ভাৰতবৰ্ষত লোকবিশ্বাস অনুসৰি বহু আৰাধ্য দেৱ-দেৱীৰ পূজা-পাৰ্বণৰ প্ৰথা পৰম্পৰাগতভাৱে পৌৰাণিক চলি আহিছে। এনে আৰাধ্য দেৱ-দেৱীৰ পৌৰাণিক মূৰ্তিৰ এক চোৰাং বজাৰ ভাৰতত বিয়পি আছে। এনে চোৰাং বেহাৰ সন্দেহতে তামিলনাডু আৰক্ষীয়ে শেহতীয়াকৈ এক অভিনৱ অভিযান চলাই ৬০০ বছৰ পুৰণি এক মূৰ্তি উদ্ধাৰ কৰিছে।
মূৰ্তি ক্ৰয় কৰা গ্ৰাহকৰ ভেশ ধৰি তামিলনাডু আৰক্ষীয়ে ইৰোড জিলাৰ বাসিন্দা আৰ এছ পালানিচামী নামৰ এগৰাকী ব্যক্তিৰ ঘৰত ভগৱান বিষ্ণুৰ এটা ৬০০ বছৰ পুৰণি মূৰ্তি উদ্ধাৰ কৰিছে।
পালানিচামীৰ ওচৰত এই মূৰ্তিটো থকা বুলি নিশ্চিত তথ্য লাভ কৰাৰ পিছত স্থানীয় আৰক্ষী থানাৰ সহকাৰী পৰিদৰ্শক ৰাজেশ পাণ্ডিয়াৰাজন, বিশেষ সহকাৰী পৰিদৰ্শক নাগেন্দ্ৰন, এগৰাকী হেড কনিষ্টবল আৰু এগৰাকী কনিষ্টবলেৰে গঠিত এটা বিশেষ আৰক্ষী দলে ক্ৰেতাৰ ভেশত তেওঁৰ ওচৰলৈ যায়।
পালানিচামীয়ে ক্ৰেতাৰূপী আৰক্ষীৰ দলটোক প্ৰতিমূৰ্তিটোৰ মূল্য ৩৩ কোটি টকা নিৰূপণ কৰে যদিও তেওঁলোকে মূৰ্তিটোৰ দৰ ১৫ কোটি টকা নিৰ্ধাৰণ কৰে আৰু কিনিবলৈ ৰাজী হয়। এই চুক্তিৰ পিছত আৰক্ষীৰ দলটো ৪ নৱেম্বৰত পালানিচামীৰ ঘৰলৈ যায়।
আৰক্ষীৰ দলটোক প্ৰতিমূৰ্তিটো বিক্ৰী কৰাৰ বাবে পালানিচামীয়ে উলিয়াই অনাৰ সময়তে দলটোৱে এই পৌৰাণিক মূৰ্তিটো জব্দ কৰে। মুঠ ২২.৮ কিলোগ্ৰাম ওজনৰ এই মূৰ্তিটো ৫৮ ছেণ্টিমিটাৰ ওখ আৰু ৩১ ছেণ্টিমিটাৰ বহল বুলি আৰক্ষীয়ে জানিবলৈ দিছে।
প্ৰাৰম্ভিক অনুসন্ধানৰ পিছত আৰক্ষীয়ে মূৰ্তিটো কৰ্ণাটকৰ মাণ্ডিয়াৰ এটা মন্দিৰৰ এগৰাকী পুৰোহিতে বিক্ৰী কৰাৰ তথ্য লাভ কৰিছে বুলি জানিবলৈ দিছে। এই তথ্যৰ আধাৰত আৰক্ষীয়ে প্ৰতিমূৰ্তিটো সেই মন্দিৰৰ সম্পদ হয় নে নহয়, সেয়া জানিবলৈ কৰ্ণাটকলৈ প্ৰেৰণ কৰাৰ ব্যৱস্থা কৰিছে।
ইৰোড জিলাৰ এগৰাকী শীৰ্ষ বিষয়াৰ ভাষ্য অনুসৰি পালানিচামীয়ে যদি প্ৰতিমূৰ্তিটোৰ সঠিক নথি-পত্ৰ দেখুৱাব নোৱাৰে, তেওঁক দোষী সাব্যস্ত কৰা হ’ব আৰু লগে লগে তেওঁক গ্ৰেপ্তাৰ কৰা হ’ব।
