উত্তৰাখণ্ড চৰকাৰক তীব্ৰ সমালোচনা কৰি উচ্চতম ন্যায়ালয়ে ঋষিকেশৰ বনাঞ্চলৰ মাটিত বৃহৎ পৰিসৰত হোৱা অবৈধ বেদখলৰ বিৰুদ্ধে কঠোৰ স্থিতি গ্ৰহণ কৰিছে। আদালতে ৰাজ্য চৰকাৰক অহা দুসপ্তাহৰ ভিতৰত এই সন্দৰ্ভত এক সম্পূৰ্ণ প্ৰতিবেদন দাখিল কৰিবলৈ নিৰ্দেশ দিছে।
মুখ্য ন্যায়াধীশ সূৰ্য কান্ত আৰু ন্যায়াধীশ জয়মল্য বাগচীৰ বিচাৰপীঠে পৰিস্থিতিটোক অত্যন্ত চিন্তনীয় বুলি অভিহিত কৰি মন্তব্য কৰে যে ৰাজ্যিক প্ৰশাসনৰ সহযোগিতা আৰু ৰাজনৈতিক সমৰ্থন অবিহনে এনে বৃহৎ পৰিসৰৰ বেদখল কেতিয়াও সম্ভৱ নহয়।
আদালতে কৰ্তৃপক্ষৰ পৰা সকলো বেদখলকাৰীৰ সবিশেষ তথ্য দাবী কৰিছে। বেদখলকাৰীসকলে প্ৰশাসনৰ পৰা কিবা সুৰক্ষা লাভ কৰিছে নেকি, সেয়া পৰীক্ষা কৰিবলৈ তেওঁলোকৰ পৰিচয় পত্ৰও বিচাৰিছে। ইয়াৰ উপৰিও বেদখল হোৱা অঞ্চলৰ মানচিত্ৰ, মাটিৰ জোখ-মাপ আৰু সীমাৰ বিতং বিৱৰণ আৰু সেই মাটিত নিৰ্মাণ কৰা অবৈধ অট্টালিকাসমূহৰ বিতং তথ্য বিচাৰিছে আদালতে। উত্তৰাখণ্ড চৰকাৰে ২০২৬ চনৰ ২১ জানুৱাৰীৰ ভিতৰত এই সন্দৰ্ভত এক বিশদ শপতনামা দাখিল কৰিব লাগিব।
এই বিতৰ্কৰ মূলতে আছে ১৯৫০ চনত ‘পশুলোক সেৱা সমিতি‘ক ভূমিহীন পৰিয়ালৰ বাবে লিজত দিয়া প্ৰায় ২,৮৬৬ একৰ ভূমি। ১৯৮৪ চনত এই লিজৰ ম্যাদ শেষ হোৱাৰ পিছত মাটিখিনি ৰাজ্য চৰকাৰৰ অধীনলৈ ঘূৰি আহিব লাগিছিল, কিন্তু ব্যক্তিগত দখল দশক দশক ধৰি চলি থাকিল। ২০২৫ চনত এগৰাকী মহিলাই তেওঁক কৰা উচ্ছেদক প্ৰত্যাহ্বান জনাইছিল যদিও উচ্চ ন্যায়ালয়ে চৰকাৰী উচ্ছেদৰ সিদ্ধান্তক সমৰ্থন কৰে। তাৰ পাছতে গোচৰটোৱে উচ্চতম ন্যায়ালয়ৰ মজিয়া পায়গৈ।
বিচাৰপীঠে লক্ষ্য কৰে যে ২০০০ চনৰ পৰা ২০২৩ চনলৈকে ৰাজ্য চৰকাৰ একপ্ৰকাৰ “নিদ্ৰামগ্ন” হৈ আছিল। কেৱল আদালতৰ হেঁচাৰ পিছতহে চৰকাৰে কাম আৰম্ভ কৰিছে। ২০০০ চনত উত্তৰাখণ্ডত গঠন হোৱাৰ পিছত চৰকাৰক নিজৰ মাটি পুনৰ উদ্ধাৰ কৰিবলৈ আদালতৰ আদেশৰ প্ৰয়োজন কিয় হ’ল, তাক লৈও বিচাৰপীঠে প্ৰশ্ন উত্থাপন কৰে।
উল্লেখ্য যে ২০২৫ চনৰ ২২ ডিচেম্বৰত আদালতে উক্ত মাটিত সকলো ধৰণৰ নতুন নিৰ্মাণত নিষেধাজ্ঞা আৰোপ কৰি খালী ভূমিখিনি চৰকাৰীভাৱে অধিগ্ৰহণ কৰিবলৈ নিৰ্দেশ দিছিল।
