প্ৰায় ৯০০ কোটি টকীয়া নতুন সংসদ ভৱন নিৰ্মাণৰ প্ৰথমটো ঢাপতে মুখ থেকেচা খাইছে কেন্দ্ৰীয় চৰকাৰে।
সোমবাৰে দেশৰ সৰ্বোচ্চ ন্যায়ালয়ে নতুন সংসদ ভৱন তথা চেন্ট্ৰেল ভিষ্টাৰ প্ৰকল্পৰ নিৰ্মাণ কাম আৰম্ভ কৰিব নোৱাৰিব বুলি কেন্দ্ৰীয় চৰকাৰক নিৰ্দেশ দিছে।
সোমবাৰে উচ্চতম ন্যায়ালয়ে এক ৰায় যোগে কয় “ভূমি পুজন কৰক। কিন্তু ন্যায়ালয়ৰ পৰৱৰ্তী নিৰ্দেশ অহাৰ পূৰ্বে নতুন ভৱনৰ নিৰ্মাণ আৰম্ভ কৰি কোনো ভঙা-গঢ়াৰ কাম কৰিব নোৱাৰিব।”
সোমবাৰে দেশৰ সৰ্বোচ্চ ন্যায়ালয়ৰ এই নিৰ্দেশৰ পিছতে কেন্দ্ৰীয় চৰকাৰক শলঠেকত পৰা দেখা গৈছে।
অহা ১০ ডিচেম্বৰত দেশৰ প্ৰধানমন্ত্ৰী নৰেন্দ্ৰ মোদীয়ে নতুন সংসদ ভৱনৰ ভূমি পূজন কৰাৰ কথা আছিল। অৱশ্যে দেশৰ সৰ্বোচ্চ ন্যায়ালয়ে ভূমি পূজনত কোনো ধৰণৰ প্ৰতিৱন্ধকতা লগোৱা নাই।
উল্লেখ্য প্ৰায় ৯০০ কোটি ব্যয়সাপেক্ষ নতুন সংসদ ভৱনৰ চেন্ট্ৰেল ভিষ্টা নামৰ প্ৰকল্পটোৰ নিৰ্মাণৰ নিবিদা দেশৰ প্ৰখ্যাত উদ্যোগিক প্ৰতিষ্ঠান টাটায়ে লাভ কৰিছিল।
ইয়াৰ পিছতে বিভিন্ন পক্ষই চেন্ট্ৰেল ভিষ্টা প্ৰকল্প নিৰ্মাণৰ বিৰুদ্ধে উচ্চতম ন্যায়ালয়ত ৰাজহুৱা স্বাৰ্থজড়িত আবেদন দাখিল কৰিছিল।
এই নিৰ্মাণৰ বাবে দিল্লীৰ বহুসংখ্যক গছ কাটিবলগীয়া হ’ব আৰু দেশৰ আটাইতকৈ বেছি বায়ু প্ৰদূষিত হোৱা চহৰখনৰ পাৰিপাৰ্শ্বিক পৰিৱেশত বিৰূপ প্ৰভাৱ পৰিব বুলি সচেতন লোকসকলে মত প্ৰকাশ কৰি আহিছে।
আজি দেশৰ শীৰ্ষ আদালতে চৰকাৰৰ তৰফৰ পৰা চলিচিটৰ জেনেৰেল তুষাৰ মেহতাক বক্তব্য ৰাখিবলৈ দিয়ে আৰু মেহতাই এই নিৰ্মাণ কাৰ্যত কোনো গছ কটা নহয় বুলি মন্তব্য কৰে।
ইফালে সৰ্বোচ্চ আদালতে নতুন সংসদ ভৱন নিৰ্মাণ পৰিকল্পনাকলৈ অসন্তুষ্টি প্ৰকাশ কৰিছে। আনকি ন্যায়ালয়ে কেন্দ্ৰীয় চৰকাৰক গছ কাটিব নোৱাৰিব বুলিও নিৰ্দেশ দিয়া বুলি জানিব পৰা গৈছে।
