মঙলবাৰে প্ৰায় বিৰোধীশূন্য লোকসভাত ৰূপান্তৰকামীৰ অধিকাৰ সংশোধনী বিধেয়কখন গৃহীত হয়। কংগ্ৰেছকে ধৰি বিৰোধী দলৰ তীব্ৰ আপত্তিৰ মাজত মাত্ৰ ডেৰ ঘণ্টাৰ আলোচনাৰ অন্তত মঙলবাৰে লোকসভাত ধ্বনিভোটত বিধেয়কখন গৃহীত হয়। এই সংশোধনী বুধবাৰে ৰাজ্যসভাতো বাধা নোহোৱাকৈ গৃহীত হয়। কিন্তু সংসদৰ বাধা আঁতৰিলেও অনাগত দিনত বিধেয়কখনে আইনী বাধাৰ সন্মুখীন হ’ব পাৰে। অন্ততঃ বুধবাৰে সেইটোৱেই ইংগিত পোৱা গৈছে।
মঙলবাৰে লোকসভাত গৃহীত হোৱাৰ পাছত বুধবাৰে ৰাজ্যসভাত বিধেয়কখন দাখিল কৰা হয়। ডি এম কেৰ সাংসদ তিৰুচি শিৱাই বিধেয়কখন বিবেচনাৰ বাবে নিৰ্বাচিত সমিতিলৈ প্ৰেৰণ কৰাৰ প্ৰস্তাৱ আগবঢ়ায়। কিন্তু সেয়া নাকচ কৰা হয়।
লোকসভাৰ দৰে ৰাজ্যসভাতো বিধেয়কখন ধ্বনি ভোটৰ জৰিয়তে গৃহীত কৰা হয়। বিৰোধীৰ আপত্তি অতিক্ৰম কৰি কেন্দ্ৰীয় সামাজিক ন্যায় আৰু সৱলীকৰণ মন্ত্ৰী বীৰেন্দ্ৰ কুমাৰে দাবী কৰে যে এই বিধেয়কখন আচলতে সমাজৰ সকলো শ্ৰেণীকে একত্ৰিত কৰাৰ প্ৰয়াস। এই বিধেয়কখনে কেৱল জৈৱিক ভিত্তিত বৈষম্যৰ সন্মুখীন হোৱাসকলক সুৰক্ষা প্ৰদান কৰিব।
কিন্তু যিদিনা বিধেয়কখনে সংসদত বাধা অতিক্ৰম কৰিলে, সেইদিনাই উচ্চতম ন্যায়ালয়ে নিযুক্তি দিয়া সমিতিখনে বিধেয়কখন প্ৰত্যাহাৰ কৰাৰ পৰামৰ্শ আগবঢ়ায়। উচ্চতম ন্যায়ালয়ে গঠন কৰা পৰামৰ্শদাতা সমিতিয়ে কয় যে এই বিধেয়কখনে নিজৰ লিংগ পৰিচয় নিৰ্ধাৰণৰ অধিকাৰ কৰ্তন কৰিছে।
কমিটীৰ মতে, এইখন ২০১৪ চনত উচ্চতম ন্যায়ালয়ে দিয়া ঐতিহাসিক নালছা ৰায়দানৰ বিৰোধী। বিধেয়কখনৰ জৰিয়তে আত্মপৰিচয়ৰ অধিকাৰ কাঢ়ি লোৱা হৈছে। ২০১৪ চনত এটা গোচৰত উচ্চতম ন্যায়ালয়ে ৰূপান্তৰকামীৰ আত্মপৰিচয়ৰ অধিকাৰক স্বীকৃতি দিছিল। কিন্তু নতুন সংশোধনীৰ জৰিয়তে সেই অধিকাৰ বিলুপ্ত কৰি চিকিৎসা ব’ৰ্ডৰ জৰিয়তে পৰিচয় নিৰ্ণয়ৰ ব্যৱস্থা প্ৰৱৰ্তন কৰা হৈছে, যিটো অন্যায়।
উল্লেখ্য যে কেন্দ্ৰৰ নতুন বিধেয়কখনৰ তীব্ৰ বিৰোধিতা কৰিছে কংগ্ৰেছকে ধৰি বিৰোধী দলসমূহে। যদিও চৰকাৰে দাবী কৰিছে যে ইয়াৰ জৰিয়তে আইনৰ অপব্যৱহাৰ ৰোধ কৰা সম্ভৱ হ’ব। বিধেয়কখন গৃহীত হোৱাৰ পিছতে বিভিন্ন ৰূপান্তৰকামী সংগঠন আৰু মানৱ অধিকাৰ কৰ্মীসকলৰ মাজত ক্ষোভৰ সৃষ্টি হৈছে। জানিব পৰা মতে, ইতিমধ্যে বিধেয়কখনক লৈ দেশৰ বিভিন্ন প্ৰান্তত প্ৰতিবাদ আৰম্ভ হৈছে।
