তামিলনাডুৰ মুখ্যমন্ত্ৰী বিজয়ৰ সৈতেই থাকিব পত্নী সংগীতা; বিবাহ বিচ্ছেদৰ গোচৰ প্ৰত্যাহাৰ

তামিলনাডুৰ মুখ্যমন্ত্ৰী আৰু তামিলগা ভেট্ৰি কাঝাগামৰ মুৰব্বী চি জোচেফ বিজয় আৰু তেওঁৰ পত্নী সংগীতা স্বৰ্ণলিংগমৰ বিবাহ বিচ্ছেদৰ গোচৰ শুকুৰবাৰে প্ৰত্যাহাৰ কৰা হয়। গোচৰটো স্থগিত ৰখা হৈছে। ভাৰ্চুৱেল মাধ্যমেৰে বিচাৰ প্ৰক্ৰিয়াত অংশ লৈছিল সংগীতাই। গোচৰটো প্ৰত্যাহাৰ কৰিবলৈ তেওঁ আদালতত আবেদন দাখিল কৰে।

চলিত বৰ্ষৰ ফেব্ৰুৱাৰী মাহত সংগীতাই তামিলনাডুৰ চেংগলপট্টুৰ আদালতত তেওঁলোকৰ বিবাহ বিচ্ছেদৰ আবেদন দাখিল কৰিছিল।

বিজয় আৰু সংগীতাৰ বৈবাহিক বিবাদৰ শুনানি চলিত বৰ্ষত কেইবাবাৰো পিছুৱাই দিয়া হয়। ১৫ জুনত সংগীতাই আবেদন প্ৰত্যাহাৰ কৰাৰ ইচ্ছা প্ৰকাশ কৰাৰ সময়ত আদালতে কাৰ্য্যবিধি স্থগিত ৰাখে। সেই শুনানিৰ সময়তো তেওঁ ভাৰ্চুৱেলি উপস্থিত আছিল আৰু আদালতক নিজৰ সিদ্ধান্তৰ বিষয়ে অৱগত কৰিছিল। পিছত আদালতে পৰৱৰ্তী শুনানিৰ বাবে ৭ আগষ্ট নিৰ্ধাৰণ কৰে।

বিগত মাহত বিজয় বা সংগীতা হাজিৰ নোহোৱাত পৰিয়াল আদালতে শুনানি স্থগিত ৰাখিছিল। ইয়াৰ পূৰ্বেও দুয়োজনেই কেইবাবাৰো আদালতত অনুপস্থিত আছিল। তেওঁলোকৰ হৈ তেওঁলোকৰ অধিবক্তাই হাজিৰ হৈ আদালতত কয় যে তেওঁলোকে শাৰীৰিকভাৱে উপস্থিত থাকিবলৈ অসুবিধা হৈছে।

বিজয়ৰ সৈতে বিবাহ বিচ্ছেদ বিচাৰি সংগীতাই ৰাজ্যৰ চেংগালপট্টু পৰিয়াল আদালতত আৱেদন দাখিল কৰিছিল। তেওঁৰ আবেদনত তেওঁলোকৰ মাজত থকা অমীমাংসিত মতানৈক্যক বিবাহ বিচ্ছেদৰ ভিত্তি হিচাপে উল্লেখ কৰিছে। তেওঁ স্থায়ী ভৰণ-পোষণ আৰু বিবাহৰ সময়ত চেন্নাইৰ নীলংকাৰাইত থকা তেওঁলোকৰ যৌথ ঘৰত থকাৰ অনুমতি বিচাৰিছিল।

বিজয় আৰু সংগীতাৰ সম্পৰ্ক প্ৰায় তিনি দশক ধৰি চলিছে। ১৯৯৯ চনৰ ২৫ আগষ্টত চেন্নাইত এক পৰম্পৰাগত হিন্দু ৰীতিত বিবাহপাশত আবদ্ধ হয়। ২০০০ চনৰ ২৬ আগষ্টত তেওঁলোকৰ প্ৰথম পুত্ৰ আৰু ২০০৫ চনত এগৰাকী কন্যাৰ জন্ম হয়।

বিজয়ৰ সৈতে জড়িত কেইবাটাও গুৰুত্বপূৰ্ণ ৰাজহুৱা অনুষ্ঠানত সংগীতাৰ অনুপস্থিতিৰ পিছত ২০২৩ চনত প্ৰথমবাৰৰ বাবে তেওঁলোকৰ বৈবাহিক জীৱনত ফাট মেলাৰ বাতৰি প্ৰকাশ পাইছিল। অৱশ্যে সেই সময়ত দুয়োজনে এই উৰাবাতৰি অস্বীকাৰ কৰিছিল। কিন্তু ২০২৫ চনত টিভিকে আয়োজন কৰা দলৰ দ্বিতীয়খন ৰাজ্যিক সন্মিলনকে ধৰি বৃহৎ ৰাজনৈতিক অনুষ্ঠানত সংগীতা অনুপস্থিত হোৱাৰ পিছতে পুনৰ শিৰোণামৰ সৃষ্টি হয়।

তামিলনাডু বিধানসভা নিৰ্বাচনত টিভিকে একক বৃহত্তম দল হিচাপে আত্মপ্ৰকাশ কৰে। বিজয়ৰ দলটোৱে দশক দশক ধৰি চলি থকা ৰাজনৈতিক আধিপত্যৰ অন্ত পেলায় দ্ৰাবিড়া মুনেত্ৰ কাঝাগাম (ডি এম কে) আৰু সৰ্বভাৰতীয় আন্না দ্ৰাবিড় মুনেত্ৰ কাঝাগম (এ আই এ ডি এম কে)ৰ দৰে ডাঙৰ দলৰ।

পৰৱৰ্তী সময়ত কংগ্ৰেছ, ভাৰতীয় কমিউনিষ্ট পাৰ্টি (চিপিআই), ভাৰতীয় কমিউনিষ্ট পাৰ্টি (মাৰ্ক্সবাদী), বিথুট্থালাই চিৰুথাইগাল কট্চি (ভিচিকে) আৰু ইণ্ডিয়ান ইউনিয়ন মুছলিম লীগ (আই ইউ এম এল)ৰ সহযোগত এই দলটোৱে চৰকাৰ গঠন কৰে। ইয়াৰ ফলত কেইবাদশকৰ ভিতৰত তামিলনাডুত প্ৰথমখন মিত্ৰজোঁটৰ চৰকাৰ গঠন হয়।