তেলেংগানা চৰকাৰে চৰকাৰী কৰ্মচাৰীয়ে বৃদ্ধ পিতৃ-মাতৃৰ যত্ন নল’লে কঠোৰ ব্যৱস্থা গ্ৰহণ কৰিবলৈ ওলাইছে। মুখ্যমন্ত্ৰী এ ৰেৱন্ত ৰেড্ডীয়ে সোমবাৰে এক অনুষ্ঠানত কয় যে বৃদ্ধ পিতৃ-মাতৃৰ যত্ন নোলোৱা চৰকাৰী বিষয়া বা কৰ্মচাৰীৰ দৰমহাৰ ১০ শতাংশ কৰ্তন কৰা হ’ব আৰু পোনপটীয়াকৈ অভিভাৱকৰ বেংক একাউণ্টলৈ প্ৰেৰণ কৰা হ’ব।
ইতিমধ্যে ৰাজ্য চৰকাৰে এই সন্দৰ্ভত এখন আইন অনাৰ সিদ্ধান্ত লৈছে। মুখ্যমন্ত্রী ৰেড্ডীয়ে কয় যে প্রশাসনে বৃদ্ধ অভিভাৱকসকলে কৰা অভিযোগসমূহ গুৰুত্বসহকাৰে চোৱাচিতা কৰিব আৰু ধন যাতে তেওঁলোকৰ ওচৰলৈ পোনপটীয়াকৈ যায় সেয়া নিশ্চিত কৰিব৷
অনুষ্ঠানত তেওঁ প্ৰতিবন্ধী আৰু বিশেষভাৱে সক্ষম লোকসকলৰ বাবে এক নতুন সাহায্য আঁচনিৰ কথা ঘোষণা কৰে। এই পদক্ষেপৰ অধীনত ৰেট্ৰ’ফিট কৰা মটৰচালিত বাহন, বেটাৰী ট্ৰাইচাইকেল, বেটাৰী হুইল চেয়াৰ, লেপটপ, শ্ৰৱণ যন্ত্ৰ, মোবাইল ফোনকে ধৰি আধুনিক যন্ত্ৰৰ ব্যৱস্থা কৰা হ’ব।
এই প্ৰকল্পৰ বাবে ৰাজ্য চৰকাৰে ৫০ কোটি টকা আবণ্টন দিছে। ইয়াৰ দ্বাৰা শিক্ষা, কৰ্মসংস্থাপন আৰু বিশেষভাৱে সক্ষম লোকসকলৰ প্ৰতি আত্মসন্মানেৰে সমাজত জীয়াই থকাৰ সুযোগ সুনিশ্চিত হ’ব বুলিও মুখ্যমন্ত্ৰীয়ে কয়।
জ্যেষ্ঠ নাগৰিকৰ বাবে ‘প্ৰণাম’ নামেৰে এটা নতুন ডে কেয়াৰ চেণ্টাৰ স্থাপন কৰা হৈছে। এই কেন্দ্ৰসমূহে বৃদ্ধসকলৰ যত্ন আৰু স্বাস্থ্যসেৱা নিশ্চিত কৰিব। ২০২৬-২৭ বিত্তীয় বৰ্ষৰ বাজেটতো নতুন স্বাস্থ্য নীতি ঘোষণা কৰে মুখ্যমন্ত্ৰীয়ে।
সামাজিক অন্তৰ্ভুক্তি আৰু সমতাৰ ক্ষেত্ৰত এক গুৰুত্বপূৰ্ণ পদক্ষেপ ঘোষণা কৰি তেওঁ কয় যে পৰৱৰ্তী পৌৰসভা নিৰ্বাচনত প্ৰতিটো পৌৰ নিগমৰ এটাকৈ সহ-বিকল্প সদস্য পদ তৃতীয় লিংগৰ বাবে সংৰক্ষিত কৰা হ’ব। ইয়াত তেওঁলোকে নিজৰ সমস্যা আৰু দাবীসমূহ পোনপটীয়াকৈ দাঙি ধৰিব পাৰিব।
বিশেষভাৱে সক্ষম নৱবিবাহিত দম্পতীক ২ লাখ টকাৰ আৰ্থিক সাহায্য প্ৰদান কৰা হ’ব বুলিও মুখ্যমন্ত্ৰীয়ে ঘোষণা কৰে। সমান সুযোগ সুনিশ্চিত কৰিবলৈ অনুসূচিত জাতি শ্ৰেণীবিভাজন ৰূপায়ণৰ কথাও উল্লেখ কৰে। তেওঁ শাৰীৰিক অক্ষমতাৰ মাজতো দেশৰ সফল সাংসদ হিচাপে কাৰ্যনিৰ্বাহ কৰা প্ৰয়াত কেন্দ্ৰীয় মন্ত্ৰী জয়পাল ৰেড্ডীক স্মৰণ কৰে।
সামগ্ৰিকভাৱে তেলেংগানা চৰকাৰে মানৱতা, সামাজিক ন্যায় আৰু সমতাৰ বাৰ্তাৰে এই নতুন পদক্ষেপসমূহ ৰূপায়ণ কৰি আছে যিয়ে ৰাজ্যখনৰ ৰাজনীতি আৰু সমাজত এক নতুন দিশ দেখুৱাইছে।
