মানসিক শক্তি থাকিলে কোনো ধৰণৰ বাধাই লক্ষ্যত উপনীত হোৱাত হেঙাৰ হ’ব নোৱাৰে।
তাকে প্ৰমাণ কৰি কঠোৰ পৰিশ্ৰম তথা একাগ্ৰতাৰ বলত নিজৰ লক্ষ্যৰ জখলাত বগাবলৈ সক্ষম হৈছে টীয়কৰ এজন উদীয়মান যুৱকে। নাম তেওঁৰ মৃদুপৱন শইকীয়া,ঘৰ টীয়কৰ জগদুৱাৰ নতুন গাওঁত।
মৃদুপৱনে কোনো আনুষ্ঠানিক শিক্ষা নোলোৱাকৈয়ে প্ৰদৰ্শন কৰিছে এটাৰ পাছত আনটো জিমনাষ্টিক ।
দৰাচলতে সৰুৰে পৰা জিমনাষ্টিকৰ প্ৰতি আগ্ৰহী মৃদুপৱন।
অৰ্থিক সমস্যা তথা উপযুক্ত প্ৰশিক্ষণৰ অভাৱত নিজৰ ইচ্ছা কলিতে মৰহি গৈছিল যদিও আজিৰ পৰা প্ৰায় তিনিবছৰমান আগৰ পৰা মোবাইলৰ অনলাইন আৰু ইউটিউবত জিমনাষ্টিকৰ কৌশল চাই চাই ঘৰৰ ওচৰৰে পথাৰত অনুশীলন কৰি আজি এই কলাত নিজৰ পাৰদৰ্শিতা প্ৰদৰ্শন কৰিবলৈ সক্ষম হৈছে।
তেওঁ এতিয়া এটাৰ পাছত আনটো জিমনাষ্টিকৰ কঠিন খেলৰ ভঙ্গীমা প্ৰদৰ্শন কৰিছব পৰা হৈছে।
সঁচাকৈ এয়া আকৰ্ষণীয়,বৰ্তমান ছচিয়েল মিডিয়াত বহুলভাৱে চৰ্চা লাভ কৰিছে মৃদুপৱনৰ এই প্ৰতিভাই।
উল্লেখযোগ্য যে টীয়কৰ দৰে অঞ্চলত জিমনাষ্টিকৰ প্ৰশিক্ষণৰ ব্যৱস্থাটো দুৰৰে কথা খেল খেলিবলৈকে এখন খেলপথাৰৰ অভাৱ।
তৎসত্তেও ঘৰৰ বাৰীৰ মুকলি স্থানত বা বিদ্যালয়ৰ খেলপথাৰতে প্ৰতিকূল পৰিবেশত এই কঠিন ক্ৰীড়াৰ অনুশীলন কৰি গৈছে যুৱকজনে।
জিমনাষ্টিকেই তেওঁৰ আশা প্ৰত্যাশা সকলো। সেয়ে এজন দক্ষ প্ৰশিক্ষকৰ পৰা সহায় বিচাৰিছে মৃদুপৱনে।
আগন্তুক দিনত এজন সফল জিমনাষ্টিক খেলুৱৈ হোৱাৰ সপোন পুহি ৰাখিছে মনত।এই ক্ষেত্ৰত কোনো সদাশয় ব্যক্তিৰ সহায় আশা কৰিছে খেলুৱৈগৰাকীয়ে।
