বুধবাৰে পুৱাই দিল্লীৰ জাহাংগীৰপুৰীত ‘অবৈধ নিৰ্মাণকাৰী’ৰ বিৰুদ্ধে উত্তৰ দিল্লী পৌৰ নিগমে উচ্ছেদ অভিযান আৰম্ভ কৰে। কিন্তু উচ্চতম ন্যায়ালয়ৰ নিৰ্দেশত সেই অভিযান বন্ধ কৰিবলগীয়া হয়।
জ্যেষ্ঠ অধিবক্তা দুষ্মন্ত ডাভে, কপিল ছিবাল, পাভ সুৰেন্দ্ৰ নাথ আৰু প্ৰশান্ত ভূষণে আজি উচ্চতম ন্যায়ালয়ত বিষয়টো উত্থাপন কৰাৰ পিছত শীৰ্ষ আদালতখনে সদ্যহতে উচ্ছেদ অভিযান বন্ধ ৰাখিবলৈ নিৰ্দেশ দিয়ে।
মুখ্য ন্যায়াধীশ এন ভি ৰামানাই কাইলৈ এই গোচৰৰ শুনানি অনুষ্ঠিত কৰা হ’ব বুলি জানিবলৈ দিয়ে।
লগতে পঢ়ক: কৰ’নাৰ চতুৰ্থ ঢৌৰ আশংকা! দেশত বিগত ২৪ ঘন্টাত ৬৬ শতাংশ বৃদ্ধি পালে দৈনিক সংক্ৰমণ
আদালতত অধিবক্তা দুষ্মন্ত ডাভেই কয়,’’সংঘৰ্ষত ক্ষতিগ্ৰস্ত জাহাংগীৰপুৰীত উচ্ছেদ এটা সম্পূৰ্ণ বেআইনী ধ্বংসকাৰ্য। কাকো কোনো জাননী দিয়া হোৱা নাই আৰু কাৰো কথাও শুনা হোৱা নাই। আমি এই অভিযান বন্ধৰ বাবে আবেদন জনাইছো।‘’
ইয়াৰ পিছতে মুখ্য ন্যায়াধীশ ৰামানাই কয় যে, ‘’ঠিক আছে, আমি স্থগিতাদেশ দিছো।কাইলৈ আন বিষয়সমূহৰ সৈতে এই বিষয়টোও উত্থাপন কৰা হ’ব।‘’
ইয়াৰ পূৰ্বে জমিয়ত উলেমা-ই হিন্দে উচ্চতম ন্যায়ালয়ৰ দ্বাৰস্থ হৈ প্ৰশ্ন উত্থাপন কৰিছিল যে কাৰোবাৰ ওপৰত হিংসাত্মক ঘটনা সংঘটিত কৰাৰ সন্দেহ থাকিলে তেওঁৰ ঘৰত কিয় বুল’ডজাৰ চলোৱা হ’ব।
উল্লেখ্য যে কেইদিন পূৰ্বে এই জাহাংগীৰপুৰীতে হনুমান জয়ন্তীত দুটা সম্প্ৰদায়ৰ মাজত সংঘৰ্ষ ঘটিছিল। এনে পৰিস্থিতিতে এই উচ্ছেদ অভিযানকলৈ অঞ্চলটোত উত্তেজনাই বিৰাজ কৰিছিল। পৰিস্থিতিৰ প্ৰতি লক্ষ্য ৰাখি আগৰে পৰা আৰক্ষী বাহিনী মোতায়েন কৰা হৈছিল।
লগতে পঢ়ক: সুব্ৰমনিয়াম স্বামীৰ বিস্ফোৰণ! অৰ্থনীতিৰ পৰা ৰাষ্ট্ৰীয় সুৰক্ষালৈকে সকলোতে ব্যৰ্থ প্ৰধানমন্ত্ৰী মোদী
প্ৰশানৰ উচ্ছেদ অভিযানত পথৰ ওপৰত থকা ঠেলাগাড়ীৰ পৰা আৰম্ভ কৰি বস্তি অঞ্চল এটাৰ পিছত এটাকৈ ভাঙি যোৱা হয়। এনে উচ্ছেদ অভিযান চলি থকাৰ মাজতে উচ্চতম ন্যায়ালয়ৰ মুখ্য ন্যায়াধীশৰ নেতৃত্বৰ বিচাৰপীঠে অভিযান বন্ধ ৰখাৰ নিৰ্দেশ দিয়ে।
ইপিনে, উচ্চতম ন্যায়ালয়ে নিৰ্দেশ দিয়াৰ পিছতো প্ৰশাসনে বহু সময়লৈকে জাহাংগীৰপুৰীত বুল’ডজাৰেৰে উচ্ছেদ অভিযান চলাই যোৱাৰ অভিযোগ উত্থাপন হয়।