মহাৰাষ্ট্ৰৰ নন্দেডৰ মাতা চাহাব গুৰুদ্বাৰাৰ সমীপত আজি (বৃহস্পতিবাৰে) পঞ্জাৱৰ প্ৰাক্তন উপ-মুখ্যমন্ত্ৰী তথা শিৰোমণি আকালি দলৰ মুৰব্বী সুখবীৰ সিং বাদলক আক্ৰমণৰ ঘটনা সংঘটিত হয়। সূত্ৰ অনুসৰি তেওঁক চোকা অস্ত্ৰৰে আক্ৰমণ কৰা হয়। ততাতৈয়াকৈ তেওঁক স্থানীয় চিকিৎসালয়লৈ প্ৰেৰণ কৰা হৈছে। এই ঘটনাত এজন লোককো আটক কৰিছে আৰক্ষীয়ে।
সূত্ৰসমূহৰ পৰা জানিব পৰা মতে, বাদল হাতত আঘাতপ্ৰাপ্ত হৈছে। অৱশ্যে এয়া প্ৰথমবাৰৰ বাবে নহয়। ইয়াৰ পূৰ্বে ২০২৪ চনত অমৃতসৰৰ স্বৰ্ণ মন্দিৰৰ বাহিৰত তেওঁক আক্ৰমণ কৰা হৈছিল।
পঞ্জাৱৰ প্ৰাক্তন উপ-মুখ্যমন্ত্ৰী তথা প্ৰাক্তন কেন্দ্ৰীয় ৰাজ্যিক মন্ত্ৰী বাদলে মাতা চাহাব গুৰুদ্বাৰা পৰিদৰ্শন কৰিবলৈ নন্দেডত উপস্থিত হোৱাৰ সময়তে এই আক্ৰমণ সংঘটিত হয়। এটা ভিডিঅ’ দেখা গৈছে য’ত ৬৪ বছৰীয়া ব্যক্তিজনক বাওঁহাতখন ঢাকি চিকিৎসালয়লৈ লৈ যোৱা হৈছে।
বাদলৰ বাহিৰেও তেওঁৰ নিৰাপত্তাৰক্ষীৰ দায়িত্বত থকা পৰিদৰ্শক সন্তোষ কেন্দ্ৰে নামৰ এজন নিৰাপত্তাৰক্ষীও এই আক্ৰমণত আহত হয়। অৱশ্যে নিৰাপত্তাৰক্ষীৰ আঘাত সন্দৰ্ভত কোনো সবিশেষ জানিব পৰা হোৱা নাই।
আক্ৰমণকাৰী কোন আছিল সেয়া স্পষ্ট হোৱা নাই যদিও তেওঁক আৰক্ষীয়ে গ্ৰেপ্তাৰ কৰিছে। এই সন্দৰ্ভত অধিক সবিশেষ তদন্তৰ অন্তত আৰক্ষীয়ে প্ৰকাশ কৰিব।
উল্লেখ্য যে প্ৰায় দুবছৰৰ ভিতৰত পঞ্জাৱৰ প্ৰাক্তন উপ-মুখ্যমন্ত্ৰীৰ ওপৰত এইটো দ্বিতীয়টো আক্ৰমণ। ২০২৪ চনৰ ডিচেম্বৰ মাহত বাদল অমৃতসৰৰ স্বৰ্ণমন্দিৰৰ প্ৰৱেশদ্বাৰত আছিল। আক্ৰমণকাৰীজনক ডেৰাবাবাৰ বাসিন্দা আৰু দল খালছাৰ সদস্য নাৰায়ণ সিং চুৱাৰা বুলি চিনাক্ত কৰা হৈছিল।
২০১৩ চনত তেওঁক অবৈধ কাৰ্যকলাপ (প্ৰতিৰোধ) আইন (ইউএপিএ)ৰ অধীনত গ্ৰেপ্তাৰ কৰা হৈছিল।
২০০৭ চনত গুৰু গ্ৰন্থ চাহাবৰ অপৱিত্ৰকৰণত ডেৰা সচা সৌদাৰ মুৰব্বী গুৰমীত ৰাম ৰহিমক সমৰ্থন কৰাৰ বাবে দোষী সাব্যস্ত কৰি অকল তখতে বাদলক শাস্তি ‘টানখাহ’ ঘোষণা কৰাৰ পিছতে এই আক্ৰমণ সংঘটিত হৈছিল।
ইপিনে, দিল্লীত প্ৰধানমন্ত্ৰী নৰেন্দ্ৰ মোডীক সাক্ষাৎ কৰাৰ কিছুদিন পিছতে বাদলৰ ওপৰত এই আক্ৰমণ সংঘটিত হৈছে। অহা বছৰ পঞ্জাৱ বিধানসভা নিৰ্বাচনৰ বাবে ভাৰতীয় জনতা পাৰ্টিৰ সৈতে পুনৰ আকালি দলে হাত মিলাব পাৰে বুলি জল্পনা-কল্পনাৰ আৰম্ভ হৈছে। যোৱা সপ্তাহত সংসদ ভৱন চৌহদত থকা প্ৰধানমন্ত্ৰী মোডীৰ কাৰ্যালয়ত অনুষ্ঠিত হৈছিল এই বৈঠক।
বৈঠকৰ এদিন পিছতে বাদলৰ দলটোৱে মহিলা সংৰক্ষণ বিধেয়ক আৰু সমষ্টি সীমা নিৰ্ধাৰণ বিধেয়ক শীঘ্ৰে কাৰ্যকৰী কৰাৰ দাবী জনাইছিল।
