চেন্নাইত এগৰাকী দহ বছৰীয়া নাবালিকাক যৌন নিৰ্যাতন চলোৱাৰ অভিযোগত এগৰাকী ৪৩ বছৰীয়া ব্যক্তিক আৰক্ষীয়ে গ্ৰেপ্তাৰ কৰিছে। অভিযুক্ত ব্যক্তিজনৰ নাম দীনেশ বুলি জানিব পৰা গৈছে আৰু তেওঁ অভিনেতা তথা ৰাজনীতিবিদ থলপতি বিজয়ৰ ৰাজনৈতিক দল তামিলগা ভেট্ৰি কাজাগামি বা টিভিকেৰ এজন নেতা। এই জঘন্য কাণ্ডটোৱে বৰ্তমান সমগ্ৰ চেন্নাইতে তীব্ৰ চাঞ্চল্যৰ সৃষ্টি কৰিছে।
আৰক্ষীৰ সূত্ৰৰ মতে কেইদিনমান পূৰ্বে মাইলাপোৰৰ বাসিন্দা নাবালিকা গৰাকীয়ে কাছিমেডু ছিংগাৰাভেলান নগৰত থকা তেওঁৰ এজন আত্মীয়ৰ ঘৰলৈ ফুৰিবলৈ গৈছিল। তাতে ঘৰৰ কাষৰ এখন সৰু পথাৰত খেলি থকা অৱস্থাতে ওচৰৰে বাসিন্দা দীনেশে বালিকাগৰাকীক নিজৰ ঘৰলৈ লৈ যায় আৰু তাতে তেওঁক যৌন নিগ্ৰহ কৰে। কেৱল ইমানেই নহয় এই ঘটনাৰ কথা কাকো ক’লে বালিকাগৰাকীক প্ৰাণে মৰাৰ ভাবুকিও দিয়ে অভিযুক্তজনে। কিন্তু বালিকাগৰাকীয়ে ঘৰলৈ গৈ সাহস কৰি সকলো কথা মাক-দেউতাকক জনায় আৰু তাৰ পিছতে পৰিয়ালে আৰক্ষীৰ কাষ চাপে।
বালিকা গৰাকী আৰু তেওঁৰ পৰিয়ালৰ অভিযোগৰ ভিত্তিত আৰক্ষীয়ে তদন্ত আৰম্ভ কৰি অভিযুক্তৰ বিৰুদ্ধে পকচো আইনৰ অধীনত গোচৰ ৰুজু কৰে। কিন্তু দীনেশ ভোট গণনা কেন্দ্ৰত উপস্থিত থকাৰ বাবে তেওঁক লগে লগে গ্ৰেপ্তাৰ কৰাত অসুবিধা হৈছিল। অৱশেষত যোৱা সোমবাৰে নিশা আৰক্ষীয়ে তেওঁক গ্ৰেপ্তাৰ কৰিবলৈ সক্ষম হয়। অভিযুক্ত দীনেশক আদালতত হাজিৰ কৰোৱাৰ পিছত আদালতে তেওঁক ন্যায়িক জিম্মালৈ প্ৰেৰণৰ নিৰ্দেশ দিয়ে।
