জম্মু-কাশ্মীৰ প্ৰশাসনত সন্ত্ৰাসবাদীৰ সমৰ্থকৰ বিৰুদ্ধে চৰকাৰে এক কঠোৰ পদক্ষেপ গ্ৰহণ কৰিছে। ৰাজ্যখনৰ উপ-ৰাজ্যপাল মনোজ সিনহাই দেশৰ নিৰাপত্তা বিঘ্নিত কৰাৰ অভিযোগত পাঁচজন চৰকাৰী কৰ্মচাৰীক চাকৰিৰ পৰা বৰ্খাস্ত কৰিছে। অভিযোগ অনুসৰি এই লোকসকলে চৰকাৰী বিভাগত কৰ্মৰত হৈ থাকিও গোপনে সন্ত্ৰাসবাদী সংগঠনৰ সৈতে যোগাযোগ ৰাখিছিল আৰু ৰাষ্ট্ৰীয় নিৰাপত্তাৰ বাবে ভাবুকি হৈ পৰিছিল। সূত্ৰই প্ৰকাশ কৰা মতে ২০২১ চনৰ পৰা এতিয়ালৈকে এনে দেশবিৰোধী কাৰ্যত লিপ্ত থকাৰ বাবে কাশ্মীৰত মুঠ ৮৫ জন চৰকাৰী কৰ্মচাৰীক চাকৰিৰ পৰা অপসাৰণ কৰা হৈছে।
এইবাৰ চাকৰি হেৰুওৱা লোককেইজন হ’ল মহম্মদ ইছফাক, তাৰিক আহমেদ শ্বাহ, বছিৰ আহমেদ মিৰ, ফাৰুক আহমেদ ভাট আৰু মহম্মদ ইউছুফ। তেওঁলোকৰ মাজত শিক্ষকৰ পৰা আৰম্ভ কৰি বন বিভাগৰ কৰ্মচাৰী আৰু ড্ৰাইভাৰলৈকে বিভিন্ন পদত কৰ্মৰত লোক আছে। জানিব পৰা মতে মহম্মদ ইছফাক পেছাত এজন শিক্ষক আছিল যদিও তেওঁ পাকিস্তানৰ উগ্ৰপন্থী সংগঠন লস্কৰ-ই-তৈবাৰ বাবে কাম কৰিছিল। ২০২২ চনত তেওঁ এজন আৰক্ষী বিষয়াক হত্যাৰ পৰিকল্পনা কৰিছিল যদিও সফলতা লাভ কৰাৰ পূৰ্বেই তেওঁ আৰক্ষীৰ হাতত ধৰা পৰে। ইছফাকৰ বিৰুদ্ধে অঞ্চলটোৰ যুৱক-যুৱতীসকলক জেহাদৰ নামত উচতনি দিয়াৰো গুৰুতৰ অভিযোগ আছে।
একেদৰে স্বাস্থ্য বিভাগৰ লেব টেকনিচিয়ান হিচাপে কৰ্মৰত তাৰিক আহমেদ শ্বাহৰ সম্পৰ্ক আছিল কুখ্যাত উগ্ৰপন্থী সংগঠন হিজবুল মুজাহিদীনৰ সৈতে। অতি কম বয়সৰ পৰাই সন্ত্ৰাসবাদৰ প্ৰতি আকৰ্ষিত হোৱা তাৰিকে দীৰ্ঘদিন ধৰি গোপনে এই কাৰ্য চলাই গৈছিল। আনহাতে বন বিভাগৰ কৰ্মচাৰী ফাৰুক, সহকাৰী লাইনমেন বছিৰ আৰু ড্ৰাইভাৰ ইউছুফৰ বিৰুদ্ধেও পাকিস্তানৰ উগ্ৰপন্থী সংগঠনৰ সৈতে প্ৰত্যক্ষ সম্পৰ্ক থকাৰ প্ৰমাণ পোৱা গৈছে। তদন্তৰ অন্তত তেওঁলোকৰ এই দেশবিৰোধী স্থিতি স্পষ্ট হোৱাৰ পাছতে প্ৰশাসনে এই কঠোৰ সিদ্ধান্ত গ্ৰহণ কৰে।
