ভাৰতীয় বিমান ভাড়াত দেখা দিয়া অস্বাভাৱিক উত্থান-পতন আৰু গ্ৰাহকক শোষণ কৰা প্ৰৱণতা ৰোধ কৰিবলৈ উচ্চতম ন্যায়ালয়ে এক গুৰুত্বপূৰ্ণ পদক্ষেপ গ্ৰহণ কৰিছে। সোমবাৰে উচ্চতম ন্যায়ালয়ে ভাৰতীয় বায়ুযান অধিনিয়ম ২০২৪ ৰ অধীনত প্ৰস্তুত কৰা নতুন বিমান নিয়মাৱলীআদালতত দাখিল কৰিবলৈ কেন্দ্ৰীয় চৰকাৰক নিৰ্দেশ দিছে। আদালতক জনোৱা হৈছে যে এই নিয়মাৱলী ইতিমধ্যে চূড়ান্ত কৰা হৈছে আৰু বৰ্তমান ইয়াক সংসদত উত্থাপন কৰাৰ পূৰ্বে হিন্দীৰ লগতে আন চৰকাৰী ভাষাসমূহলৈ অনুবাদ কৰাৰ কাম চলি আছে।
নাগৰিক বিমান পৰিবহন সঞ্চালকালয় চমুকৈ ডিজিচিএ আৰু কেন্দ্ৰীয় চৰকাৰৰ হৈ হাজিৰ হোৱা অতিৰিক্ত ছলিচিটৰ জেনেৰেল অনিল কৌশিকে ন্যায়াধীশ বিক্ৰম নাথ আৰু ন্যায়াধীশ সন্দীপ মেহতাৰ বিচাৰপীঠক অৱগত কৰে যে অহা ২১ জুলাইৰ পৰা আৰম্ভ হ‘বলগীয়া সংসদৰ বৰ্ষাকালীন অধিবেশনত এই নিয়মসমূহ উত্থাপন কৰা হ’ব। ইয়াৰ বাবে তেওঁ অলপ সময় বিচাৰিছিল যদিও আবেদনকাৰীৰ অধিবক্তাই যুক্তি দৰ্শায় যে নিয়ম অনুসৰি এইসমূহ সংসদত উত্থাপন কৰাৰ পূৰ্বে ৰাইজৰ মতামতৰ বাবে প্ৰকাশ কৰিব লাগে। এই যুক্তিক গ্ৰহণ কৰি বিচাৰপীঠে কেন্দ্ৰীয় চৰকাৰক আগন্তুক দুসপ্তাহৰ ভিতৰত এই নিয়মৰ খচৰা বন্ধ খামৰ ভিতৰত আদালতত জমা দিবলৈ নিৰ্দেশ দিয়ে।
সমাজকৰ্মী এছ লক্ষ্মীনাৰায়ণে দাখিল কৰা এক জনস্বাৰ্থজনিত আবেদনৰ ভিত্তিত উচ্চতম ন্যায়ালয়ে এই শুনানি গ্ৰহণ কৰিছে। আবেদনখনত উৎসৱ-পাৰ্বন, বন্ধৰ দিন বা জৰুৰীকালীন সময়ত ব্যক্তিগত বিমান সংস্থাসমূহে লোৱা হঠকাৰী বিমান ভাড়া আৰু অন্যান্য অতিৰিক্ত মাচুল নিয়ন্ত্ৰণৰ বাবে এক বাধ্যতামূলক নিয়ম প্ৰস্তুত কৰাৰ দাবী কৰা হৈছে। আবেদনকাৰীৰ অধিবক্তাই আদালতত কয় যে উৎসৱৰ সময়ত বিমান ভাড়া অস্বাভাৱিকভাৱে বৃদ্ধি পোৱাটো গ্ৰাহকৰ বাবে অত্যন্ত শোষণমূলক আৰু ইয়াৰ বাবে ডিজিচিএৰ নিষ্ক্ৰিয়তা দায়ী।
পূৰ্বে ডিজিচিএই বিমান সংস্থাসমূহক ৬০ শতাংশ আসন কোনো ধৰণৰ আসন বাছনি মাচুল নোলোৱাকৈ যাত্ৰীক যোগান ধৰিবলৈ আৰু একেটা পিএনআৰত যাত্ৰা কৰা লোকক একেলগে বহাৰ ব্যৱস্থা কৰিবলৈ নিৰ্দেশ দিছিল, কিন্তু চৰকাৰে সেই নিৰ্দেশ পিছুৱাই ৰাখিছে। শুনপানীৰ সময়ত ন্যায়াধীশ মেহতাই উল্লেখ কৰে যে ইৰানে হৰমুজ প্ৰণালী বন্ধ কৰিব পাৰে বুলি ওলোৱা খবৰৰ সুযোগ লৈ বিমান সংস্থাসমূহে পুনৰ ইন্ধন সংকটৰ অজুহাতত ভাড়া বৃদ্ধি কৰাৰ সম্ভাৱনা আছে। আনহাতে আবেদনকাৰীৰ ফালৰ পৰা কোৱা হয় যে বিমান ভাড়াত ইন্ধনৰ অংশ মাত্ৰ ১০ শতাংশহে, তথাপিও ভাড়া ১০০ ৰ পৰা ৩০০ শতাংশ পৰ্যন্ত বৃদ্ধি কৰা হয়।
বৰ্তমান বিমান ভাড়া পৰ্যালোচনা বা নিয়ন্ত্ৰণ কৰাৰ বাবে কোনো স্বতন্ত্ৰ কৰ্তৃপক্ষ নাই, যাৰ ফলত সাধাৰণ আৰু অৰ্থনৈতিকভাৱে পিছপৰা যাত্ৰীসকল তীব্ৰ সমস্যাৰ সন্মুখীন হৈছে। চহকী লোকসকলে আগতীয়াকৈ টিকট বুক কৰিব পাৰে যদিও জৰুৰীকালীন সময়ত সাধাৰণ লোকসকলে অত্যধিক ভাড়া ভৰিবলগীয়া হয়। আদালতে এই গোটেই বিষয়টো গুৰুত্বসহকাৰে পৰীক্ষা কৰিবলৈ সন্মত হৈছে আৰু পৰৱৰ্তী শুনানিৰ দিন অহা ৩ আগষ্ট ধাৰ্য কৰিছে।
