেওঁ কয়।
আনহাতে, গুৱাহাটীক বাদ কৰি ৰাজ্যৰ নগৰসমূহৰ পথসমূহ নিৰ্মাণ কৰিবৰ বাবে ৭৭২টা প্ৰজেক্ট হাতত লোৱা হৈছে, এই প্ৰজেক্টসমূহৰ বাবে অনুমোদন জনোৱা হৈছে ৩০৪ কোটি টকা।
ইয়াৰোপৰি, তেওঁ সংবাদমেলত জানিবলৈ দিয়া মতে কামৰূপ জিলাৰ চাৰিটা বিধান সভা সমষ্টিৰ বাবে ৫২৭টা প্ৰজেক্ট অনুমোদন কৰা হৈছে, এই প্ৰজেক্টসমূহত অনুমোদন জনোৱা হৈছে ৩৯৯ কোটি টকা।
দায়িত্বভাৰ গ্ৰহণ কৰাৰ পৰা আৰম্ভ কৰি বৰ্তমানলৈকে সৰ্বমুঠ ৫৬৮১ টা প্ৰজেক্টৰ লগতে ৫৭০০ কোটি টকাত ইতিমধ্যে গড়কপ্তানী বিভাগে অনুমোদন জনাইছে বুলি তেওঁ কয়। লগতে এই অনুমোদিত ধনৰ পৰিমাণ ৬২০০ কোটি টকালৈ বৃদ্ধি কৰা হ’ব বুলি তেওঁ সংবাদমেলত জনায়।
