আলফা স্বাধীনত বহু সংখ্যক নতুন যুৱক-যুৱতী যোগদানৰ বাতৰিয়ে অসম তোলপাৰ লগাই থকাৰ সময়তে আজি তিনিচুকীয়া জিলাৰ জাগুনৰ পৰা এজন লোকক আলফা স্বাধীনে অপহৰণ কৰা বুলি সন্দেহ কৰা হৈছে।
আৰক্ষীয়ে এই পৰ্য্যন্ত ঘটনাটোত জড়িত পক্ষটো নিশ্চিত কৰা নাই যদিও আঁৰত আলফা (স্বাঃ)ই থাকিব পাৰে বুলি সন্দেহ প্ৰকাশ কৰিছে।
ঘটনাটোৰ সন্দৰ্ভত আৰক্ষীৰ সূত্ৰই কয় যে আজি সন্ধ্যা ৫:৩০ বজাত তিনিচুকীয়া জিলাৰ মাৰ্ঘেৰিটা মহকুমাৰ জাগুনৰ এটা শিলভঙা উদ্যোগৰ মেনেজাৰ অপূৰ্ব কাকতীক(৩০) ৩ জনীয় সন্দেহযুক্ত আলফা স্বাধীনৰ দলে অপহৰণ কৰি লৈ যায়।
এই ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে। আৰক্ষীয়ে ঘটনাটোৰ তদন্ত অব্যাহত ৰাখিছে যদিও এতিয়াও কাকো গ্ৰেপ্তাৰ কৰা নাই বা অপহৰণকাৰীৰ শুংসূত্ৰ পোৱা নাই।
স্থানীয় লোকে জনোৱামতে, জাগুনৰ ১০ মাইলস্থিত এই শিলভঙা উদ্যোগটো ডিগবৈ ৰামনগৰ নিৱাসী ব্যৱসায়ী বিজয় বৰাৰ। উদ্যোগটোলৈ আজি সন্ধিয়াৰ ভাগত ৩জনীয় সশস্ত্ৰ দলৰ আগমন ঘটে। সন্দেহযুক্ত আলফা (স্বাঃ) উগ্ৰপন্থী দলটোৱে সেই সময়ত কৰ্তব্যত থকা ডিগবৈৰ ৰামনগৰ নিৱাসী অপূৰ্ব কাকতী(৩০)ক অপহৰণ কৰি লৈ যায়।
ঘটনাটোৰ পাছতেই উদ্যোগটোৰ কৰ্মচাৰীয়ে জাগুন আৰক্ষীক খবৰ দিয়ে। আৰক্ষী ঘটনাস্থলীত উপস্থিত হৈ অনুসন্ধান আৰম্ভ কৰিছে।
আন এটা অনিৰ্ভৰযোগ্য সূত্ৰই জানিবলৈ দিয়া মতে শিলভঙা উদ্যোগটোৰ মালিক বিজয় বৰাক সন্দেহযুক্ত আলফা স্বাধীনে ধন দাবী কৰিছিল। কিন্তু দাবী কৰা ধন নিদিয়াৰ বাবেই কৰ্মচাৰীক অপহৰণ কৰিলে।
উল্লেখযোগ্য যে এই বছৰটোৰ ভিতৰতে ইতিপূৰ্বে জাগুনৰ দুজনকৈ ব্যৱসায়ীৰ কৰ্মচাৰী আৰু এজনৰ পুত্ৰক আলফা স্বাধীনে অপহৰণ কৰিছিল।
স্থানীয় লোকৰ মতে, পৰৱৰ্তী সময়ত এই অপহৃত লোকসকলক বৃহৎ পৰিমাণৰ ধনৰ বিনিময় আলফা স্বাধীনে মুকলি কৰি দিছিল।
