ৰাজ্য চৰকাৰে ২০১৯-২০ বৰ্ষত ঘোষণা কৰা শিক্ষাৰ্থীৰ লোণ প্ৰক্ৰিয়া পুনৰ আৰম্ভ কৰিছে।
জনতা ভৱনত সম্বোধন কৰা এক সংবাদমেলত মন্ত্ৰী হিমন্ত বিশ্ব শৰ্মাই জনাইছে এই কথা।
‘কোনোবাই যদি শিক্ষাৰ লোণ লয় তেতিয়াহ’লে তেওঁলোকে ৫০ হাজাৰ টকা ৰাজ সাহায্য লাভ কৰিব। ১৫৪৫ গৰাকী হিতাধিকাৰীয়ে ইতিমধ্যে লোণ লৈ এই সাহায্য পাইছে। যোৱাবছৰেই এই আঁচনি গ্ৰহণ কৰা হৈছিল যদিও কোভিদৰ কাৰণে এইবছৰ এই আঁচনি আৰম্ভ কৰা হোৱা নাছিলো।‘ মন্ত্ৰী হিমন্ত বিশ্ব শৰ্মাই এইদৰে কয়।
ইতিমধ্যে পূৰ্বে পূৰণ কৰা ৫৫৪৭ খন অনুমোদিত আবেদন ৰাজ্য চৰকাৰৰ হাতত আছে বুলি সদৰী কৰি হিমন্তই লগতে কয় ‘যিসকলে আগতে আবেদন কৰিব পৰা নাছিল তেওঁলোকে www.assamfinanceloans.in ত গৈ প্ৰ-পত্ৰ পূৰণ কৰিব পাৰিব। পূ্ৰ্বতে আবেদন নকৰাসকলেও ৫০ হাজাৰ টকাৰ ৰাজ সাহায্য লাভ কৰিব।‘
এইবছৰ বাজেটত এই আঁচনিৰ বাবদ ২৫ কোটি টকা ধায্য কৰা হৈছে বুলি মন্ত্ৰীয়ে জনায়।
মন্ত্ৰীয়ে জনোৱা অনুসৰি ৭ অক্টোবৰৰ পৰা ১০ অক্টোবৰৰ ভিতৰত এই পুঁজি মুকলি কৰি দিয়া হ’ব।
নতুনকৈ আবেদন কৰা সকলে ২০ চেপ্তেম্বৰৰ ভিতৰত এই ৱেবচাইটতলৈ গৈ আবেদন কৰিব লাগিব বুলি তেওঁ কয়।
ইপিনে, চাহ বাগিচাৰ শ্ৰমিকসকলৰ কাৰণে বিশেষ আঁচনি পুনৰ আৰম্ভ কৰা বুলি উল্লেখ কৰি হিমন্তই লগতে কয় ‘এইখন ২০১৭-১৮ বৰ্ষৰ চাহ বাগিচাৰ ধন পুৰস্কাৰ মেলা আঁচনি। ২০১৭-১৮ ত ৬ লাখ ৩৩ হাজাৰ ৪১১ চাহ শ্ৰমিকৰ একাউন্ট খোলা হৈছিল আৰু আঢ়ৈ হাজাৰ টকাকৈ জমা দিয়া হৈছিল।‘
‘২০১৮-১৯ চনত ৭,১৫,৯৭৯ লৈ বৃদ্ধি পাইছিল চাহ বাগিচাত একাউন্ট খোলা লোকৰ সংখ্যা, তেতিয়াও আঢ়ৈ হাজাৰ টকাকৈ পুনৰ জমা কৰা হৈছিল। ২০১৯-২০ চনত এই আঁচনিৰ কাম হোৱা নাছিল।‘ হিমন্তই এইদৰে কয়।
পুনৰ ২০২০-২১ বৰ্ষত ৩ হাজাৰ টকাকৈ বেংক একাউন্ট সমূহত জমা দিয়াৰ বাবে সিদ্ধান্ত গ্ৰহণ কৰা হৈছে বুলি তেওঁ জনায়।
তেওঁ আৰু কয় ‘এই বেংক একাউন্টৰ সংখ্যা ৭,১৫,৯৭৯ ৰ পৰা ৮ লাখলৈ বৃদ্ধি কৰি ১০০ শতাংশ চাহ শ্ৰমিকৰে বেংক একাউন্ট খোলাৰ দিহা কৰা হ’ব। এই বছৰ ধন পুৰস্কাৰ মেলা আঁচনিৰ বাবদ ২৫০ কোটি টকা ধায্য কৰা হৈছে।‘
চলিত বৰ্ষৰ ১৫ নবেম্বৰৰ ভিতৰত এই পুঁজি চাহ শ্ৰমিকৰ বেংকত জমা হ’ব বুলি তেওঁ সদৰী কৰে।
