উচ্চতম ন্যায়ালয়ে এচআইআৰ প্ৰক্ৰিয়াক বৈধ আৰু সাংবিধানিক বুলি ঘোষণা কৰি ইয়াক সেউজ সংকেত দিছে। মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ বিচাৰপীঠে বিহাৰ নিৰ্বাচনৰ পূৰ্বে ভোটাৰ তালিকাৰ বিশেষ পুনৰীক্ষণ অৰ্থাৎ এচআইআৰ অধিসূচনাক প্ৰত্যাহ্বান জনাই দাখিল কৰা সকলো আবেদন খাৰিজ কৰি দিয়ে। শুনানীৰ সময়ত উচ্চতম ন্যায়ালয়ে কয় যে নিৰ্বাচন আয়োগৰ এচআইআৰৰ বাবে বিশেষ প্ৰক্ৰিয়া গ্ৰহণ কৰাৰ সম্পূৰ্ণ অধিকাৰ আছে। বিশেষ পৰিস্থিতিত বেলেগ প্ৰক্ৰিয়া গ্ৰহণ কৰাটো সংবিধান বা আইনৰ অবমাননা নহয় বুলিও আদালতে স্পষ্ট কৰে।
আদালতে উল্লেখ কৰে যে সংবিধানৰ ৩২৪ অনুচ্ছেদ আৰু ১৯৫০ চনৰ জনপ্ৰতিনিধিত্ব আইন অনুসৰি নিৰ্বাচন আয়োগৰ ভোটাৰ তালিকা পৰীক্ষা, সংশোধন আৰু সত্যপন কৰাৰ সম্পূৰ্ণ কৰ্তৃত্ব আছে। এক শক্তিশালী গণতন্ত্ৰৰ বাবে এখন স্বচ্ছ আৰু নিকা ভোটাৰ তালিকা অতি প্ৰয়োজনীয়। ইয়াৰ লগতে উচ্চতম ন্যায়ালয়ে এটা গুৰুত্বপূৰ্ণ কথা স্পষ্ট কৰি দিয়ে যে ভোটাৰ তালিকাৰ পৰা নাম বাদ পৰাৰ অৰ্থ এইটো নহয় যে এজন ব্যক্তিয়ে নিজৰ নাগৰিকত্ব হেৰুৱাই পেলাইছে। আদালতে কয় যে যদি কোনো নাগৰিকৰ নাম ভোটাৰ তালিকাত নাই, তেন্তে ইয়াৰ অৰ্থ এইটো নহয় যে তেওঁ নাগৰিকত্ব প্ৰমাণ কৰাত ব্যৰ্থ হৈছে, বৰঞ্চ ই নিৰ্বাচন আয়োগৰ নাগৰিকত্ব সত্যপন কৰাৰ অসমৰ্থতাহে প্ৰদৰ্শন কৰে।
আবেদনকাৰী তথা অধিবক্তা অশ্বিনী উপাধ্যায়ে এই ৰায়দানক আদৰণি জনাই কয় যে আদালতে এচআইআৰ প্ৰক্ৰিয়াটো সম্পূৰ্ণ স্বতন্ত্ৰ আৰু নিৰপেক্ষভাৱে পৰিচালিত হোৱা বুলি মানি লৈছে। তেওঁ জনোৱা অনুসৰি, তেওঁলোকে দাখিল কৰা জনস্বাৰ্থ জড়িত আবেদনত প্ৰতি পাঁচ বছৰৰ মূৰে মূৰে নিয়মীয়াকৈ এচআইআৰ অনুষ্ঠিত কৰাৰ দাবী জনোৱা হৈছিল, যাক আদালতে গ্ৰহণ কৰিছে। আদালতে নিৰ্বাচন আয়োগক নিৰ্দেশ দিছে যে ২০০৩ চনৰ এচআইআৰৰ সময়ত যিসকল লোকৰ নাম কৰ্তন কৰা হৈছিল, তেওঁলোকর নাগৰিকত্বৰ স্থিতি সত্যপনৰ বাবে গোচৰসমূহ উপযুক্ত ট্ৰাইবুনাললৈ প্ৰেৰণ কৰিব লাগিব। কেৱল নাম কাটি দিয়াটোৱেই এজন ব্যক্তিক বিদেশী বুলি প্ৰমাণ নকৰে।
আদালতে লগতে স্পষ্ট কৰে যে নিৰ্বাচন আয়োগে নিৰ্ধাৰণ কৰা ১১ টা নথিপত্ৰ সম্পূৰ্ণ উপযুক্ত আৰু ই কোনো নিয়ম উলংঘা কৰা নাই। ধাৰ্য কৰা এই নথিপত্ৰৰ তালিকাখন বৈধ হৈ থাকিব। আধাৰ কাৰ্ডৰ সন্দৰ্ভত আদালতে কয় যে সেই সময়ত ইয়াক দ্বাদশখন স্বীকৃত নথিপত্ৰ হিচাপে গ্ৰহণ কৰাটো সঠিক আছিল। আধাৰ কাৰ্ডক বাধ্যতামূলক কৰা হোৱা নাই বা ইয়াক খাৰিজো কৰা হোৱা নাই। আগলৈ এই সন্দৰ্ভত কেনেধৰণৰ কাৰ্যপচ্ছা গ্ৰহণ কৰা হ’ব, সেইয়া নিৰ্বাচন আয়োগেই থিৰাং কৰিব। বিৰোধীয়ে নিৰ্বাচন আয়োগৰ নিৰপেক্ষতাক লৈ অনা সকলো অভিযোগ আদালতে খাৰিজ কৰিছে বুলি উপাধ্যায়ে প্ৰকাশ কৰে।
