অসমৰ তিনিচুকীয়া জিলাৰ মাৰ্ঘেৰিটাৰ এগৰাকী বিশেষভাৱে সক্ষম যুৱতী সুজাতা বৰাৰ দীৰ্ঘদিনীয়া সংগ্ৰামৰ অন্তত আজি উচ্চতম ন্যায়ালয়ে এক ঐতিহাসিক ৰায় প্ৰদান কৰে। ক’ল ইণ্ডিয়া লিমিটেডত চাকৰিৰ বাবে আবেদন কৰি কেৱল শাৰীৰিক প্ৰতিবন্ধকতাৰ বাবে নিযুক্তিৰ পৰা বঞ্চিত হোৱা সুজাতাৰ পক্ষত থিয় দি সৰ্বোচ্চ ন্যায়ালয়ে তেওঁক নিযুক্তি দিবলৈ কৰ্তৃপক্ষক নিৰ্দেশ দিছে।
ন্যায়াধীশ জে বি পাৰ্দিৱালা আৰু ন্যায়াধীশ কে ভি বিশ্বনাথনৰ বিচাৰপীঠে এই গোচৰৰ শুনানি গ্ৰহণ কৰি কয় যে দিব্যাংগ ব্যক্তিসকলৰ অন্তৰ্ভুক্তি কেৱল আইনী বাধ্যবাধকতা নহয়, বৰঞ্চ ই এক মানৱীয় আৰু সামাজিক দায়িত্ব। আদালতে উল্লেখ কৰে যে আন্তঃৰাষ্ট্ৰীয় মানৱ অধিকাৰ বিধেয়ক আৰু আন্তঃৰাষ্ট্ৰীয় শ্ৰমিক সংস্থাৰ মৌলিক নীতিসমূহ এনে ক্ষেত্ৰত সম্পূৰ্ণৰূপে প্ৰযোজ্য। বিশেষকৈ খিলঞ্জীয়া জনগোষ্ঠী, মহিলা আৰু বিশেষভাৱে সক্ষম ব্যক্তিসকলৰ অধিকাৰ সুৰক্ষিত কৰাৰ ওপৰত আদালতে গুৰুত্ব আৰোপ কৰে।
ৰায়দানৰ সময়ত ন্যায়াধীশ পাৰ্দিৱালাই কয় যে ব্যৱসায়িক প্ৰতিষ্ঠানসমূহে দিব্যাংগ ব্যক্তিসকলৰ অন্তৰ্ভক্তিক কেৱল এটা নিয়ম পালনৰ বিষয় হিচাপে চাব নালাগে। বৰঞ্চ ইয়াক ব্যৱসায়িক প্ৰদৰ্শন আৰু স্থিৰতা বৃদ্ধি কৰাৰ এক কৌশলগত সুবিধা হিচাপে গ্ৰহণ কৰিব লাগে। সুজাতা বৰাই ২০১৬ চনতে ক’ল ইণ্ডিয়াৰ মেনেজমেন্ট ট্ৰেইনী পদৰ সাক্ষাৎকাৰত উত্তীৰ্ণ হৈছিল যদিও তেওঁৰ একাধিক শাৰীৰিক প্ৰতিবন্ধকতা থকাৰ অজুহাতত কৰ্তৃপক্ষই তেওঁক নিযুক্তি দিবলৈ অস্বীকাৰ কৰিছিল।
আদালতে স্পষ্টকৈ কয় যে বিজ্ঞাপনত একাধিক প্ৰতিবন্ধকতাৰ উল্লেখ নাছিল বাবে সুজাতাই দৃষ্টিহীন প্ৰাৰ্থী হিচাপে আবেদন কৰিছিল। কিন্তু তেওঁৰ অৰ্হতা থকাৰ পাছতো কেৱল শাৰীৰিক কাৰণত বঞ্চিত কৰাটো অন্যায়। সেয়েহে আদালতে সংবিধানৰ ১৪২ নং অনুচ্ছেদৰ অধীনত থকা বিশেষ ক্ষমতা প্ৰয়োগ কৰি ক’ল ইণ্ডিয়াৰ অধ্যক্ষক সুজাতাৰ বাবে এক বিশেষ পদ সৃষ্টি কৰিবলৈ নিৰ্দেশ দিয়ে।
উচ্চতম ন্যায়ালয়ে নিৰ্দেশ দিছে যে সুজাতা বৰাক তেওঁৰ অৰ্হতা অনুসৰি উপযুক্ত ডেস্ক জব প্ৰদান কৰিব লাগিব। লগতে ২০১৬ চনৰ বিশেষভাৱে সক্ষম ব্যক্তিৰ অধিকাৰ আইন অনুসৰি তেওঁক কামৰ বাবে সুকীয়া কম্পিউটাৰ আৰু কিবৰ্ডৰ দৰে প্ৰয়োজনীয় সা-সুবিধা দিবলৈ ক’ল ইণ্ডিয়া কৰ্তৃপক্ষক কোৱা হৈছে। এই নিযুক্তি তিনিচুকীয়া জিলাৰ মাৰ্ঘেৰিটাত থকা নৰ্থ ইষ্টাৰ্ণ ক’ল ফিল্ডছৰ কাৰ্যালয়তে হ’ব বুলিও আদালতে জানিবলৈ দিয়ে।
ৰায়দানৰ শেষত ন্যায়াধীশ পাৰ্দিৱালাই সুজাতা বৰাক ভৱিষ্যতৰ বাবে শুভকামনা জনায় আৰু তেওঁৰ কৰ্মৰে দেশক গৌৰৱান্বিত কৰিবলৈ আহ্বান জনায়। আদালতে এইটোও স্পষ্ট কৰে যে এই নিৰ্দেশ কেৱল সুজাতা বৰাৰ গোচৰৰ বিশেষ পৰিস্থিতিক লক্ষ্য কৰিহে দিয়া হৈছে আৰু ইয়াক ভৱিষ্যতৰ আন গোচৰৰ বাবে নজিৰ হিচাপে ব্যৱহাৰ কৰিব নোৱাৰিব। এই ৰায়ৰ জৰিয়তে অসমৰ যুৱতীগৰাকীয়ে দীৰ্ঘদিনৰ মূৰত ন্যায় লাভ কৰিবলৈ সক্ষম হ’ল।
