ভাৰতে আমেৰিকাৰ পৰা আমদানি কৰা দাইলৰ ওপৰত অস্বাভাৱিক হাৰত অতিৰিক্ত শুল্ক আৰোপ কৰিছে বুলি অভিযোগ উত্থাপন হৈছে। শেহতীয়াকৈ আমেৰিকাৰ ৰিপাব্লিকান দলৰ দুজন জ্যেষ্ঠ চিনেটৰে ৰাষ্ট্ৰপতি ড’নাল্ড ট্ৰাম্পলৈ এখন পত্ৰ লিখি এই বিষয়ত হস্তক্ষেপ কৰিবলৈ অনুৰোধ জনাইছে। তেওঁলোকে কয় যে ভাৰতে আৰোপ কৰা এই ‘অন্যায়’ শুল্কৰ বাবে আমেৰিকাৰ কৃষকসকল বৃহৎ লোকচানৰ সন্মুখীন হৈছে। সেয়েহে ভাৰত আৰু আমেৰিকাৰ মাজত চলি থকা বাণিজ্যিক আলোচনাৰ সময়ত ট্ৰাম্পে যাতে ব্যক্তিগতভাৱে প্ৰধানমন্ত্ৰী নৰেন্দ্ৰ মোডীক এই শুল্ক হ্ৰাস কৰিবলৈ আহ্বান জনায়, তাৰ বাবে চিনেটৰ দুগৰাকীয়ে আবেদন জনাইছে।
মন্টানা আৰু নৰ্থ ডাকোটাৰ ৰিপাব্লিকান চিনেটৰ কেভিন ক্ৰেমাৰ আৰু ষ্টিভ ডেইনছে পত্ৰখনত উল্লেখ কৰিছে যে ভাৰতে যোৱা ১ নৱেম্বৰৰ পৰা আমেৰিকাৰ পৰা আমদানি কৰা দাইলৰ ওপৰত ৩০ শতাংশ শুল্ক আৰোপ কৰিছে। আমেৰিকাৰ এই দুয়োখন ৰাজ্যতে মচুৰ দাইল, মটৰ আৰু শুকান পটলৰ দৰে দাইলৰ বৃহৎ পৰিমাণে খেতি কৰা হয়। যিহেতু ভাৰত বিশ্বৰ ভিতৰতে দাইলৰ আটাইতকৈ ডাঙৰ গ্ৰাহক, সেয়েহে ভাৰতীয় বজাৰখন আমেৰিকান কৃষকসকলৰ বাবে অত্যন্ত গুৰুত্বপূৰ্ণ। কিন্তু নতুন শুল্ক নীতিৰ বাবে আমেৰিকাৰ কৃষিজাত সামগ্ৰীসমূহে ভাৰতীয় বজাৰত তীব্ৰ প্ৰতিযোগিতাৰ সন্মুখীন হ’বলগীয়া হৈছে, যাৰ ফলত তেওঁলোকৰ ব্যৱসায়ত মন্দাৱস্থাই দেখা দিছে।
প্ৰণিধানযোগ্য যে যোৱা বছৰ ট্ৰাম্প প্ৰশাসনে ভাৰতীয় সামগ্ৰীৰ ওপৰত ৫০ শতাংশ শুল্ক আৰোপ কৰিছিল। ভাৰতে ৰাষ্ট্ৰীয় স্বাৰ্থত ৰাছিয়াৰ পৰা কম মূল্যত তেল ক্ৰয় কৰা কাৰ্যক লৈ আমেৰিকাই অসন্তুষ্টি প্ৰকাশ কৰি এই পদক্ষেপ লৈছিল। ইয়াৰ পৰিপ্ৰেক্ষিতত দুয়োখন দেশৰ মাজত বাণিজ্যৰ পৰিমাণ যথেষ্ট হ্ৰাস পাইছে। বৰ্তমান বাণিজ্য চুক্তি সম্পৰ্কত দুয়োখন দেশৰ মাজত আলোচনা অব্যাহত আছে যদিও কোনো চূড়ান্ত সিদ্ধান্তত উপনীত হোৱা নাই। এনে সংবেদনশীল সময়ত আমেৰিকাই যদি দাইলৰ শুল্ক হ্ৰাসৰ বাবে ভাৰতক হেঁচা দিয়ে, তেন্তে ই দুয়োখন দেশৰ বাণিজ্যিক সম্পৰ্কত নতুন সংঘাতৰ সৃষ্টি কৰিব পাৰে বুলি আশংকা কৰা হৈছে।
