ধাৰাসাৰ বৰষুণ আৰু ধুমুহাৰ ফলত ত্ৰিপুৰাৰ খোৱাই জিলাৰ এশৰো অধিক জনজাতীয় পৰিয়ালৰ ঘৰ-দুৱাৰৰ বিস্তৰ ক্ষতি হোৱাৰ ফলত যোৱা দুদিন ধৰি উক্ত পৰিয়ালসমূহ চৰকাৰী বিদ্যালয়ৰ বাসগৃহত আশ্ৰয় লৈ থাকিব লগীয়া হৈছে।
জানিব পৰা মতে ক্ষতিগ্ৰস্ত পৰিয়াল সমূহে দুখাই জামাদাৰ পাৰা বেচিক স্কুল আৰু হৰিৰাম চৰ্দাৰ পাৰা ছিনিয়ৰ বেচিক স্কুলত আশ্ৰয় লৈ আছে। ধুমুহাৰ ফলত বেয়াকৈ ক্ষতিগ্ৰস্ত হৈছে তেলিয়ামুৰা মহকুমাৰ অধীনৰ কেইখনমান এ ডি চি গাঁও।
যোৱা কেইবাদিন ধৰি উত্তৰ-পূবৰ বিভিন্ন প্ৰান্তৰ লগতে ত্ৰিপুৰাত হোৱা অস্বাভাৱিক বৰষুণ আৰু সময়ে সময়ে অহা বতাহ-ধুমুহাৰ ফলত উক্ত অঞ্চলৰ অধিকাংশ পৰিয়ালৰে ঘৰ-দুৱাৰ ভাঙি যোৱাত সেই পৰিয়ালসমূহ এতিয়া আশ্ৰয় লৈ থাকিব লগীয়া হৈছে বিদ্যালয়ত।
আনহাতে ধুমুহাৰ ফলত খোৱা পানীৰ লগতে বিভিন্ন ঠাইত বৈদ্যুৎতিক সংযোগো বিচ্ছিন্ন হৈ পৰা পৰিলক্ষিত হৈছে।
বতাহ-ধুমুহাৰ ফলত গৃহহীন হৈ পৰা পৰিয়াল সমূহৰ খবৰ ল’বলৈ মঙলবাৰে উক্ত অঞ্চলত উপস্থিত হয় মুখ্য সচিব কুমাৰ আলোক। মুখ্য সচিবগৰাকীয়ে চৰকাৰৰ ফালৰ পৰা সকলো প্ৰকাৰৰ সহায়-সহযোগিতা প্ৰদান কৰা হ’ব বুলি আশ্বাস প্ৰদান কৰে।
জিলা প্ৰশাসনৰ তৰফৰ পৰাও উক্ত পৰিয়ালসমূহক খাদ্য, খোৱাপানী, স্বাস্থ্য পৰীক্ষাৰ লগতে লাগতিয়াল ঔষধ আদিৰ যোগান ধৰা বুলি জানিব পৰা গৈছে।
