ভাৰতৰ উচ্চতম ন্যায়ালয়ে গৰাকীবিহীন পথৰ কুকুৰ(Stray Dog) পৰিচালনা সম্পৰ্কীয় এক গুৰুত্বপূৰ্ণ গোচৰৰ শুনানি অহা ৩ নৱেম্বৰ, সোমবাৰে গ্ৰহণ কৰিব। আদালতৰ নিৰ্দেশ অমান্য কৰি গোচৰৰ প্ৰতিবেদন দাখিল নকৰাৰ বাবে উচ্চতম ন্যায়ালয়ে পশ্চিম বংগ আৰু তেলেংগানাৰ বাহিৰে সকলো ৰাজ্য আৰু কেন্দ্ৰীয় শাসিত অঞ্চলৰ মুখ্য সচিবক আদালতত হাজিৰ হ’বলৈ কঠোৰ নিৰ্দেশ দিছে। আৰু আদালতে পূৰ্বে প্ৰতিবেদন দাখিল কৰিবলৈ দিয়া নিৰ্দেশক কিয় আওকাণ কৰিলে তাৰ বাবে জবাবদিহি হ’ব লাগিব বুলি উল্লেখ কৰে ।
উল্লেখ্য যে ২৭ অক্টোবৰৰ শুনানিৰ সময়ত উচ্চতম ন্যায়ালয়ে ৰাজ্য আৰু কেন্দ্ৰীয় শাসিত অঞ্চলসমূহৰ ওপৰত তীব্ৰ অসন্তুষ্টি প্ৰকাশ কৰিছিল। আদালতে লক্ষ্য কৰিছিল যে ২২ আগষ্টত প্ৰতিবেদন দাখিল কৰিবলৈ নিৰ্দেশ দিয়া সত্ত্বেও কোনো শপতনামা দাখিল কৰা হোৱা নাই। বিচাৰপীঠে এই প্ৰতিবেদনসমূহত গৰাকীবিহীন পথৰ কুকুৰ পৰিচালনাৰ বাবে পশু জন্ম নিয়ন্ত্ৰণ (ABC) নিয়ম মানি চলিবলৈ গ্ৰহণ কৰা পদক্ষেপসমূহৰ বিষয়ে বিতংভাৱে উল্লেখ কৰিবলৈ নিৰ্দেশ দিছিল।
আনহাতে ৩১ অক্টোবৰত আদালতে মুখ্য সচিবসকলৰ ভাৰ্চুৱেলি উপস্থিত থকাৰ অনুৰোধ নাকচ কৰি আদালতৰ আদেশৰ প্ৰতি ” কোনো সন্মান” নাই বুলি কটাক্ষ কৰে।
ইয়াৰোপৰি উচ্চতম ন্যায়ালয়ৰ বিচাৰপীঠে উল্লেখ কৰে যে ২৭ অক্টোবৰৰ ভিতৰত কেৱল পশ্চিম বংগ, তেলেংগানা আৰু দিল্লী পৌৰ নিগমেহে প্ৰতিবেদন দাখিল কৰিছে।
ন্যায়াধীশ বিক্ৰম নাথ, ন্যায়াধীশ সন্দীপ মেহতা আৰু ন্যায়াধীশ এন.ভি. ৰমনাৰ তিনিজনীয়া বিচাৰপীঠে এতিয়া সকলো ৰাজ্য আৰু কেন্দ্ৰীয় শাসিত অঞ্চলে এবিচিৰ নিয়ম দেশজুৰি বলবৎ কৰাৰ ওপৰত গুৰুত্ব দিছে।
উল্লেখনীয় যে দিল্লীত শিশুসকলৰ মাজত গৰাকীবিহীন পথৰ কুকুৰে কামোৰাৰ ফলত জলাতংক ৰোগত মৃত্যু হোৱাৰ তথ্যৰ ভিত্তিত ২৮ জুলাইত এই গুৰুত্বপূৰ্ণ গোচৰটো আৰম্ভ কৰা হৈছিল।
বিচাৰপীঠে ৰাজ্যসমূহক নিয়ম মানি নচলাৰ বাবে সমালোচনা কৰি কয় যে এনেধৰণৰ দুৰ্ভাগ্যজনক ঘটনাই আন্তঃৰাষ্ট্ৰীয় পৰ্যায়ত ভাৰতৰ ভাবমূর্তি কলংকিত কৰে।
