হিন্দী বনাম আঞ্চলিক ভাষাৰ বিতৰ্ক নতুন কথা নহয়। কেন্দ্ৰীয় গৃহমন্ত্ৰী অমিত শ্বাহৰ নেতৃত্বত চৰকাৰী ভাষা সম্পৰ্কীয় সংসদীয় সমিতিয়ে ইংৰাজীৰ পৰিৱৰ্তে হিন্দীক চৰকাৰী ভাষা কৰাৰ পৰামৰ্শ দিছে। তাৰমাজতে তামিলনাডু চৰকাৰে মঙলবাৰে তামিলনাডু বিধানসভাত কেন্দ্ৰৰ বিৰুদ্ধে “হিন্দী আগ্ৰাসনৰ” অভিযোগ আনি এক প্ৰস্তাৱ উত্থাপন কৰে। বিজেপি বিধায়কসকলে তেতিয়া সদনৰ পৰা ওলাই যায়।
অমিত শ্বাহে কিছুদিন পূৰ্বে ৰাষ্ট্ৰপতি দ্ৰৌপদী মুৰ্মুৰ ওচৰত সমিতিৰ প্ৰতিবেদন দাখিল কৰিছিল। সমিতিৰ প্ৰতিবেদনত স্পষ্ট প্ৰস্তাৱ দিয়া হৈছে যে ৰাষ্ট্ৰসংঘত ভাৰতৰ চৰকাৰী ভাষা হ’ব লাগে হিন্দী। আকৌ চৰকাৰী শিক্ষানুষ্ঠান অৰ্থাৎ কেন্দ্ৰীয় বিদ্যালয়ৰ পৰা আইআইটি আৰু কেন্দ্ৰীয় বিশ্ববিদ্যালয়লৈকে শিক্ষাদানৰ ভাষাও হিন্দী হ’ব লাগে।
তদুপৰি, হিন্দীভাষী ৰাজ্যসমূহত হিন্দীক উচ্চ ন্যায়ালয়ৰ কামৰ ভাষা কৰিব লাগে। লগতে চৰকাৰী চাকৰিৰ পৰীক্ষাত বাধ্যতামূলক ইংৰাজীৰ ঠাইত এইবাৰ হিন্দীক ৰাখিব লাগিব। কেন্দ্ৰীয় সমিতিয়ে এনে ধৰণৰ বহুতো প্ৰস্তাৱ দিছে। তেতিয়াৰ পৰা, হিন্দী আগ্ৰাসনৰ অভিযোগ বাঢ়ি আহিছে।
এনে পৰিস্থিতিত, মঙলবাৰে তামিলনাডু বিধানসভাত এটা প্ৰস্তাৱ উত্থাপন কৰা হয়। তাত কোৱা হৈছে যে সদনে সংসদীয় সমিতিৰ প্ৰস্তাৱক লৈ উদ্বেগ প্ৰকাশ কৰিছে। লগতে কোৱা হৈছে যে সংসদীয় সমিতিৰ প্ৰতিবেদন অনুসৰি কেন্দ্ৰই তেনে কোনো পদক্ষেপ লোৱা উচিত নহয়। কাৰণ ই ৰাজ্যৰ ভাষাসমূহৰ বিৰোধী। লগতে যিসকলে সেই ভাষা কয় তেওঁলোকৰো বিৰোধী।
সাম্প্ৰতিক সময়ত, কেন্দ্ৰৰ বিৰুদ্ধে বাৰে বাৰে হিন্দী আগ্ৰাসনৰ অভিযোগ উত্থাপিত হৈছে। অমিত শ্বাহে চৰকাৰী কাম আৰু যোগাযোগৰ মাধ্যম হিচাপে ইংৰাজীৰ পৰিৱৰ্তে হিন্দীৰ ব্যৱহাৰ বৃদ্ধি কৰাৰ বাবে প্ৰস্তাৱ দিয়াৰ পিছত সমগ্ৰ দেশতে বিতৰ্কৰ সৃষ্টি হৈছিল। বিশেষকৈ দক্ষিণৰ ৰাজ্যসমূহক তীব্ৰ নিন্দা কৰা দেখা গৈছিল।
তামিলনাডুৰ মুখ্যমন্ত্ৰী এম কে ষ্টালিনক প্ৰধানমন্ত্ৰী মোডীৰ সৈতে উপস্থিত থকা মঞ্চত কোৱা শুনা গৈছিল, “তামিলকো হিন্দীৰ দৰে কামৰ ভাষা হিচাপে ঘোষণা কৰা উচিত। আৰু মাদ্ৰাজ উচ্চ ন্যায়ালয়েও ইয়াক চৰকাৰী ভাষা হিচাপে গঢ়ি তুলিব লাগে।”
ইপিনে, অসমত চৰকাৰী পক্ষই হিন্দীৰ সপক্ষে মত প্ৰকাশ কৰা দেখা যায়। স্বয়ং ৰাজ্যৰ মুখ্যমন্ত্ৰীয়ে হিন্দীৰ সপক্ষে মন্তব্য কৰিবলৈ গৈ কৈছে যে হিন্দী নাজানিলে ৰাজ্যৰ যুৱক-যুৱতীসকলে চাকৰি-বাকৰি আদিত সুযোগ নাপাব। অমিত শ্বাহৰ সিদ্ধান্তৰ বিৰোধিতা কৰাৰ সাহস নোপজা চৰকাৰখনে কেবল কেন্দ্ৰৰ সকলো কথাতে হয় হুজুৰ কৰাৰ বিপৰীতে ৰাজ্যৰ স্বাৰ্থত কিবা বলিষ্ঠ পদক্ষেপ গ্ৰহণ কৰিব পাৰিবনে?
