প্ৰাক্তন প্ৰধানমন্ত্ৰী অটল বিহাৰী বাজপেয়ীৰ মন্ত্ৰী সভাৰ মন্ত্ৰী তথা বিজেপি নেতা স্বামী চিন্ময়ানন্দৰ বিৰুদ্ধে উত্থাপিত ধৰ্ষণৰ অভিযোগ প্ৰত্যাহাৰ কৰিছে নিৰ্যাতিত হোৱা বুলি দাবী কৰি অহা যুৱতী গৰাকীয়ে।
উল্লেখ্য যে বিগত বৰ্ষৰ আগষ্ট মাহত উত্তৰ প্ৰদেশৰ এগৰাকী আইনৰ ছাত্ৰীয়ে প্ৰাক্তন মন্ত্ৰী তথা বিজেপি নেতা চিন্ময়ানন্দৰ বিৰুদ্ধে ফেইচবুকৰ এক ভিডিঅ’ পোষ্টৰ যোগে ধৰ্ষণৰ অভিযোগ উত্থাপন কৰিছিল।
এই অভিযোগৰ পিছতে উত্তৰ প্ৰদেশৰ ৰাজনীতিত তুমুল চাঞ্চল্যৰ সৃষ্টি হৈছিল। কিন্তু শ্বাহজাহানপুৰৰ আইনৰ ছাত্ৰী গৰাকীয়ে এই অভিযোগ প্ৰত্যাহাৰ কৰাৰ পিছত বিৰোধীয়ে অভিযোগ তুলিছে যে প্ৰাক্তন কেন্দ্ৰীয় মন্ত্ৰী তথা বিজেপি নেতা গৰাকীৰ ভাবুকি তথা হেঁচাত এই অভিযোগ প্ৰত্যাহাৰ কৰিবলৈ বাধ্য হৈছে যুৱতীগৰাকীয়ে।
ইফালে এতিয়া উত্তৰ প্ৰদেশ চৰকাৰে যুৱতী গৰাকীৰ বিৰুদ্ধে আইনী ব্যৱস্থা লোৱা হ’ব বুলিও জানিবলৈ দিছে।
উল্লেখ্য যে মংগলবাৰে এলাহাবাদ উচ্চ ন্যায়ালয়ৰ নিৰ্দেশত লক্ষ্মৌৰ বিশেষ আদালতত প্ৰাক্তন কেন্দ্ৰীয় মন্ত্ৰী স্বামী চিন্ময়ানন্দৰ বিৰুদ্ধে উত্থাপিত উক্ত ধৰ্ষণৰ অভিযোগৰ শুনানি আছিল।
সেই শুনানিতে যুৱতী গৰাকীয়ে পূৰ্বৰ অভিযোগ প্ৰত্যাহাৰ কৰি প্ৰাক্তন মন্ত্ৰী গৰাকীৰ বিৰুদ্ধে তেওঁ যৌন নিৰ্যাতন আৰু ধৰ্ষণৰ অভিযোগ উত্থাপন কৰা নাই বুলি দাবী কৰে।
ইয়াৰ পিছতে চৰকাৰী অধিবক্তাই যুৱতীগৰাকীৰ বিৰুদ্ধে ভাৰতীয় দণ্ডবিধি আইনৰ ৩৪০ ধাৰাত এক গোচৰ ৰুজু কৰিছে।
উভয় পক্ষৰ যু্ক্তি শুনাৰ পিছত লক্ষ্মৌৰ বিশেষ আদালতৰ বিচাৰপতি পি কে ৰায়ে যুৱতী গৰাকীৰ বক্তব্য নথিভুক্ত কৰিবলৈ নিৰ্দেশ দিয়ে। ইয়াৰ একোটা কপি যুৱতী গৰাকীৰ লগতে স্বামী চিন্ময়ানন্দক অৰ্পণ কৰা হয়।
উল্লেখ্য যে বিগত বৰ্ষৰ আগষ্টত যুৱতী গৰাকীৰ লগতে পিতৃৰ অভিযোগৰ ভিত্তিত ২০ ছেপ্টম্বৰত অভিযুক্ত প্ৰাক্তন কেন্দ্ৰীয় মন্ত্ৰী স্বামী চিন্ময়ানন্দক আৰক্ষীয়ে গ্ৰেপ্তাৰ কৰাৰ পিছত আদালতে ন্যায়িক জিম্মালৈ প্ৰেৰণ কৰে। চলিত বৰ্ষৰ ফেব্ৰুৱাৰীত চিন্ময়ানন্দই জামিন লাভ কৰে।
বিৰোধীয়ে অভিযোগ উত্থাপন কৰিছে যে জেইলৰ পৰা উলাই অহাৰ পিছতে প্ৰাক্তন কেন্দ্ৰীয় মন্ত্ৰী গৰাকীয়ে যুৱতী গৰাকীক ভাবুকি প্ৰদান কৰি অভিযোগ প্ৰত্যাহাৰ কৰিবলৈ বাধ্য কৰাইছে।
