‘আমফান’ সামুদ্ৰিক ধুমুহাই উত্তৰ-পূবৰ অসম, মেঘালয় আৰু ছিকিমত ২১ মে’ত প্ৰৱেশ কৰাৰ সম্ভাৱনা আছে বুলি ভাৰতীয় বতৰ বিজ্ঞান বিভাগে বৃহস্পতিবাৰে প্ৰকাশ কৰিছে।
ভাৰতীয় বতৰ বিজ্ঞান বিভাগে সামুদ্ৰিক ধুমুহা আমফানে পশ্চিমবংগৰ উপকূলেৰে ঘণ্টাত ১৪ কিলোমিটাৰ বেগেৰে উত্তৰ-পূব অভিমুখে গতি কৰিব বুলি জানিবলৈ দিছে।
বংগোপসাগৰত সৃষ্টি হোৱা সামুদ্ৰিক ধুমুহা আমফানৰ আগমনক লৈ ইতিমধ্যে ওড়িশা আৰু পশ্চিম বংগত সতৰ্কতা জাৰি কৰা হৈছে।
‘‘আমফানে সামুদ্ৰিক ধুমুহাই পশ্চিমবংগৰ দিঘা আৰু বাংলাদেশৰ উপকূলেৰে উত্তৰ-পূব অভিমুখে গতি কৰাৰ সম্ভাৱনা আছে,’’ বতৰ বিজ্ঞান কেন্দ্ৰৰ জাননীত উল্লেখ।
আনহাতে, আমফান সামুদ্ৰিক ধুমুহাৰ প্ৰভাৱৰ ফলত উত্তৰ-পূবত বিশেষকৈ ছিকিম, মেঘালয় আৰু অসমৰ হিমালয়ৰ পাদদেশৰ অঞ্চল সমূহত ধুমুহাৰ লগতে প্ৰচুৰ বৃষ্টিপাত হোৱাৰ সম্ভাৱনা আছে।
উল্লেখযোগ্য যে, ওড়িশা আৰু পশ্চিমবংগত আমফানৰ প্ৰভাৱ সৰ্বাধিক হোৱাৰ সম্ভাৱনা আছে।
ভাৰতৰ এই দুয়োখন ৰাজ্যৰ লগতে বাংলাদেশতো আমফানৰ প্ৰভাৱ পৰিব।
ইতিমধ্যে, আমফানৰ আগমনৰ পূৰ্বে ওড়িশা, পশ্চিমবংগ আৰু বাংলাদেশৰ সমুদ্ৰ তীৰ অঞ্চলৰ পৰা হাজাৰ হাজাৰ মানুহক নিৰাপদ দূৰত্বলৈ লৈ যোৱা হৈছে।
বিগত বৰ্ষতো ওড়িশাত ফেনী সামুদ্ৰিক ধুমুহাই প্ৰচুৰ ক্ষতি সাধন কৰিছিল।
