ৰাজ্যৰ শিক্ষা বিভাগ আৰু বিটিচি প্ৰশাসনে শিক্ষাৰ পৰিৱেশ উন্নীত হোৱা ফটা ঢোল কোবাই থকাৰ সময়তেই ওদালগুৰিৰ খৈৰাবাৰী শিক্ষা খণ্ডৰ অন্তৰ্গত ডিমাকুছিস্থিত শেখৰ শংকৰদেৱ মিশ্যন স্কুলৰ এটা নিঃস্ব ছবি সম্প্ৰতি পোহৰলৈ আহিছে।
উক্ত শিক্ষানুষ্ঠানৰ ছাত্ৰসকলে দীৰ্ঘ দিন ধৰি পৰ্যাপ্ত শিক্ষকৰ অভাৱত ভুগি আহিছে। আজি শিশু দিৱসৰ দিনা সেয়েহে নিজৰ অধিকাৰ বিচাৰি ছাত্ৰ-ছাত্ৰীৰ দল ৰাজপথলৈ ওলাই আহিছে।
উক্ত বিদ্যালয়খনত মধ্য ইংৰাজী আৰু হাইস্কুল শাখা দুটা ৰাজ্যৰ শিক্ষা বিভাগৰ নিৰ্দেশনা অনুসৰি একত্ৰিকৰণ কৰা হৈছে আৰু ইয়াৰে ১০ গৰাকী শিক্ষকৰ পদ খালী হৈ পৰি আছে। তাৰোপৰি অধিকাংশ শিক্ষকেই এতিয়া ৰাষ্ট্ৰীয় নাগৰিক পঞ্জী উন্নীতকৰণৰ কামত নিয়োজিত হৈ থাকিবলগীয়া হৈছে আৰু কেইগৰাকীমানক বি এড অধ্যয়ন কৰাৰ বাবে প্ৰেৰণ কৰা হৈছে।
শিশু দিৱসৰ দিনা ভাৰত উৎসৱমুখৰ হৈ থকাৰ সময়তে শেখৰ শংকৰদেৱ মিশ্যন স্কুলৰ শিক্ষাৰ্থীসকলে ৰাজপথলৈ ওলাই আহিবলগীয়া হৈছে। বিদ্যালয়খনৰ ছাত্ৰ একতা সভাই আজি শিশু দিৱস বৰ্জন কৰাৰ সিদ্ধান্ত গ্ৰহণ কৰিছে। শতাধিক ছাত্ৰ-ছাত্ৰীয়ে হাতত প্লেকাৰ্ড লৈ আৰু ‘আমাক শিক্ষক লাগে’ ‘শিক্ষা বিভাগ নিপাত যাওক’, ‘আমাৰ জীৱনক লৈ হেতালি নেখেলিব’ আদি ধ্বনি তুলি ৰাজপথ কঁপাই তোলে।
ডিমাকুছিৰ অন্তৰ্গত ওদালগুৰি-তামুলপুৰ পথেৰে প্ৰতিবাদী ছাত্ৰ-ছাত্ৰীসকৰ সমদলটো আগবাঢ়ি যায়।
শিক্ষক মকৰলৰ বেলিকা শিক্ষা বিভাগৰ আওকণীয়া মনোভাৱক ছাত্ৰ সংগঠনসমূহ আৰু সমাজৰ সচেতন মহলে তীব্ৰ গৰিহণা দিয়ে।