নেতাজী সুভাষ চন্দ্ৰ বসুক দেশৰ ‘জাতীয় পুত্ৰ’ হিচাপে স্বীকৃতি প্ৰদান কৰাৰ লগতে ভাৰতৰ স্বাধীনতাত আজাদ হিন্দ ফৌজৰ অৱদানক আনুষ্ঠানিক স্বীকৃতি দিয়াৰ দাবীৰে দাখিল কৰা এখন জনস্বাৰ্থ জড়িত আৱেদন সোমবাৰে উচ্চতম ন্যায়ালয়ে খাৰিজ কৰে। ভাৰতৰ মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ বিচাৰপীঠে পিনাকপাণি মহন্তি নামৰ আৱেদনকাৰীগৰাকীক কেৱল সস্তীয়া জনপ্ৰিয়তা অৰ্জনৰ বাবে ন্যায়ালয়ৰ সময় নষ্ট কৰাৰ অভিযোগত তীব্ৰ ভৰ্ৎসনা কৰে। একেখন আৱেদন পূৰ্বেও নাকচ কৰা হৈছিল বুলি উল্লেখ কৰি ন্যায়ালয়ে এই বিষয়ক লৈ ভৱিষ্যতে পুনৰ কোনো আৱেদন গ্ৰহণ নকৰিবলৈ পঞ্জীয়ন বিভাগক নিৰ্দেশ দিছে।
পিনাকপাণি মহন্তি নামৰ ব্যক্তিগৰাকীয়ে দাখিল কৰা এই আৱেদনখনত নেতাজী সুভাষ চন্দ্ৰ বসুক ‘জাতীয় পুত্ৰ’ হিচাপে ঘোষণা কৰাৰ উপৰিও ১৯৪৭ চনত ভাৰতৰ স্বাধীনতাত আজাদ হিন্দ ফৌজৰ ভূমিকাক আনুষ্ঠানিক স্বীকৃতি দিয়াৰ দাবী জনোৱা হৈছিল। তদুপৰি, ২৩ জানুৱাৰীত থকা নেতাজীৰ জন্মবাৰ্ষিকী আৰু ২১ অক্টোবৰত থকা আজাদ হিন্দ ফৌজৰ প্ৰতিষ্ঠা দিৱসক ৰাষ্ট্ৰীয় দিৱস হিচাপে ঘোষণা কৰিবলৈকো আৱেদনখনত অনুৰোধ কৰা হৈছিল। কিন্তু মুখ্য ন্যায়াধীশৰ বিচাৰপীঠে এই আৱেদনখনক ভিত্তিহীন আখ্যা দি স্পষ্ট কৰি দিয়ে যে এনে ঐতিহাসিক আৰু ৰাজনৈতিক বিষয়সমূহ ন্যায়িক পৰ্যালোচনাৰ পৰিসৰৰ বাহিৰত আৰু এই সন্দৰ্ভত উপযুক্ত কৰ্তৃপক্ষইহে সিদ্ধান্ত ল’ব পাৰে।
শুনানিৰ সময়ত আৱেদনকাৰীগৰাকীক ভৰ্ৎসনা কৰি মুখ্য ন্যায়াধীশগৰাকীয়ে কয় যে একেটা বিষয়তে পূৰ্বেও আৱেদন খাৰিজ কৰা হৈছিল আৰু এতিয়া কেৱল প্ৰচাৰ বিচৰাৰ স্বাৰ্থত পুনৰ এই আৱেদন দাখিল কৰা হৈছে। আৱেদনকাৰীয়ে এইবাৰৰ আৱেদনখন বেলেগ বুলি যুক্তি দৰ্শাবলৈ চেষ্টা কৰাত বিচাৰপীঠে তীব্ৰ অসন্তুষ্টি প্ৰকাশ কৰে। আনকি ন্যায়ালয়ৰ পৰা শীঘ্ৰে আঁতৰি নাগলে অতিৰিক্ত জৰিমনা বিহা হ‘ব বুলিও মুখ্য ন্যায়াধীশগৰাকীয়ে কঠোৰ সকিয়নি প্ৰদান কৰে। উচ্চতম ন্যায়ালয়ৰ পঞ্জীয়ন বিভাগকো এনে ধৰণৰ ভিত্তিহীন আৰু একেই বিষয়ৰ ওপৰত জনস্বাৰ্থ জড়িত আৱেদন ভৱিষ্যতে গ্ৰহণ নকৰিবলৈ কঠোৰ নিৰ্দেশ দিছে।
