পুৱাই আমেৰিকাত সংঘটিত হৈছে এক চাঞ্চল্যকৰ ঘটনা। হোয়াইট হাউছৰ সন্মুখত গুলীচালনা কৰে এজন লোকে। অভিযোগ অনুসৰি হোয়াইট হাউছৰ বাহিৰত থকা আমেৰিকাৰ চিক্ৰেট চাৰ্ভিছৰ চেকপইণ্টলৈ আহি ব্যক্তিজনে নিৰ্বিচাৰে গুলীচালনা কৰে। চিক্ৰেট চাৰ্ভিছৰ প্ৰত্যুত্তৰত গুলীবিদ্ধ হৈ আততায়ীৰ মৃত্যু ঘটে।
প্ৰাথমিক তদন্তত জানিব পৰা গৈছে যে সন্দেহজনক লোকজনে চেকপইণ্টৰ কাষ চাপি বেগ এটাৰ পৰা বন্দুক উলিয়াই তাত নিয়োজিত বিষয়াসকলৰ ওপৰত গুলীচালনা আৰম্ভ কৰে।
সুৰক্ষাৰ স্বাৰ্থত চিক্ৰেট চাৰ্ভিছৰ বাহিনীয়ে গুলীচালনা কৰি আক্ৰমণকাৰীক নিহত কৰে। গুৰুতৰভাৱে আঘাতপ্ৰাপ্ত হৈ তেওঁক চিকিৎসালয়লৈ লৈ যোৱা হয় আৰু চিকিৎসকে তেওঁক মৃত ঘোষণা কৰে।
অৱশ্যে গুলীচালনাৰ সময়ত এজন পথচাৰীও গুলীবিদ্ধ হোৱা বুলি জানিব পৰা গৈছে। যদিও লোকজনক আক্ৰমণকাৰীয়ে গুলীয়াইছিল নে আৰক্ষীয়ে সেয়া এতিয়াও স্পষ্ট হোৱা নাই। আহত ব্যক্তিজনৰ শাৰীৰিক অৱস্থা সন্দৰ্ভত ততাতৈয়াকৈ কোনো তথ্য পোৱা হোৱা নাই।
আমেৰিকাৰ সময় অনুসৰি শনিবাৰে সন্ধিয়া সংঘটিত হয় এই আক্ৰমণ। একাধিক সংবাদ মাধ্যমৰ সূত্ৰৰ মতে, আক্ৰমণৰ সময়ত আমেৰিকাৰ ৰাষ্ট্ৰপতি ড’নাল্ড ট্ৰাম্প হোয়াইট হাউছৰ ভিতৰত আছিল।
সেই সময়ত ঘটনাস্থলীত উপস্থিত থকা এগৰাকী সাংবাদিকৰ মতে হোয়াইট হাউছৰ চৌহদৰ বাহিৰত প্ৰায় ২৫টা বন্দুকৰ গুলীৰ শব্দ শুনা গৈছিল। কিন্তু আৰক্ষী আৰু চিক্ৰেট চাৰ্ভিছৰ বাহিনীয়ে শীঘ্ৰে সমগ্ৰ অঞ্চলটো নিয়ন্ত্ৰণ কৰিবলৈ লয়। বৰ্তমান হোয়াইট হাউছৰ আশে-পাশে থকা অঞ্চলত নিশ্চিদ্ৰ তালাচী চলি আছে।
ইপিনে, আক্ৰমণৰ কিছু সময়ৰ পিছতে আক্ৰমণকাৰীৰ পৰিচয়ো পোহৰলৈ আহে। জানিব পৰা মতে অভিযুক্তৰ নাম নাছিৰ বেষ্ট। সূত্ৰ অনুসৰি তেওঁৰ বয়স মাত্ৰ ২১ বছৰ। আক্ৰমণকাৰীয়ে কিয় এই আক্ৰমণ সংঘটিত কৰিছিল আৰু তেওঁৰ উদ্দেশ্য কি আছিল সেয়া এতিয়াও স্পষ্ট হোৱা নাই।
সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে, লগতে এফ বি আইৰ এটা দলো ঘটনাস্থলীত উপস্থিত হৈছে। নিৰাপত্তা আৰু অধিক শক্তিশালী কৰাৰ বাবে হোৱাইট হাউছৰ চাদত স্নাইপাৰ বাহিনী নিয়োগ কৰা হৈছে।
