শুকুৰবাৰে উৎকোচ গ্ৰহণৰ অপৰাধত দোষী সাব্যস্ত হোৱা বিহাৰৰ চৰকাৰী বিষয়াৰ শাস্তি স্থগিত ৰাখিছে উচচতম ন্যায়ালয়ে। স্থগিতাদেশ দিয়াৰ সময়ত আদালতে বিস্ময় প্ৰকাশ কৰি কয় যে গোচৰৰ কেন্দ্ৰবিন্দুত থকা আৰু জব্দ কৰা নোটবোৰ নিগনিয়ে খাই (আদালতৰ নিজৰ ৰেকৰ্ড অনুসৰি) নষ্ট কৰি পেলাইছে।
ন্যায়াধীশ জে বি পাৰ্দিৱালা আৰু কে ভি বিশ্বনাথনৰ বিচাৰপীঠে চৰকাৰী বিষয়া অৰুণা কুমাৰীক জামিন মঞ্জুৰ কৰি দোষী সাব্যস্ত কৰা ৰায় স্থগিত ৰাখে। ঘটনাৰ সময়ত অৰুণা কুমাৰীয়ে বিহাৰত ‘শিশু উন্নয়ন কাৰ্যসূচী বিষয়া’ হিচাপে কৰ্মৰত আছিল। পৰৱৰ্তী সময়ত বিষয়টোৰ সবিশেষ শুনানি গ্ৰহণ কৰা হ’ব বুলি উচ্চতম ন্যায়ালয়ে জানিবলৈ দিয়ে।
বিচাৰপীঠে মন্তব্য কৰে যে, “জব্দ কৰা নোটসমূহ নিগনিয়ে কুটি নষ্ট কৰা বুলি জানি আমি স্তম্ভিত হৈছো। এয়া ৰাজ্যৰ ৰাজহৰ বাবে ডাঙৰ ক্ষতি আৰু এনে কাণ্ডই স্বাভাৱিকতে বিভিন্ন প্ৰশ্নৰ উত্থাপন কৰে।”
আদালতে লগতে কয় যে নোটসমূহ নষ্ট হোৱাৰ বাবে যি ব্যাখ্যা দিয়া হৈছে সেয়া তেওঁলোকৰ বাবে বিশ্বাসযোগ্য বুলি মনে ধৰা নাই।
তদানীত্বন ‘শিশু উন্নয়ন কাৰ্যসূচী বিষয়া’ কুমাৰীৰ বিৰুদ্ধে দহ হাজাৰ টকাৰ উৎকোচ দাবী কৰাৰ অভিযোগ উত্থাপন হৈছিল। তেওঁৰ বিৰুদ্ধে ‘দুৰ্নীতি প্ৰতিৰোধ আইন’ৰ অধীনত গোচৰ ৰুজু কৰা হৈছিল। নিম্ন আদালতে তেওঁক দোষমুক্ত কৰে যদিও পাটনা উচ্চ ন্যায়ালয়ে সেই ৰায় বাতিল কৰি কাৰাদণ্ডৰ শাস্তি প্ৰদান কৰে।
পাটনা উচ্চ ন্যায়ালয়ে নিজৰ ৰায়দানত মানি লৈছিল যে জব্দ কৰা নোটবোৰ নিগনিয়ে ধ্বংস কৰি পেলোৱাৰ বাবে আদালতত প্ৰমাণ হিচাপে দাখিল কৰিব নোৱাৰিলে। কিন্তু আদালতে মতামত ব্যক্ত কৰে যে ‘প্ৰপাৰ্টি ৰুম ৰেজিষ্টাৰ’ বা ভঁৰালৰ ৰেকৰ্ডত জমা হোৱা উৎকোচৰ ধনৰ উল্লেখ বিষয়াজনক দোষী সাব্যস্ত কৰিবলৈ যথেষ্ট। উৎকোচৰ নোটৰ অনুপস্থিতিয়ে ন্যায়পালিকাত গোচৰটো দুৰ্বল নহয় বুলিও উল্লেখ কৰে আদালতে।
উচ্চতম ন্যায়ালয়ে এতিয়া সম্পূৰ্ণ শুনানিৰ অপেক্ষাত উচ্চ ন্যায়ালয়ৰ সেই সিদ্ধান্তৰ ওপৰত স্থগিতাদেশ জাৰি কৰিছে।
