ধুমুহা-বৰষুণৰ ফলত বঙাইগাঁও জিলাৰ নৰ্থ বইটামাৰী অঞ্চলত বিস্তৰ ক্ষয়-ক্ষতি হৈছে ।
অঞ্চলটোৰ ধলাগাঁৱত সাপ্তাহিক বজাৰ চলি থকাৰ সময়তে পুৱা ৯:৩০ মান বজাত এজোপা গছ ভাগি পৰে ।
বজাৰ চলি থকাৰ মাজতে এনেদৰে গছ এডাল ভাগি পৰাত লোকসকল আতংকিত হয় যদিও সৌভাগ্যক্ৰমে কোনো লোক হতাহত নহ’ল ।
গছ জোপা ভাগি এখন এল্ট’ ৮০০ বাহনৰ ওপৰত পৰে ।
ফলত এল্ট’ বাহনখনৰ বহু ক্ষতিসাধন হয় । বাহনখন ধলাগাঁৱৰে ৰতিকান্ত চৌধুৰী নামৰ লোক এজনৰ বুলি জানিব পৰা গৈছে ।
চাৰিচকীয়া বাহনখনৰ উপৰি উক্ত স্থানত থকা এখন বাইকৰো অলপ ক্ষতিসাধন হয় ।
গছৰ ডাল এখন দোকানঘৰৰ চালতো পৰে । ইফালে বৈদ্যুতিক তাঁৰো ছিগি যোৱাত অঞ্চলটোত বিদ্যুত যোগান ব্যাহত হৈ পৰে ।
বঙাইগাঁও চহৰৰ কন্যা মহাবিদ্যালয়ৰ চৌহদত থকা এডাল গছো পথৰ ওপৰত ভাঙি পৰে ৷
সেই সময়ত ই- ৰিক্সা এখনত বিদ্যালয়লৈ গৈ আছিল কণ কণ শিশু ৷
কথমপি ৰক্ষা পৰে সকলো ৷ পিচত এছ ডি আৰ এফ তথা আপদকালীন সেৱা বিভাগৰ দল উপস্থিত হৈ পথটো মুকলি কৰে ৷