অসমৰ মুখ্যমন্ত্ৰী হিচাপে ড° হিমন্ত বিশ্ব শৰ্মাই শপত গ্ৰহণ কৰাৰ দিনাই তেওঁলৈ এখন বিশেষ মুকলি চিঠি প্ৰেৰণ কৰিছে সুজাতা গুৰুং চৌধুৰীয়ে। নিৰ্বাচনৰ সময়ত মুখ্যমন্ত্ৰীগৰাকীয়ে তেওঁৰ বিৰুদ্ধে কৰা বিভিন্ন বিতৰ্কিত মন্তব্য আৰু অভিযোগৰ প্ৰত্যুত্তৰ দি তেওঁ এই পত্ৰখন লিখিছে। এইবাৰৰ বিধানসভা নিৰ্বাচনত বিৰোধী মিত্ৰজোঁটৰ প্ৰাৰ্থী কুঙ্কী চৌধুৰীৰ মাতৃ সুজাতা গুৰুং চৌধুৰীয়ে মুখ্যমন্ত্ৰীৰ বিৰুদ্ধে তেওঁৰ চৰিত্ৰ হনন কৰাৰ গুৰুতৰ অভিযোগ উত্থাপন কৰিছে। তেওঁ উল্লেখ কৰিছে যে নিৰ্বাচনী প্ৰচাৰৰ সময়ত কোনো প্ৰমাণ নোহোৱাকৈয়ে তেওঁক গো-মাংস ভক্ষণ কৰা লোক, অ-সনাতনী আৰু ভাৰত বিৰোধী কমিউনিষ্ট আখ্যা দিয়া হৈছিল, যাৰ ফলত তেওঁৰ ব্যক্তিগত জীৱনত যথেষ্ট প্ৰভাৱ পৰিছে।
পত্ৰখনত তেওঁ বিশেষকৈ ডেনভাৰৰ এটা সংগ্ৰহালয়ত তোলা এটা ফটোৰ প্ৰসংগ উত্থাপন কৰিছে। মুখ্যমন্ত্ৰীয়ে সেই ফটোখনক লৈ কৰা মন্তব্যক মিছা বুলি অভিহিত কৰি তেওঁ কয় যে সংগ্ৰহালয়টোৰ স্বত্বাধিকাৰীয়ে ইতিমধ্যে এই সন্দৰ্ভত স্পষ্টীকৰণ দিছে। এগৰাকী সাধাৰণ নাগৰিকৰ বাবে এনে ধৰণৰ অপপ্ৰচাৰে কেনেদৰে বিপদ মাতি আনিব পাৰে, সেই কথা তেওঁ অতি দুখেৰে প্ৰকাশ কৰিছে। আনকি তেওঁৰ নাবালক সন্তানৰ ফটো ৰাজহুৱা কৰাৰ ফলত তেওঁলোকৰ জীৱনলৈয়ো ভাবুকি আহিছে বুলি তেওঁ চিঠিখত উল্লেখ কৰিছে। তেওঁৰ খাদ্য পৰম্পৰা বা ব্যক্তিগত বিচাৰধাৰাক লৈ সমাজত যি ধৰণৰ কটু মন্তব্যৰ সৃষ্টি কৰা হ’ল, তাৰ বাবে তেওঁ মুখ্যমন্ত্ৰীক পোনপটীয়াভাৱে জগৰীয়া কৰিছে।
নিজৰ বৌদ্ধিক আৰু ৰাজনৈতিক বিচাৰধাৰাৰ সম্পৰ্কতো তেওঁ মুখ খুলিছে। তেওঁৰ ব্যক্তিগত পুথিভঁৰালত থকা হাজাৰ হাজাৰ কিতাপ পঢ়াটোৱে তেওঁক দেশবিৰোধী কৰি নুতুলে বুলি তেওঁ স্পষ্ট কৰি দিয়ে। কমিউনিষ্ট বিচাৰধাৰাক লৈ কৰা মন্তব্যৰ উত্তৰত তেওঁ কয় যে বয়সৰ লগে লগে মানুহৰ চিন্তা-চৰ্চা সলনি হয় আৰু বৰ্তমান তেওঁৰ বয়স ৫৬ বছৰ। তেওঁ নিজকে এজন জন্মসূত্ৰে আৰু সংস্কৃতিগতভাৱে হিন্দু বুলি চিনাকি দিছে, যি ধৰ্মক ৰাজনীতিৰ বাবে ব্যৱহাৰ নকৰে। তেওঁ কয় যে গণতন্ত্ৰত সকলোৰে নিজৰ খাদ্য, ধৰ্ম আৰু আদৰ্শ বাছনি কৰাৰ অধিকাৰ আছে।
অৱশেষত তেওঁ মুখ্যমন্ত্ৰীক উদ্দেশ্যি কয় যে নিৰ্বাচন শেষ হৈছে আৰু এতিয়া তেওঁ সমগ্ৰ ৰাজ্যৰে মুখ্যমন্ত্ৰী। গতিকে এগৰাকী নিৰ্বাচিত প্ৰতিনিধি হিচাপে তেওঁ জনসাধাৰণৰ ওচৰত জবাবদিহি হ’ব লাগে। সুজাতা গুৰুং চৌধুৰীয়ে এই পত্ৰৰ জৰিয়তে মুখ্যমন্ত্ৰীৰ পৰা এক ৰাজহুৱা ক্ষমা প্ৰাৰ্থনা দাবী কৰিছে। ইয়াৰ উপৰিও তেওঁ মানহানিৰ গোচৰ তৰাৰ কথা উল্লেখ কৰিছে, য’ত ক্ষতিপূৰণ হিচাপে তেওঁ মাত্ৰ ১ টকা দাবী কৰিছে। এই সাহসী চিঠিখন এতিয়া ছচিয়েল মিডিয়াত যথেষ্ট চৰ্চিত হৈছে।
