বিভ্ৰান্তিকৰ বিজ্ঞাপন দিয়াৰ ‘পতঞ্জলি’ৰ বিৰুদ্ধে অভিযোগ উঠে। তাক লৈ আদালত অৱমাননাৰ জাননী দিয়াৰ পিছতো সেই সন্দৰ্ভত মৌনতা অৱলম্বন কৰিছে। এইবাৰ উচ্চতম ন্যায়ালয়ে যোগগুৰু ৰামদেৱক চমন জাৰি কৰিছে। উচ্চতম ন্যায়ালয়ৰ ন্যায়াধীশ হিমা কোহলী আৰু এহছানুদ্দিন আমানুল্লাহৰ বিচাৰপীঠে ৰামদেৱক সোঁশৰীৰে হাজিৰ হ’বলৈ নিৰ্দেশ দিয়ে। পতঞ্জলিৰ পৰিচালন সঞ্চালক আচাৰ্য বালকৃষ্ণকো হাজিৰ হ’বলৈ কোৱা হৈছে।
ইয়াৰ পূৰ্বে যোৱা মাহত আদালতে তীব্ৰ ভর্ৎসনা কৰিছিল ‘পতঞ্জলি’ক। তেওঁলোকৰ সামগ্ৰী সন্দৰ্ভত আদালতত দাখিল কৰা তথ্য আৰু তেওঁলোকৰ সামগ্ৰীৰ ঔষধি কাৰ্যকাৰিতা সম্পৰ্কে দিয়া বক্তব্যৰ বাবে তেওঁলোকক তীব্ৰ ভর্ৎসনা কৰা হৈছিল। বালকৃষ্ণক জাননী প্ৰেৰণ কৰা হয় যে তেওঁলোকৰ বিৰুদ্ধে আদালত অৱমাননাৰ কোনো ব্যৱস্থা কিয় লোৱা নহ’ব। জাননী ৰামদেৱলৈও যায়।
কিন্তু তাৰ পিছতো আদালতত ‘পতঞ্জলি’ৰ কোনো শপতনামা দিয়া নহ’ল। অৱশ্যে উচ্চতম ন্যায়ালয়ৰ পূৰ্বৰ নিৰ্দেশৰ পিছতে সংবাদমেল অনুষ্ঠিত কৰে। সেয়েহে আদালতত উত্তৰ কিয় দিয়া নহ’ল সেই প্ৰশ্ন উত্থাপন কৰে আদালতে।
লগতে পঢ়কঃ বায়ুসেনাৰ হেলিকপ্টাৰ ব্যৱহাৰ কৰি মোডীৰ নিৰ্বাচনী প্ৰচাৰ! নিৰ্বাচনী বিধি উলংঘাৰ অভিযোগ তৃণমূলৰ
ন্যায়াধীশসকলে প্ৰশ্ন কৰে, “এতিয়ালৈকে কোনো সঁহাৰি কিয় নাই? আদালতৰ পৰৱৰ্তী শুনানিত পৰিচালন সঞ্চালক উপস্থিত থাকিব লাগে।”
যোৱা ২৭ ফেব্ৰুৱাৰীত ইণ্ডিয়ান মেডিকেল এছ’চিয়েশ্যনে (আই এম এ) দাখিল কৰা গোচৰৰ শুনানি গ্ৰহণ কৰি আদালতে এই নিৰ্দেশ দিছিল। বিপথে পৰিচালিত বিজ্ঞাপন প্ৰচাৰৰ বাবে ‘পতঞ্জলি’ৰ বিৰুদ্ধে আই এম এয়ে গোচৰ তৰিছিল। আদালতে কয় যে পৰৱৰ্তী নিৰ্দেশ নোপোৱালৈকে ‘পতঞ্জলি’ আয়ুৰ্বেদে কোনো সামগ্ৰীৰ বিজ্ঞাপন দিব নোৱাৰিব। বজাৰত বিক্ৰী হোৱা কোনো ঔষধৰ বিৰুদ্ধে ‘পতঞ্জলি’য়ে কোনো মন্তব্য দিব নোৱাৰে বুলিও জনোৱা হয়।
আদালতে জাৰি কৰা জাননীখনত ৰামদেৱ আৰু বালকৃষ্ণ দুয়োজনেই ঔষধ আৰু নিৰাময় আইনৰ ৩ আৰু ৪ নং ধাৰা উলংঘা কৰা বুলি উল্লেখ কৰিছে, য’ত ঔষধৰ বিষয়ে বিভ্ৰান্তিকৰ বিজ্ঞাপনৰ ব্যৱস্থাৱলী আছে।
লগতে পঢ়কঃ বিজেপিৰ টিকট নাপাই বিদ্ৰোহ প্ৰাক্তন মুখ্যমন্ত্ৰীৰ; আন দলৰ সৈতে চলিছে কথা!
আদালতে জানিব বিচাৰিছে যে পতঞ্জলিৰ সহ-প্ৰতিষ্ঠাপক ৰামদেৱৰ বিৰুদ্ধে কিয় কোনো ব্যৱস্থা গ্ৰহণ কৰা নহ’ব। ‘পতঞ্জলি’ৰ হৈ আদালতত যুক্তি দিছিল মুকুল ৰোহাটগীয়ে। তেওঁ প্ৰশ্ন উত্থাপন কৰে যে ৰামদেৱক কিয় টানি অনা হৈছে। ইয়াৰ উত্তৰত আদালতে কয় যে প্ৰথমে তেওঁ আদালতত হাজিৰ হ’ব লাগিব। ইয়াৰ পিছত বাকী কথা দেখা যাব।
