দেশত সাময়িকভাৱে নিষিদ্ধ কৰা হৈছে টেলিগ্ৰাম এপ্। এই নিৰ্দেশৰ বিৰুদ্ধে দিল্লী উচ্চ ন্যায়ালয়ৰ কাষ চাপিছে সংস্থাটো। এনে পৰিস্থিতিত বৃহস্পতিবাৰে উচ্চ ন্যায়ালয়ত টেলিগ্ৰামৰ বিৰুদ্ধে বিস্ফোৰক দাবী উত্থাপন কৰে কেন্দ্ৰীয় চৰকাৰে। চৰকাৰৰ মতে, টেলিগ্ৰাম এতিয়া ইণ্টাৰনেটৰ নতুন অন্ধকাৰ জগতলৈ ৰূপান্তৰিত হৈছে আৰু তাত অপৰাধীৰ দৌৰাত্ম্য বৃদ্ধি পাইছে। আনকি শিশু পৰ্ণ আৰু সন্ত্ৰাসবাদী গোটৰ উদ্দেশ্য বিয়পাবলৈও ইয়াক ব্যৱহাৰ কৰা হৈছে। ইয়াৰ উপৰিও প্ৰশ্নকাকত ফাদিল কৰাৰ এক মাধ্যম হৈ পৰিছে টেলিগ্ৰাম।
কেন্দ্ৰীয় চৰকাৰে আদালতক জনোৱা মতে অপৰাধীসকলে অতি দ্ৰুতভাৱে টেলিগ্ৰামত এনে কিছুমান লিংক দি দিয়ে য’ত ক্লিক কৰিলে পোনে পোনে ইণ্টাৰনেটৰ সেই গোপন আৰু অন্ধকাৰ জগতখনত প্ৰৱেশ কৰিব পাৰি। প্ৰশাসনৰ বাবে এনে ধৰণৰ কাম-কাজ ধৰা পেলোৱা আৰু অপৰাধীসকলক চিনাক্ত কৰাটো অতি কঠিন হৈ পৰিছে।
আদালতত দাখিল কৰা শপতনামাত উল্লেখ কৰা হৈছে যে টেলিগ্ৰামত নিজৰ পৰিচয় গোপন ৰখাৰ সুবিধা থকাৰ বাবেই ই অপৰাধী চক্ৰৰ বাবে বিশেষভাৱে আকৰ্ষণীয় হৈ পৰিছে। কেন্দ্ৰৰ মতে, ব্যৱহাৰকাৰীসকলে গোপনীয়তাৰ সুবিধা লৈ নিজৰ ফোন নম্বৰ আৰু টেলিগ্ৰামৰ পৰিচয় লুকুৱাই ৰাখিব পাৰে। ফলত তদন্তকাৰী বিষয়াৰ বাবে সেই একাউণ্টবোৰৰ আঁৰত থকা প্ৰকৃত ব্যক্তিক চিনাক্ত কৰাটো কঠিন হৈ পৰে। চৰকাৰে স্পষ্টকৈ অভিযোগ কৰিছে যে নিচা জাতীয় দ্ৰব্যৰ সৰবৰাহ, চাইবাৰ অপৰাধ, সন্ত্ৰাসবাদ আৰু শিশু পৰ্ণৰ দৰে ভয়ংকৰ অপৰাধৰ বাবে ইয়াক ব্যৱহাৰ কৰা হৈছে।
উল্লেখ্য যে ইণ্টাৰনেটৰ এই অন্ধকাৰ জগতখন হ’ল ৱেবৰ সেই লুকাই থকা অংশ যাক সাধাৰণ চাৰ্চ ইঞ্জিনৰ জৰিয়তে বিচাৰি পোৱা নাযায়। তালৈ যাবলৈ বিশেষ ছফ্টৱেৰৰ প্ৰয়োজন হয়। চাইবাৰ অপৰাধ আৰু অবৈধ লেনদেনৰ বাবেই মূলতঃ এই জগতখন ব্যৱহাৰ কৰা হয়। কেন্দ্ৰীয় চৰকাৰৰ দাবী যে টেলিগ্ৰামৰ জৰিয়তেই ইণ্টাৰনেটৰ এই অন্ধকাৰ জগতত প্ৰৱেশ কৰাৰ লিংক বিনিময় কৰা হৈছে।
আনহাতে, চিকিৎসা বিজ্ঞানৰ প্ৰৱেশ পৰীক্ষা আয়োজন কৰা ৰাষ্ট্ৰীয় পৰীক্ষণ সংস্থাই জানিবলৈ দিছে যে যোৱা কেইবামাহ ধৰি বহুতো টেলিগ্ৰাম চেনেলৰ ওপৰত চোৱাচিতা চলাই থকা হৈছে। জানিব পৰা মতে, কিছুমান চেনেলে মুকলিকৈ পৰীক্ষাৰ প্ৰশ্নকাকত দিয়াৰ প্ৰতিশ্ৰুতি দিছিল। পৰীক্ষাৰ্থীৰ পৰা কেইবাহাজাৰৰ পৰা কেইবালক্ষ টকালৈকে দাবী কৰা হৈছিল। অৱশ্যে ৰাষ্ট্ৰীয় পৰীক্ষণ সংস্থাই স্পষ্ট কৰি দিছে যে এনে ধৰণৰ প্ৰতিশ্ৰুতি আচলতে এক প্ৰতাৰণা মাথোঁ।
