বিয়াৰ পিছত পত্নীয়ে ৰন্ধাবঢ়া কৰিব বিচৰা নাছিল। এই অভিযোগ লৈ বিবাহ বিচ্ছেদ বিচাৰি আদালতলৈ গৈছিল এজন ব্যক্তি। সেই গোচৰত এতিয়া উচ্চতম ন্যায়ালয়ে এক গুৰুত্বপূৰ্ণ মন্তব্য কৰিছে। আদালতে স্পষ্ট কৰি দিছে যে ঘৰুৱা কাম কেৱল পত্নীৰ দায়িত্ব নহয়, সেই দায়িত্ব স্বামীয়েও ভাগ কৰি ল’ব লাগিব।
শেহতীয়াকৈ বিবাহ বিচ্ছেদৰ গোচৰত স্বামীয়ে অভিযোগ কৰিছিল যে বিয়াৰ মাত্ৰ এসপ্তাহৰ পিছত পত্নীৰ আচৰণ সলনি হৈছিল। তেওঁ ৰন্ধা-বঢ়া কৰিবলৈ অস্বীকাৰ কৰিছিল, আনকি তেওঁৰ লগত বেয়া আচৰণ কৰা আৰু মাক-দেউতাকক অপমান কৰা বুলিও অভিযোগ কৰিছিল। এই অভিযোগৰ ভিত্তিত তেওঁ বিবাহ বিচ্ছেদ বিচাৰি উচ্চতম ন্যায়ালয়ৰ কাষ চাপিছিল।
শুনানিৰ সময়ত ন্যায়াধীশসকলে স্পষ্টকৈ কয় যে পত্নী কোনো কাৰণতে পৰিচাৰিকা নহয়। ন্যায়াধীশ সন্দীপ মেহতাই মন্তব্য কৰে যে, “আপুনি পৰিচাৰিকাক বিয়া কৰা নাই, আপুনি জীৱন সংগীক বিয়া কৰাইছে।”
একে সময়তে ন্যায়াধীশ বিক্ৰমনাথেও কয় যে সময় সলনি হৈছে। এতিয়া পুৰুষ আৰু নাৰী সমান। গতিকে স্বামীয়েও ৰন্ধা-বঢ়া, বাচন ধোৱা বা আন ঘৰুৱা কাম-কাজ কৰি পত্নীৰ কাষত থিয় দিব লাগে।
উল্লেখ্য যে এই দম্পতীয়ে ২০১৭ চনত বিবাহপাশত আবদ্ধ হয় আৰু তেওঁলোকৰ এটা আঠ বছৰীয়া পুত্ৰ সন্তান আছে। সম্পৰ্কৰ অৱনতি ঘটাৰ বাবে পৰিয়াল আদালতত বিবাহ বিচ্ছেদ হয়। তাত স্বামীয়ে পত্নীৰ বিৰুদ্ধে ‘নিষ্ঠুৰতা’ৰ অভিযোগ আনে। কিন্তু পত্নীয়ে উচ্চ ন্যায়ালয়ত আবেদন জনোৱাত বিবাহ বিচ্ছেদৰ ৰায় খাৰিজ কৰা হয়। তাৰ পাছত ৰায়দানত অসন্তুষ্ট হৈ স্বামীয়ে উচ্চতম ন্যায়ালয়ত আবেদন জনায়।
আনহাতে, শহুৰেকৰ পৰিয়ালৰ সন্মতি সাপেক্ষে সন্তান জন্ম দিবলৈ পিতৃৰ ঘৰলৈ যোৱা বুলি দাবী কৰে পত্নীয়ে। কিন্তু শিশুটিৰ অন্নপ্ৰাশনত তেওঁৰ স্বামী উপস্থিত নাছিল। ইয়াৰ উপৰিও তেওঁৰ পিতৃৰ পৰা সোণ আৰু নগদ যৌতুক দাবী কৰা বুলি অভিযোগ আনিছে।
ইয়াৰ পূৰ্বে এই গোচৰত মধ্যস্থতাৰ বাবে প্ৰেৰণ কৰা হৈছিল দম্পতীহালক। কিন্তু সেই প্ৰচেষ্টা সফল নহ’ল। শেষত গোচৰৰ শুনানিৰ সময়ত উচ্চতম ন্যায়ালয়ে স্বামীৰ ‘নিষ্ঠুৰতা’ৰ দাবী মানি ল’বলৈ অস্বীকাৰ কৰি তাৰ পৰিৱৰ্তে তেওঁক ককৰ্থনা কৰে।
