যিটো সময়ত বন্যপ্ৰাণী সুৰক্ষাৰ বাবে চৰকাৰে ন ন আইন গ্ৰহণ কৰিছে, তেনে সময়তে টংলা চহৰত একাংশ চৰকাৰী বিষয়া-কৰ্মচাৰীয়ে এজোপা বাঁহ গছত আশ্ৰয় লৈ থকা প্ৰায় ৩০০ বগলী’ক অতি নিৰ্মমভাৱে হত্যা কৰা ঘটনাই তীব্ৰ চাঞ্চল্যৰ সৃষ্টি কৰিছে।
এই নিৰ্মম ঘটনা সংঘটিত হৈছে টংলা চহৰত।
টংলা চহৰৰ ১ নং ৱাৰ্ড’ৰ বাসিন্দা লোকজীৎ সুতাৰ’ৰ এজোপা বাঁহ গছত প্ৰায় তিনি শতাধিক বগলীয়ে আশ্ৰয় লৈ আছিল।
এই বগলী জাকৰ মাজত আছিল বহু পোৱালি। যাক লৈ সুতাৰৰ পৰিয়ালৰ লোকে বগলী বোৰক খাদ্য যোগান ধৰি আনন্দ লাভ কৰিছিল।
কিন্তু এই কাৰ্য্য সহ্য নহ’ল, টংলা পৌৰসভাৰ একাংশ ওভতগোৰে নচা কৰ্মচাৰীৰ।
কোনো কথা বতৰা নোহোৱাকৈ হঠাৎ লোকজীৎ সুতাৰলৈ পৌৰসভাৰ পৰা এখন জাননী জাৰি কৰা হ’ল।
জাননী’খনৰ মূল কথা হ’ল, সুতাৰে ঘৰৰ বাঁহচোপ যিকোনো প্ৰকাৰে কাটিব লাগে।
কিন্তু বৃহস্পতিবাৰে হঠাতে সূতাৰৰ পৰিয়ালৰ লোক নথকা অৱস্থাত হাতত দা-কুঠাৰ লৈ পৌৰসভাৰ লোক উপস্থিত হৈ এফালৰ পৰা বাঁহ চোপ কাটি শতাধিক বগলীক হত্যা কৰে।
এই দৃশ্যই প্ৰকৃতিপ্ৰেমী তথা স্থানীয় লোকৰ চকু সেমেকাই তোলে। এইক্ষেত্ৰত বন্যপ্ৰাণী সংৰক্ষণৰ সৈতে জড়িত সংগঠনসমূহৰ দৃষ্টি আকৰ্ষণ কৰিছে স্থানীয় বাসিন্দাসকলে।
