ব্ৰহ্মপুত্ৰ নদীৰ পাৰৰ বিছপ হাউছস্থিত ছেইণ্ট জন বস্কোৰ প্ৰতিমূৰ্তিতো যোৱা শনিবাৰে নিশা কোনো অচিনাক্ত দুষ্কৃতিকাৰীয়ে ভাঙি লণ্ড-ভণ্ড কৰা কাৰ্যক লৈ আজিও শোণিতপুৰ জিলাৰ তেজপুৰ চহৰত এক চেপা উত্তেজনাময় পৰিৱেশে বিৰাজ কৰি আছে।
অচিনাক্ত দুষ্কৃতিকাৰীৰ এই নিৰ্লজ্জ কাণ্ডক এতিয়া চহৰখনৰ লগতে ৰাজ্যৰ বিভিন্ন প্ৰান্তৰ খ্ৰীষ্টান ধৰ্মালম্বীলোক তথা অনুষ্ঠান-প্ৰতিষ্ঠানে তীব্ৰ গৰিহণা দিছে।
উল্লেখ্য যে ছেইণ্ট জন বস্কোৰ প্ৰতিমূৰ্তি ভাঙি লণ্ড-ভণ্ড কৰা সন্দৰ্ভত ভাৰতীয় দণ্ডবিধিৰ ১২০(বি)/ ২৯৫/ ৪২৭ আৰু ৩৪ ধাৰাত ২০০৬/১৮ নম্বৰত তেজপুৰ সদৰ আৰক্ষী থানাত এটা গোচৰ ৰুজু কৰা হৈছে বুলি জানিব পৰা গৈছে।
গোচৰ ৰুজু হোৱাৰ পাছৰে পৰা ঘটনা সন্দৰ্ভত তেজপুৰ আৰক্ষীয়ে অনুসন্ধান চলাই আছে যদিও এই পৰ্যন্ত কোনো এজন দুষ্কৃতিকাৰীকে কৰায়ত্ত কৰিবলৈ সক্ষম হোৱা নাই।
মন কৰিবলগীয়া যে শোণিতপুৰ জিলাৰ তেজপুৰ অঞ্চলত খ্ৰীষ্টান মিছনেৰীয়ে সাধাৰণ মানুহৰ মাজত ভাতৃত্ববোধ জীয়াই ৰখাৰ বাবে বহুতো সামাজিক সংগঠন চলাই থকাৰ লগতে ডন বস্কো স্কুলৰ জৰিয়তেও শিক্ষাৰ প্ৰসাৰৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰি আহিছে।
ইফালে উক্ত দুৰ্ভাগ্যজনক ঘটনা সন্দৰ্ভত শোণিতপুৰ জিলাৰ অতিৰিক্ত আৰক্ষী অধীক্ষক নোমল মহত্তাই নৰ্থ-ইষ্ট নাওৰ আগত নিজৰ ভাব প্ৰকাশ কৰি কয় যে ঘটনাৰ সৈতে যিয়েই জড়িত নহওক কিয় সেইসকলক অতি শীঘ্ৰে কৰায়ত্ত কৰি আইন অনুসৰি দৃষ্টান্তমূলক শাস্তি প্ৰদান কৰাৰ ব্যৱস্থা গ্ৰহণ কৰা হ’ব।