কেৱল হাঁচিয়ালে অথবা কাহিলেই ক’ৰ’ণা ভাইৰাছ বিয়পি নপৰে।
মানুহৰ ছালৰ জৰিয়তেও সংক্ৰমিত হ’ব পাৰে মাৰাত্মক ক’ৰ’ণা ভাইৰাছ।
কোনো এজন লোকৰ চালত যদি ক’ৰ’ণা ভাইৰাছ লাগি থাকে তেন্তে সাধাৰণ উত্তাপত সেই ভাইৰাছৰ মৃত্যু নহয়।
পূৰ্বে একাংশ বিজ্ঞানীয়ে এই বুলি মন্তব্য কৰি আহিছিল যে মানুহৰ ছালত ক’ৰ’ণা ভাইৰাছ খুব বেছি সময় বাচি থাকিব নোৱাৰে।
কিন্তু জাপানৰ এদল বিজ্ঞানীয়ে শেহতীয়াকৈ প্ৰকাশ কৰা তথ্য অনুসৰি মানুহৰ ছালত ৯ ঘণ্টা পৰ্যন্ত ক’ৰ’ণা ভাইৰাছ সক্ৰিয় হৈ থাকে আৰু সেই ভাইৰাছ কিবা প্ৰকাৰে মানুহ এজনৰ দেহৰ ভিতৰলৈ গ’লে মানুহ জন নিশ্চিত ভাবে ক’ৰ’ণাত আক্ৰান্ত হ’ব।
ক্লিনিকেল ইনফেকছিয়াচ ডিজিজেজ জাৰ্নালত প্ৰকাশিত তথ্য অনুসৰি জীৱন্ত অৱস্থাত মানুহৰ ছালত ক’ৰ’ণা ভাইৰাছ ৯ ঘণ্টালৈ সক্ৰিয় হৈ থকাৰ লগতে মৃতদেহৰ ছালতো একে সময়ৰ বাবেই ক’ৰ’ণা সক্ৰিয় হৈ থাকে।
বিজ্ঞানীৰ দলটোৱে সেয়ে সঘনাই হাত ধোৱাৰ অভ্যাস কেতিয়াও বাদ দিব নালাগে বুলি মন্তব্য কৰিছে।
উল্লেখ্য আমি দৈনন্দিন জীৱনত ব্যৱহাৰ কৰি থকা বিভিন্ন সামগ্ৰীতো পূৰ্বে ভবাতকৈও বহু বেছি দিন ক’ৰ’ণা ভাইৰাছ সক্ৰিয় অৱস্থাত থাকে।
ক’ৰ’ণা ভাইৰাছ আমি নিতৌ ব্যৱহাৰ কৰি থকা কাগজৰ নোট, মোবাইল ফোন, ষ্টেইনলেছ ষ্টীলৰ সামগ্ৰী আদিত কমেও ২৮ দিন সক্ৰিয় হৈ থাকে।
অষ্ট্ৰেলিয়াৰ নেছনেল ছায়েন্স এজেঞ্চিয়ে প্ৰকাশ কৰা তথ্য অনুসৰি ক’ৰ’ণা ভাইৰাছ কেৱল এই ভাইৰাছত আক্ৰান্ত ৰোগীয়ে কাহিলে অথবা হাচিয়ালেই বিয়পি নপৰে, আমি ব্যৱহাৰ কৰি থকা আন বহু সামগ্ৰীৰ পৰাও এই ভাইৰাছ বিয়পি পৰিব পাৰে।
আমেৰিকাৰ চেণ্টাৰ ফৰ ডিজিজ কণ্ট্ৰলেও অষ্ট্ৰেলিয়াৰ বিজ্ঞানীৰ দলটোৰ সুৰতে সুৰ মিলাই কৈছে যে দৈনন্দিন ব্যৱহৃত প্লাষ্টিক, গ্লাছ আদি সামগ্ৰীৰ দ্বাৰাও ক’ৰ’ণা ভাইৰাছ বিয়পি পৰিব পাৰে।
