ৰাজ্যৰ দুজনকৈ সংবাদ কৰ্মীক অসমৰ ৰাজ্যিক মন্ত্ৰী পিয়ুষ হাজৰিকাই ফোনযোগে মৃত্যুৰ ভাবুকি দিয়া ঘটনাক যোৰহাট জিলাৰ সাংবাদিকসকলৰ লগতে টীয়ক প্ৰেছ ক্লাৱেও তীব্ৰ ভাষাৰে গৰিহণা দি আজি প্ৰতিবাদী কাৰ্যসূচী গ্ৰহণ কৰে।
উল্লেখযোগ্য যে অসমত এইদৰে সাংবাদিক নিগ্ৰহৰ ঘটনা সততে ঘটি থাকে যদিও এই ক্ষেত্রত আৰক্ষী-প্ৰশাসনে কোনো ব্যৱস্থা গ্ৰহণ কৰা পৰিলক্ষিত হোৱা নাই।
আজি এই প্ৰতিবাদী কাৰ্যসূচীৰ জৰিয়তে অসমৰ গৃহবিভাগৰ দায়িত্বত থকা মুখ্যমন্ত্ৰীক তাৎক্ষণিক ভাৱে ব্যৱস্থা গ্ৰহণৰ দাবী জনাই প্ৰভাৱশালী মন্ত্ৰীজনক আইনৰ আওঁতালৈ আনিবলৈ দাবী জনায়।
অন্যথা এই ঘটনাৰ বিৰুদ্ধে অধিক জংগী ৰূপত প্ৰতিবাদ গঢ়ি তুলিব বুলি সকিয়াই দিয়ে।
প্ৰতিবাদী কাৰ্যসূচী যোৰহাট জিলা সাংবাদিক সন্থা,আপকুৰ যোৰহাট জিলা সমিতি, আজুৰ যোৰহাট জিলা সমিতি, ছাত্র সন্থা, যুৱ ছাত্র পৰিষদ,চুতীয়া জাতি ছাত্র সন্থা,চাহ জনজাতি অধিকাৰ সংগ্ৰাম সমিতিয়ে অংশগ্ৰহণ কৰি প্ৰতিবাদস্থলীৰ পৰা অসম চৰকাৰক সাংবাদিকক সুৰক্ষা প্ৰদানৰ দাবী জনায়।
