মহামাৰী ক’ৰ’না ভাইৰাছৰ বাবে হতাশাগ্ৰস্তৰে ভৰি থকা মানুহৰ মনবোৰ আই পি এলে পুনৰ এবাৰ জিপাল কৰি তুলিব বুলি মন্তব্য কৰিছে মাষ্টাৰ ব্লাষ্টাৰ শচীন টেণ্ডুলকাৰে।
শচীনে ইণ্ডিয়া টুডে ইন্সপাৰেশ্যনৰ নৱতম এপিছ’ডত কয়, ‘আই পি এল আমাৰ সকলোৰে বাবে ভাল খবৰ। আন বহু খেল পুনৰ এবাৰ আৰম্ভ কৰা হৈছে’।
তেওঁ লগতে কয় ,‘মই ইংলেণ্ডত চলি থকা ফুটবল, এফ-১, টেষ্ট ক্ৰিকেট চাই আছো। সেয়ে এইটো ভাল খবৰ যে আই পি এল য়ুএইত অনুষ্ঠিত হ’ব’।
‘আই পি এল আৰম্ভ হোৱাৰ পিছত আমি ক’ভিড-১৯ক লৈ নহয় ৰান ৰেট, ষ্ট্ৰাইক ৰেট আদিক লৈ চৰ্চা কৰি থাকিম’, এইদৰে কয় শচীনে।
আই পি এল আৰম্ভ হোৱাৰ পিছত ক’ভিড-১৯ৰ শীৰ্ষত কোনখন চহৰ আছে সেই কথা বাদ দি মানুহে মুম্বাই, বেংগালুৰু, দিল্লী তথা যিটো দল শীৰ্ষত থাকে সেই দলটোৰ বিষয়ে আলোচনা কৰিব বুলি শচীনে মন্তব্য কৰে।
ক্ৰিকেটৰ ভগৱান শচীনে প্ৰাৰ্থনা কৰিছে যে আই পি এল আৰম্ভ হোৱাৰ পিছত ক’ৰ’না সংক্ৰমণৰ সংখ্যা কমিব আৰু আগত থাকিব ৰান ৰেট, ষ্ট্ৰাইক ৰেট।
টেণ্ডুলকাৰে লগতে কয়, ‘কেৱল কেলুৱৈ সকলৰ বাবেই নহয় সকলো লোকৰ বাবেই ভাল খবৰ। আই পি এলৰ ফলত মানুহৰ মুখত হাঁহি বিৰিঙিব’।
উল্লেখ্য যে এইবাৰ ক’ৰ’নাৰ বাবে আই পি এল ভাৰতৰ ভূমিৰ বিপৰীতে য়ু এ ইত অহা ১৯ ছেপ্তেম্বৰৰ পৰা অনুষ্ঠিত হ’ব।
