বিস্ময় বালক! চকু মুদিয়েই ৰুবিকছ কিউবৰ ৰং মিলাইছে অৰুণাচলৰ “চিন্তা’ই
সম্প্ৰতি ছচিয়েল মিডিয়াত এটি ভিডিঅ’ ভাইৰেল হৈ পৰিছে। টুইটাৰ জৰিয়তে ভাইৰেল হৈ পৰা এই ভিডিঅ’টোত দেখা গৈছে এজন কিশোৰৰ চমৎকাৰী প্ৰদৰ্শনৰ কলা।
ৰুবিকছ কিউবৰ (Rubik’s cube)ৰং মিলোৱাৰ খেল আমি সকলোৱে দেখিছো। কোনোৱে ৰং মিলোৱাত সফল হৈছে যদি আন কোনোৱে আকৌ চেষ্টা কৰিও বাৰে বাৰে ব্যৰ্থ হৈছে।
চকু আৰু মগজুৰ বিশেষ সংযোগৰ জৰিয়তেহে ৰং মিলোৱাৰ এই কলাত সফলতা লাভ কৰাটো সম্ভৱ। চকুৰ তীক্ষ্ণতা অবিহনে এই ৰং মিলোৱাৰ কথাটো ভাবিবই নোৱাৰি।
এনে এক আশ্বৰ্যকৰ কলা প্ৰদৰ্শন কৰি বৰ্তমান ছচিয়েল মিডিয়াত চৰ্চিত হৈ পৰিছে অৰুণাচল প্ৰদেশৰ এইগৰাকী কিশোৰে।
ছচিয়েল মিডিয়াত ভিডিঅ’টো টুইট কৰিছে ইণ্ডিয়ান ফৰেষ্ট চাৰ্ভিছৰ এগৰাকী বিষয়াই প্ৰবীণ কাছৱানে।
ছচিয়াল মিডিয়াৰ অনুৰাগীসকলৰ বাবে প্ৰবীণ কাছৱান এটি পৰিচিত নাম। ইয়াৰ পূৰ্বেও তেওঁ কেইবাবাৰো এনেধৰণৰ চমৎকাৰী ভিডিঅ’ শ্বেয়াৰ কৰিছিল।
অৱশ্যে, যোৱা ২১ ডিচেম্বৰত তেওঁ পোষ্ট কৰা ভিডিঅ’টো আছিল অন্যতম চমৎকাৰী।
Look at the sheer talents we have in our remote villages. I got this as a forward which says; He is from Arunachal pradesh, Longding District belongs to wancho tribe. Village Longkai. pic.twitter.com/Yow99pBW1g
— Parveen Kaswan, IFS (@ParveenKaswan) December 22, 2019
ভিডিঅ’টোত দেখা গৈছে যে অৰুণাচল প্ৰদেশৰ এখন ভিতৰুৱা গাঁৱৰ এটি কিশোৰে কেইটামান ছেকেণ্ডৰ ভিতৰতে ৰুবিকছ কিউবৰ জটিলতা সমাধান কৰি পেলাইছে। তাকো একেবাৰে আশ্চৰ্যজনকভাৱে চকু মুদি।
প্ৰবীণ কাছৱানে জানিবলৈ দিয়া মতে দ্বিতীয় শ্ৰেণীত পঢ়ি থকা কিশোৰজনৰ নাম চিন্তা। কাছৱানে লগতে জানিবলৈ দিয়ে যে এই ভিডিঅ’টো তেওঁক আন কোনোবাইহে পঠিয়াইছে। ভাল লগাৰ বাবে তেওঁ সেইটো ছচিয়েল মিডিয়াত পোষ্ট কৰে।
কিশোৰজনে প্ৰথমতে ৰুবিকছ কিউবটো ভালদৰে চাই লৈ ক’ত কোনটো ৰং আছে সেয়া মনত ৰখাৰ চেষ্টা কৰে।
ইয়াৰ পাছত চকু বন্ধ কৰি সেইটো ঘুৰাই থকাৰ কেই ছেকেণ্ডমান ভিতৰতে সকলো ৰং সুন্দৰভাৱে মিলি যোৱা দেখা যায়। ভিডিঅ’টোৱে প্ৰচুৰ জনপ্ৰিয়তা লাভ কৰিছে।