৩৮ বৰ্ষীয় এক ‘তৰুণ’; সেউজ ঘাঁহনিৰ বৰ্গাকাৰ জগতখনত ৩৮ মানেই যেন প্ৰাচীন! কিন্তু কথিত এই ধাৰণা ভাঙি বয়সক মাথোন এক সংখ্যা ৰূপত পতীয়মান কৰি এতিয়াও অদম্য ৰূপত ‘ব্লু টাইগাৰ্ছ’ৰ ধ্বজা বহন কৰি আছে এই ৩৮ বৰ্ষীয় ‘তৰুণ’ সুনীল ছেত্ৰীয়ে।
ছেত্ৰীৰ দুৰন্ত প্ৰদৰ্শনৰ সুবাদতে যোৱা নিশা ভাৰতীয় ফুটবল দলে পাকিস্তানক ৪-০ গ’লত পৰাস্ত কৰি ছাফ চেম্পিয়নশ্বিপত প্ৰত্যাশিত আৰম্ভণি ঘটায়। গত দেওবাৰে ইণ্টাৰকণ্টিনেণ্টেল কাপৰ খিতাপ জয়েৰে আত্মবিশ্বাসী ভাৰতে কালি পাকিস্তানক প্ৰায় বিধস্ত কৰি তোলে।
ভাৰতৰ এই জয়ত মুখ্য ভূমিকা লয় অধিনায়ক সুনীল ছেত্ৰীয়ে। দুৰ্দান্ত হেট্ৰিকেৰে ছেত্ৰীয়ে ভাৰতৰ বিজয় নিশ্চিত কৰাৰ লগতে দলৰ হৈ চতুৰ্থটো গল স্ক’ৰ কৰে উদান্ত সিঙে। খেলৰ দহ মিনিটতে পাকিস্তানী গলৰক্ষক ছাকিব হানিফৰ এক ভুলৰ সুযোগ লৈ ছেত্ৰীয়ে ভাৰতক প্ৰথমটো গলৰ সোৱাদ দিয়ে।
ইয়াৰ কিছু সময় পিছতে ১৬ মিনিটত এটা পেনাল্টিৰ সুযোগ কাৰ্যকৰী কৰি ভাৰতক ২-০ ৰ অগ্ৰগতি দিয়ে ছেত্ৰীয়ে। অৱশ্যে ইয়াৰ পিছত দুয়োটা দলে গল স্ক’ৰৰ কেইবাটাও সুযোগ নষ্ট কৰাৰ ফলস্বৰূপে ২-০ ব্যৱধানতে মেচখনৰ প্ৰথমাৰ্ধ অন্ত পৰে।
ইফালে প্ৰথমাৰ্ধ অন্ত পৰিবলৈ কিছু সময় থকা অৱস্থাতে বিধিনিষিদ্ধ আচৰণৰ বাবে ৰেড কাৰ্ডৰ সন্মুখীন হ’বলগীয়া হয় ভাৰতৰ প্ৰশিক্ষক ইগৰ ষ্টিমাক। পাক খেলুৱৈক এক থ্ৰ’ লোৱাৰ সময়ত বাধা দিয়াৰ বাবে ষ্টিমাকক ৰেড কাৰ্ড দেখুওৱায় ৰেফাৰীয়ে।
ষ্টিমাকৰ এই আচৰণৰ পিছত খেলপথাৰত কিছু সময় ধৰি এক উত্তেজনাপূৰ্ণ মুহূৰ্তৰো সৃষ্টি হয়। অৱশ্যে দুই দলৰ অধিনায়কৰ প্ৰচেষ্টাত এই অনাহক পৰিস্থিতিৰ শাম কাটে।
আনহাতে দ্বিতীয়াৰ্ধৰ ৭৪ মিনিটত আন এক পেনাল্টি কাৰ্যকৰী কৰি হেট্ৰিক সম্পূৰ্ণ কৰাৰ লগতে দলক ৩-০ ৰ অগ্ৰগতি দিয়ে ছেত্ৰীয়ে। এই গলৰ ৭ মিনিট পিছতে আনৱাৰ আলীৰ এক দৰ্শনীয় পাছক গললৈ ৰূপান্তৰ কৰি ভাৰতৰ বিজয় নিশ্চিত কৰে উদান্ত সিঙে।
উল্লেখ্য যে, ভাৰত আৰু পাকিস্তান আজিৰ পূৰ্বে ২০১৮ চনৰ ছেপ্টেম্বৰত অন্তিমবাৰৰ বাবে মুখামুখি হৈছিল। ছাফ টুৰ্ণামেণ্টৰে উক্ত ছেমিফাইনেল মেচখনতো ভাৰত ৩-১ গলৰ ব্যৱধানত জয়লাভ কৰিছিল।
কালিৰ জয়ৰ পিছত ডিফেণ্ডিং চেম্পিয়ন ভাৰতে খিতাপ অক্ষুণ্ণ ৰখাৰ লক্ষ্যৰে অহা ২৪ জুনত নেপালৰ বিৰুদ্ধে আৰু ২৭ জুনত কুৱেইটৰ বিৰুদ্ধে অৱতীৰ্ণ হ’ব। ইফালে পাকিস্তানে আজিৰ খেলৰ পিছত ২৪ জুনত কুৱেইট আৰু ২৭ জুনত নেপালৰ বিৰুদ্ধে খেলিব।
