সকলো জল্পনা-কল্পনাৰ অন্ত পৰিল। প্ৰধানমন্ত্ৰী নৰেন্দ্ৰ মোডী, কেন্দ্ৰীয় গৃহমন্ত্ৰী অমিত শ্বাহ আৰু বিজেপি শাসিত ৰাজ্যৰ বহুকেইজন মুখ্যমন্ত্ৰীৰ উপস্থিতিত ব্ৰিগেডত ইতিহাস ৰচনা কৰিলে বিজেপিয়ে। শুভেন্দু অধিকাৰীয়ে পশ্চিমবংগৰ নতুন মুখ্যমন্ত্ৰী হিচাপে শপত গ্ৰহণ কৰিলে। ৪ মে’ত ফলাফল ঘোষণা হোৱাৰ পিছৰে পৰা ৰাজ্যৰ ৰাজনীতিত প্ৰত্যাশিতভাৱেই দিল্লীৰ আশীৰ্বাদ পালে শুভেন্দুৱে।
শনিবাৰে তেওঁৰ মন্ত্ৰীসভাৰ প্ৰথম পাঁচজন সদস্যই শুভেন্দু অধিকাৰীৰ সৈতে শপত গ্ৰহণ কৰে। তেওঁলোক হৈছে, খড়গপুৰ সদৰৰ পৰা বিজয়ী বিধায়ক দিলীপ ঘোষ। তেওঁ শুভেন্দুৰ পিছত শপত লোৱা দ্বিতীয়জন ব্যক্তি। ইয়াৰ পিছত অগ্নিমিত্ৰ পাল। আছানছল দক্ষিণৰ পৰা বিজয়ী হৈ বিধানসভালৈ অহা অগ্নিমিত্ৰই আজি কেবিনেট মন্ত্ৰী হিচাপে শপত গ্ৰহণ কৰে।
ইয়াৰ বাহিৰেও তাত আছিল বনগাঁও উত্তৰৰ বিধায়ক অশোক কীৰ্তনীয়া। মন্ত্ৰীসভাত মতুৱা গড়ৰ পৰা ডাঙৰ প্ৰতিনিধিত্ব। বাংকুৰাৰ ৰাণীবান্ধৰ পৰা জনজাতীয় মুখ বিধায়ক খুদিৰাম টুডুৱে মন্ত্ৰীসভাত স্থান পালে। শেষত আছিল নিশিথ প্ৰমানিক। কোচবিহাৰৰ মাথাভংগাৰ পৰা জয়লাভ কৰি পোনপটীয়াকৈ মন্ত্ৰীসভাত স্থান পাইছে নিশিথে।
অৱশ্যে এই প্ৰথম দিনাৰ শপত গ্ৰহণত কোনো নিৰ্দিষ্ট বিভাগ কাকো বিতৰণ কৰা নহ’ল। নবান্নত অনুষ্ঠিত হোৱা প্ৰথমখন কেবিনেট বৈঠকৰ পিছত কোনে কোনটো দপ্তৰ লাভ কৰিব সেয়া স্পষ্ট হ’ব।
শুকুৰবাৰে বিজেপিৰ বিধায়িনী দলৰ বৈঠকৰ অন্তত স্বয়ং গৃহমন্ত্ৰী অমিত শ্বাহে স্পষ্ট কৰি দিয়ে যে শুভেন্দু কিয় প্ৰথম পছন্দ। শ্বাহে কয় যে বিধায়িনী দলৰ নেতা নিৰ্বাচনত বাৰে বাৰে মাত্ৰ এটা নামহে ওলাই আহিছে। সেই নাম শুভেন্দু অধিকাৰী। কোনেও দ্বিতীয় নাম প্ৰস্তাৱ কৰা নাই। প্ৰধানমন্ত্ৰী আৰু গৃহমন্ত্ৰীয়ে নিৰ্বাচনৰ পূৰ্বে আশ্বাস দিছিল যে পশ্চিমবংগৰ এজন স্থানীয় লোক আৰু বাংলা মাধ্যমত অধ্যয়ন কৰা কোনোবা এজনক মুখ্যমন্ত্ৰী হিচাপে নিযুক্তি দিয়া হ’ব। সেই প্ৰতিশ্ৰুতি পালন কৰি দিল্লীয়ে মেদিনীপুৰৰ ভূমিপুত্ৰৰ হাতত শাসনভাৰ গতাই দিলে।
শুভেন্দু অধিকাৰীয়ে একেলগে দুটা হেভিৱেট সমষ্টি নন্দীগ্ৰাম আৰু ভৱানীপুৰৰ পৰা জয়লাভ কৰি ইতিহাস ৰচনা কৰিছে। আজিৰ শপত গ্ৰহণ অনুষ্ঠানে পুনৰবাৰ প্ৰমাণ কৰিলে যে দলৰ ভিতৰত তেওঁৰ আধিপত্য নিঃসন্দেহে প্ৰশ্নাতীত। ২০৭খন আসন লৈ ক্ষমতালৈ অহা বিজেপিৰ প্ৰধান সেনাপতিগৰাকী এতিয়া মছনদত।
অৱশ্যে এই উন্মাদনাৰ মাজতে এটা অনুপস্থিতিয়ে চকু কপালত তুলিছে। উত্তৰ বংগৰ বিজেপিৰ অন্যতম মুখ তথা শিলিগুৰিৰ বিধায়ক শংকৰ ঘোষ মন্ত্ৰীসভাৰ প্ৰথম তালিকাত নাই। কিন্তু ৰাজনৈতিক মহলৰ এটা অংশৰ মতে উত্তৰ বংগত কেবিনেটৰ পৰৱৰ্তী সম্প্ৰসাৰণত অধিক প্ৰতিনিধিত্ব দেখা যাব পাৰে।
