আদালত চৌহদত মহিলা আৰু তৃতীয় লিংগৰ ব্যক্তিসকলৰ যৌন নিৰ্যাতন প্ৰতিৰোধৰ বাবে ‘লিংগ সংবেদনশীলতা আৰু অন্তৰীণ অভিযোগ সমিতি’ (GSICC) গঠনৰ সন্দৰ্ভত মঙলবাৰে উচ্চতম ন্যায়ালয়ে এক গুৰুত্বপূৰ্ণ নিৰ্দেশ দিয়ে। মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ বিচাৰপীঠে দেশৰ সকলো উচ্চ ন্যায়ালয়ৰ পঞ্জীয়ক প্ৰধানক (Registrars General) এই সন্দৰ্ভত প্ৰতিবেদন দাখিল কৰিবলৈ নিৰ্দেশ দিছে।
অধিবক্তা গীতা ৰাণীয়ে দাখিল কৰা এখন ৰিট আবেদনৰ শুনানি গ্ৰহণ কৰি বিচাৰপীঠে এই নিৰ্দেশ প্ৰদান কৰে। আবেদনখনত দেশৰ সকলো পৰ্যায়ৰ আদালততে ‘বিশাখা নিৰ্দেশনাৱলী‘ (Vishaka Guidelines) সম্পূৰ্ণৰূপে কাৰ্যকৰী কৰাৰ লগতে অন্তৰীণ অভিযোগ সমিতি গঠনৰ দাবী জনোৱা হৈছে।
উচ্চতম ন্যায়ালয়ে উচ্চ ন্যায়ালয়ৰ প্ৰশাসনিক মুৰব্বীক স্পষ্ট কৰি দিছে যে, উচ্চ ন্যায়ালয়, জিলা আদালত, ট্ৰাইবিউনেল আৰু বাৰ এছ’চিয়েশ্যনসমূহত লিংগ সংবেদনশীলতা তথা যৌন নিৰ্যাতন বিৰোধী সমিতি গঠন কৰা হৈছে নে নাই, তাৰ এক বিতং প্ৰতিবেদন দাখিল কৰিব লাগিব।
শুনানিৰ সময়ত আবেদনকাৰীৰ হৈ হাজিৰ হোৱা জ্যেষ্ঠ অধিবক্তা চনীয়া মাথুৰে এখন তালিকাৰ জৰিয়তে আদালতক অৱগত কৰে যে, এতিয়াও দেশৰ সাতখন উচ্চ ন্যায়ালয়ত এই সন্দৰ্ভত কোনো নিৰ্দেশনা বা নিয়মাৱলী প্ৰস্তুত কৰা হোৱা নাই।
সংবিধানৰ অনুচ্ছেদ ৩২-ৰ অধীনত দাখিল কৰা এই আবেদনত গীতা ৰাণীয়ে দেশৰ সকলো আদালতত মহিলা অধিবক্তা, ইণ্টাৰ্ণ, বিচাৰপ্ৰাৰ্থী আৰু আন কৰ্মচাৰীসকলৰ বাবে সমতা, মৰ্যাদা আৰু সুৰক্ষিত কৰ্ম পৰিৱেশ সুনিশ্চিত কৰিবলৈ দাবী জনাইছে। তেওঁ উল্লেখ কৰে যে উচ্চতম ন্যায়ালয়ত ইতিমধ্যে এনে এক শক্তিশালী লিংগ সংবেদনশীলতা সমিতি কাৰ্যক্ষম হৈ আছে।
