আফগানিস্তানৰ গণতান্ত্ৰিক চৰকাৰৰ পতন ঘটাই তালিবানে শাসনভাৰ নিজৰ হাতলৈ অনাৰ ৪ বছৰৰ পাছত অহা সপ্তাহত তালিবানৰ ‘বিদেশ মন্ত্ৰী’ আমিৰ খান মুত্তাকীয়ে ভাৰত ভ্ৰমণ কৰিব। দুহেজাৰ একৈশ চনৰ ১৫ আগষ্টত তালিবানে কাবুল দখল কৰাৰ পিছৰে পৰা অত্যাৱশ্যকীয় ঔষধ আৰু কৃষিজাত সামগ্ৰীৰ অভাৱত ভোগা আফগানিস্তানৰ বাবে সাহায্য বিচাৰি এই ভ্ৰমণ কৰা হ’ব বুলি সূত্ৰই জানিবলৈ দিয়ে।
কিছুদিনৰ পৰা এই ভ্ৰমণৰ গুণাগঁথা চলি আছিল যদিও মুত্তকীৰ বিৰুদ্ধে থকা আন্তৰ্জাতিক প্ৰতিবন্ধকতাৰ বাবে এয়া সম্ভৱ হৈ উঠা নাছিল। উল্লেখ্য যে, ২০০১ চনৰ শীতকালৰ পৰা আফগানিস্তানত তালিবানে আমেৰিকা আৰু উত্তৰ আটলাণ্টিক সন্ধি সংস্থাৰ (নাটো) সেনাবাহিনীৰ বিৰুদ্ধে চলোৱা হিংসাত্মক সংগ্ৰামৰ বাবে মুত্তকীৰ লগতে আন কেইবাজনো তালিবান নেতাৰ ওপৰত আন্তঃৰাষ্ট্ৰীয় নিষেধাজ্ঞা আৰোপ কৰা হৈছিল। যাৰ কাৰণে ভাৰতে এই ভ্ৰমণৰ বাবে কিছু বিবেচনা কৰিবলগীয়া হৈছিল।
তালিবানৰ সৈতে ভাৰতৰ কূটনৈতিক সম্পৰ্ক স্বাভাৱিক কৰাৰ ক্ষেত্ৰত এটা ডাঙৰ বাধা হৈছে আফগানিস্তানৰ মহিলাসকলৰ শিক্ষা আৰু নিয়োগৰ সুবিধা বন্ধ কৰাৰ ক্ষেত্ৰত সন্ত্ৰাসবাদী গোটতোৰ অনমনীয় স্থিতি। তদুপৰি তালিবানে যুদ্ধবন্দীসকলৰ সৈতে কৰা ব্যৱহাৰকে ধৰি অন্যান্য মানৱ অধিকাৰৰ বিষয়সমূহো ইয়াৰ সৈতে জড়িত হৈ আছে। জানিব পৰা মতে ৩০ ছেপ্টেম্বৰত ৰাষ্ট্ৰসংঘৰ নিৰাপত্তা পৰিষদৰ নিষেধাজ্ঞা সমিতিয়ে জাৰি কৰা “সাময়িক ৰেহাই”ৰ বাবে অৱশেষত মুত্তাকীৰ ভাৰত ভ্ৰমণৰ পৰিকল্পনা সফল কৰি তুলিব পৰা গ’ল।
সূত্ৰই জানিবলৈ দিয়া মতে, ১০ অক্টোবৰত মুত্তাকী ভাৰতত উপস্থিত হোৱাৰ সম্ভাৱনা আছে।
স্মৰ্তব্য যে, ভাৰতে কাবুলত তালিবান শাসনক স্বীকৃতি প্ৰদান কৰা নাই যদিও বিগত সময়ত মুত্তাকীয়ে কেইবাজনো ভাৰতীয় বিষয়াক সাক্ষাৎ কৰিছে। জানুৱাৰী মাহত তেওঁ ডুবাইত বৈদেশিক সচিব বিক্ৰম মিশ্ৰীক সাক্ষাৎ কৰিছিল। ইৰাণৰ চাবাহাৰ বন্দৰৰ জৰিয়তে ভাৰত-আফগানিস্তানৰ সহযোগিতা বৃদ্ধিৰ বিষয়ে আলোচনা কৰাৰ সময়তো তালিবানৰ সৈতে মিশ্ৰী যোগাযোগত আছিল।
