বহু প্ৰত্যাশিত তামিল ছবি ‘কৰুপ্পু’ মুক্তিক কেন্দ্ৰ কৰি দক্ষিণ ভাৰতীয় চলচ্চিত্ৰ জগতখনত এক নাটকীয় মোৰ লৈছে। আজি বৃহস্পতিবাৰে ছবিগৃহত মুক্তি পোৱাৰ কথা আছিল যদিও ইয়াৰ প্ৰযোজক এছ আৰ প্ৰভুৱে শেষ মুহূৰ্তত অনিবাৰ্য কাৰণত পুৱা ৯ বজাৰ অনুষ্ঠান বাতিল কৰাৰ কথা ঘোষণা কৰিছে।
নৱনিৰ্বাচিত মুখ্যমন্ত্ৰী বিজয়ৰ বিশেষ অনুমতিৰ পিছতো শ্বো বাতিলৰ এই সিদ্ধান্তই অনুৰাগীৰ মাজত চৰম ক্ষোভ আৰু হতাশা বিয়পাইছে।
মুক্তিৰ মাত্ৰ কেইঘণ্টামান পূৰ্বে ছ’চিয়েল মিডিয়া এক্সত দিয়া এটা বাৰ্তাত প্ৰযোজকগৰাকীয়ে কয় যে কিছুমান অভাৱনীয় পৰিস্থিতিৰ বাবে পুৱা ৯ বজাৰ শ্বো বাতিল কৰিবলগীয়া হৈছে।
ইয়াৰ পূৰ্বে যোৱা মঙলবাৰে মুখ্যমন্ত্ৰী বিজয়ে ছবিখনৰ বিশেষ প্ৰদৰ্শনৰ অনুমতি দিছিল, যিটো শেহতীয়া সময়ত তামিলনাডু চৰকাৰৰ এক ব্যতিক্ৰমী সিদ্ধান্ত। সাধাৰণতে আইন-শৃংখলাৰ পৰিস্থিতিৰ প্ৰতি লক্ষ্য ৰাখি ডাঙৰ বাজেটৰ ছবিবোৰ পুৱা বা পুৱাৰ ভাগত দেখুৱাবলৈ দিয়া নহয়। অৱশ্যে প্ৰথম দুদিনতে ছবিখন পাঁচটা শ্বো চলাবলৈ অনুমতি দিয়া হৈছিল।
অনলাইন বুকিঙৰ সমস্যা দেখি বুধবাৰে নিশা ছবিখনৰ পৰিচালক আৰ জে বালাজীয়ে অনুৰাগীসকলক ধৈৰ্য্য ধৰিবলৈ অনুৰোধ জনায়। তেওঁ উল্লেখ কৰে যে বিগত ৩২ মাহ ধৰি ছবিখনে বিভিন্ন উত্থান-পতনৰ মাজেৰে মুক্তিৰ পোহৰ দেখা পাইছে আৰু প্ৰডাকচন কোম্পানীয়ে বৰ্তমানৰ সংকট দূৰ কৰিবলৈ যৎপৰোনাস্তি চেষ্টা চলাইছে।
অৱশ্যে এই জটিলতা কেৱল তামিলনাডু বা আন ৰাজ্যৰ থিয়েটাৰৰ ক্ষেত্ৰতো প্ৰযোজ্য নেকি সেই সম্পৰ্কে নিৰ্মাতাসকলৰ পৰা কোনো স্পষ্ট ব্যাখ্যা নাই।
আৰ জে বালাজীয়ে ৰচনা আৰু পৰিচালনা কৰা ‘কৰুপ্পু’ত জনপ্ৰিয় তাৰকা সূৰিয়া আৰু তৃষা কৃষ্ণনৰ যুটী আছে। ইয়াৰ উপৰিও ইন্দ্ৰানস, নাটি আৰু স্বোৱাসিকেও গুৰুত্বপূৰ্ণ ভূমিকাত অভিনয় কৰিছে।
সাই অভয়ংকৰৰ সংগীতৰ এই ছবিখনক লৈ অনুৰাগীসকলৰ মাজত উন্মাদনা তুংগত আছে যদিও মুক্তিৰ আৰম্ভণিতে এনেধৰণৰ বিপৰ্যয়ৰ বাবে ছ’চিয়েল মিডিয়াত সমালোচনাৰ ধুমুহাৰ সৃষ্টি কৰিছে। আনকি বহুতে শ্বো বাতিলৰ বাবে ছবিখনৰ মুক্তি পিছুৱাই দিবলৈও দাবী জনাইছে। এতিয়াৰ ৯ বজাৰ শ্বো বাতিল হোৱাৰ পিছত পৰৱৰ্তী প্ৰদৰ্শনীক লৈ চিন্তিত হৈ পৰিছে দৰ্শক।
