মঙলবাৰে ৰাজস্থান ৰয়েলছ আৰু মুম্বাই ইণ্ডিয়ানছৰ মাজত অনুষ্ঠিত মেচখনত শ্ল’ অভাৰ ৰেটৰ বাবে ৰয়েলছৰ অধিনায়ক ষ্টিভ স্মিথক ১২ লাখ টকাৰ জৰিমনা বিহিছে।
ৰাজস্থানে ২০ অভাৰ শেষ কৰিবলৈ নিৰ্ধাৰিত সময়তকৈ অধিক সময় লৈছিল আৰু সেই বাবেই স্মিথক জৰিমনা বিহা হয়।
আই পি এল কৰ্তৃপক্ষই প্ৰেছ বিজ্ঞপ্তিৰ জৰিয়তে জানিবলৈ দি কয় যে চলিত আই পি এলত ৰাজস্থান ৰয়েলছৰ এয়া প্ৰথমটো ভুল। সেয়ে নিয়ম অনুসৰি নূন্যতম অভাৰ গতি উলংঘন কৰাৰ বাবে স্মিথক ১২ লাখ টকা জৰিমনা বিহা হৈছে।
ইয়াৰ উপৰি দলে যদি এই ভুল পুনৰ কৰে তেন্তে অধিনায়কক এখন বা দুখন মেচৰ পৰা নিলম্বন কৰিব।
উল্লেখ্য যে, ইয়াৰ পূৰ্বে ৰয়েল চেলেঞ্জাৰ্ছ বেংগালুৰুৰ অধিনায়ক বিৰাট কোহলী আৰু দিল্লী কেপিটেছৰ অধিনায়ক শ্ৰেয়াৰ আয়াৰকো শ্ল’ অভাৰ ৰেটৰ বাবে ১২ লাখ টকাৰ জৰিমনা বিহিছিল।
ইফালে, মঙলবাৰে আবু ধাবিত অনুষ্ঠিত হোৱা মেচখনত মুম্বাই ইণ্ডিয়ানছ দলে ৰাজস্থানক ৫৭ ৰান পৰাস্ত কৰে।
চলিত ছিজনত ৰাজস্থানৰ এয়া ক্ৰমাগত তৃতীয় পৰাজয়।
মেচৰ অন্তত স্মিথে কয়, ‘যোৱা তিনিখন মেচত আমাৰ আৰম্ভণি ভাল হোৱা নাই। আৰম্ভণিতে বাটলাৰ আৰু শেষত আৰ্চাৰৰ বাহিৰে আমি বহুত কাম কৰিব লগীয়া আছে’।
উল্লেখ্য যে ৰাজস্থানৰ ষ্টাৰ অলৰাউণ্ডাৰ বেন ষ্টোকছ অহা ১০ অক্টোবৰৰ পিছৰ পৰা উপলব্ধ হ’ব।