ইজৰাইলী স্পাইৱেৰ ব্যৱহাৰ কৰি ৰাজনীতিবিদ, সাংবাদিক, বিচাৰক আৰু চৰকাৰী বিষয়াসকলৰ ওপৰত চকু ৰখা পেগাচাছ কাণ্ডৰ তদন্ত কৰিবলৈ নিযুক্ত বিশেষজ্ঞ সমিতিয়ে তদন্ত সম্পূৰ্ণ কৰিবলৈ অধিক সময় বিচাৰিছে।
সূত্ৰসমূহে জানিবলৈ দিয়ে যে ন্যায়াধীশ (অৱসৰপ্ৰাপ্ত) ৰবীন্দ্ৰনৰ নেতৃত্বত গঠিত পেনেলে ইতিমধ্যে উচ্চতম ন্যায়ালয়ত ইয়াৰ অন্তৱৰ্তীকালীন প্ৰতিবেদন দাখিল কৰিছে আৰু সেয়া ২৩ ফেব্ৰুৱাৰীত বিবেচনা কৰি চোৱাৰ সম্ভাৱনা আছে।
উচ্চতম ন্যায়ালয়ে যোৱা বছৰ অক্টোবৰত এক বৃহৎ ৰাজনৈতিক বিতৰ্কৰ মাজতে সমিতিখন গঠন কৰি দি কৈছিল যে প্ৰতিবাৰে ৰাষ্ট্ৰীয় নিৰাপত্তা উত্থাপন কৰাৰ সময়ত ৰাষ্ট্ৰই “বিনামূলীয়া পাছ নাপাব” আৰু আদালত “মূক দৰ্শক” হৈ নাথাকিব।
লগতে পঢ়ক: ইউক্ৰেইনৰ দুটা অঞ্চলক স্বাধীন ঘোষণা কৰিলে পুটিনে; আমেৰিকাকে ধৰি পশ্চিমৰ প্ৰতিক্ৰিয়া
এতিয়ালৈকে, সাংবাদিক এন ৰাম, সিদ্ধাৰ্থ বৰদৰাজন আৰু পৰাঞ্জয় গুহ ঠাকুৰতাকে ধৰি কমেও ১৩ জন লোক সমিতিৰ সন্মুখত উপস্থিত হৈছে।
সূত্ৰসমূহে কয় যে ভীমা কোৰেগাঁও গোচৰৰ অভিযুক্তসকলৰ সৈতে জড়িতকে ধৰি পেনেলে ফৰেনচিক পৰীক্ষাৰ বাবে প্ৰায় এক ডজন চেলফোন লাভ কৰিছে।
যোৱা বছৰ এটা আন্তৰ্জাতিক সংবাদ সংস্থাই প্ৰকাশ কৰা প্ৰতিবেদনত কোৱা হৈছিল যে এই স্পাইৱেৰটো কেইবাখনো ৰাষ্ট্ৰই নাগৰিক সমাজৰ কৰ্মী, সাংবাদিক আৰু আন বহুতক লক্ষ্য কৰি ব্যৱহাৰ কৰিছিল। ইয়াৰ পিছতে পেগাচাছ কাণ্ডই তীব্ৰ আলোড়নৰ সৃষ্টি কৰিছিল।
লগতে পঢ়ক: মামৰে ধৰিছে আঁচনিত! কলিয়াবৰত কলং পুনৰুজ্জীৱিতকৰণ নামত জলসম্পদ বিভাগৰ প্ৰহসন
ভাৰতত, নিউজ পৰ্টেল “দ্য ৱায়াৰ”য়ে দাবী কৰিছিল যে ইয়াত ১৪২ জনৰো অধিক লোকক লক্ষ্য কৰা হৈছিল।
উক্ত তালিকাত কংগ্ৰেছৰ ৰাহুল গান্ধী, নিৰ্বাচনী ৰণনীতিবিদ প্ৰশান্ত কিশোৰ, দুজন কাৰ্যনিৰ্বাহ কৰি থকা কেন্দ্ৰীয় মন্ত্ৰী, এজন প্ৰাক্তন নিৰ্বাচন আয়ুক্ত, উচ্চতম ন্যায়ালয়ৰ দুজন পঞ্জীয়ক, এজন প্ৰাক্তন ন্যায়াধীশৰ পুৰণি নম্বৰ, এজন প্ৰাক্তন এটৰ্নি জেনেৰেলৰ ঘনিষ্ঠ সহযোগী আৰু ৪০ জন সাংবাদিক অন্তৰ্ভুক্ত হৈছিল।
স্পাইৱেৰ নিৰ্মাতা এনএছঅ’য়ে তেওঁলোকে কেৱল চৰকাৰ আৰু তেওঁলোকৰ সংস্থাসমূহকহে ইয়াৰ সামগ্ৰী যোগান ধৰে বুলি কোৱাৰ পিছত কেন্দ্ৰই তীব্ৰ বিৰোধী চাপত পৰি কৈছিল যে ইয়াত কোনো অবৈধ হস্তক্ষেপ নাছিল।
অক্টোবৰত, এলানি আবেদনৰ সঁহাৰি দি, উচ্চতম ন্যায়ালয়ে তিনিজনীয়া বিশেষজ্ঞ সমিতি গঠনৰ নিৰ্দেশ দিছিল।
লগতে পঢ়ক: দবাত বিশ্বৰ ১নম্বৰ খেলুৱৈক পৰাজিত কৰি চমক দিলে ভাৰতৰ তৰুণ গ্ৰেণ্ড মাষ্টাৰ প্ৰজ্ঞানন্ধাই
কেন্দ্ৰৰ প্ৰতিটো যুক্তিক ব্যৱহাৰিকভাৱে অস্বীকাৰ কৰি ন্যায়ালয়ে কৈছিল যে গোপনীয়তা অকল সাংবাদিক বা সামাজিক কৰ্মীসকলৰে নহয়, প্ৰতিজন নাগৰিকৰে চিন্তাৰ বিষয়। দেশৰ মুখ্য ন্যায়াধীশ এন ভি ৰমনাৰ নেতৃত্বত তিনিজনীয়া বিচাৰপীঠে কৈছিল যে এই নিৰীক্ষণে “বাক স্বাধীনতাৰ ওপৰত নীৰৱ প্ৰভাৱ পেলাব পাৰে”।
যোৱা মাহত, আমেৰিকা যুক্তৰাষ্ট্ৰৰ দৈনিক কাকত নিউয়ৰ্ক টাইমছে পেগাচাছ স্পাইৱেৰ আৰু এটা মিছাইল ব্যৱস্থা ২০১৭ চনত ভাৰত আৰু ইজৰাইলৰ মাজত কৰা প্ৰায় ২ বিলিয়ন ডলাৰৰ চুক্তিৰ “কেন্দ্ৰবিন্দু”, আৰু অস্ত্ৰ আৰু চোৰাংচোৱা ব্যৱস্থা জড়িত থকা বুলি প্ৰকাশ কৰা প্ৰতিবেদনৰ পিছতে বিষয়টোৱে পুনৰ নতুনকৈ চৰ্চা লাভ কৰে।